Telekommunikatsiya xizmatlarining sifati nazorat qilinmoqda

“Ilm, maʼrifat va raqamli iqtisodiyotni rivojlantirish” Davlat dasturining bajarilishi yuzasidan axborot va kommunikatsiyalarni rivojlantirish sohasida ham belgilangan vazifalar izchillik bilan amalga oshirilmoqda.

Bugungi kunda Respublikamizning barcha hududlarida “Mahallabay” va “Xonadonbay” ishlash tizimi yoʻlga qoʻyilgan boʻlib, ushbu tizim asosida korxona va tashkilot mutasaddilari ham hududlarda boʻlib, ovul va mahallalarda mavjud muammo va kamchiliklarni oʻrganib, ularning ijobiy hal qilinishiga erishishmoqda.

Jumladan, Oʻzkomnazorat davlat inspektsiyasi Qoraqalpogʻiston Respubliikasi hududiy inspektsiyasi xodimlari tuman va shaharlarda boʻlib, ovul va mahallalarda koʻrsatilayotgan telekommunikatsiya xizmatlarining sifati, infrastruktura obʼektlari va pochta-aloqa binolarida oʻrganish ishlarini olib borishmoqda.

Shu oʻrinda aytish kerakki, mazkur yilda Qoraqalpogʻiston Respublikasi hududi boʻyicha 200 dan ortiq mahalla va ovullarda internet tarmoqlariga ulanish boʻyicha oʻrganish ishlari olib borildi. Oʻrganishlar davomida 465 ta kamchiliklar aniqlanib, tezkorlik bilan bartaraf qilindi va isteʼmolchilarning sifatli internet aloqasi olishga boʻlgan huquqlari buzilishining oldi olindi.

Oʻzkomnazorat davlat inspektsiyasi Qoraqalpogʻiston Respublikasi hududiy inspektsiyasi tomonidan xalq taʼlimi boʻlimi, maktabgacha taʼlim, sogʻliqni saqlash boʻlimlari, ovul va mahalla fuqarolar yigʻinlari binolarida yaratilgan  telekommunikatsiya infrastrukturasi ahvoli, koʻrsatilayotgan telekommunikatsiya  xizmatlari sifati tizimli ravishda nazorat qilib borilmoqda.

Bugungi kunda Qoraqalpogʻiston Respublikasida mavjud 779 ta xalq taʼlimi tasarrufidagi muassasalar, 394 ta maktabgacha taʼlim tashkilotlari, 237 ta sogʻliqni saqlash muassasalari, 422 ta ovul va mahalla fuqarolar yigʻinlarida telekommunikatsiya infrastrukturasi yaratilgan boʻlib, yuqori tezlikdagi internet xizmatlari koʻrsatib kelinmoqda.

Amudaryo tumanidagi Oybek mahalla fuqarolar yigʻinida telekommunikatsiya operatori tomonidan liniya-kabel xoʻjaligini tartibga keltirish, koʻrsatilayotgan xizmatlar sifatini yanada oshirish maqsadida eski mis kabellar optik tolali aloqa kabelariga almashtirilmoqda.

Shuningdek, tumandagi 55-sonli umumtaʼlim maktabi tuman telekommunikatsiya tarmogʻi tomonidan yuqori tezlikdagi internet xizmatlari bilan taʼminlandi.  

Bundan tashqari, tumanda pochta-aloqa sohasida yangidan yoʻlga qoʻyilgan davlat xizmatlari, bank xizmatlari va boshqa turdagi xizmat turlarining aholiga xizmat koʻrsatish darajasini aniqlash maqsadida monitoring oʻtkazildi. Amudaryo tumanidagi barcha pochta-aloqa obeʼktlari yuqori tezlikdagi internet va zamonaviy kompyuter texnikalari bilan toʻliq taʼminlangan.

 Amudaryo tumanida aholiga qulaylik yaratish, uzogʻini yaqin qilish maqsadida pochta-aloqa obʼektlarida 34 turdagi davlat xizmatlari ishga tushirilgan. Shuningdek 2 xil turdagi bank xizmatlari, kommunal toʻlovlar va 100 dan ortiq boshqa xildagi toʻlovlar amalga oshirilib kelinmoqda.

Aytish joizki, telekommunikatsiya tarmoqlarini rivojlantirish va ilgʻor jahon tajribasiga asoslangan eng zamonaviy aloqa xizmatlarini joriy etish qisqa vaqt ichida “Raqamli Oʻzbekiston”ga oʻtish uchun mustahkam zamin yaratmoqda.

 Tuman hokimligining Axborot xizmati.