Ғолиб ёшлар муносиб тақдирланди

Ёшлар ҳар бир давлатнинг келажагини, салоҳиятини белгиловчи муҳим ижтимоий қатлам саналади. Зеро, ҳар бир жамиятнинг ҳолати, тақдири ва истиқболи унда яшаётган ёшларнинг салмоғи, маънавияти ва онглилиги даражаси билан белгиланади. Ёшлар жамиятнинг эртанги келажаги, унинг фаол аъзоси, таъбир жоиз бўлса жамият эртасининг муносиб ворисларидир. Мазкур нуқтаи назарга кўра ҳам ёшлар давлат ва жамият томонидан доимий эътиборда бўлади.

Ўз тақдирини Ватан келажагида кўрувчи иқтидроли ёшлар давлатимиз томонидан яратиб берилаётган имкониятлардан унумли фойдаланиб, Ватан тараққиётига муносиб ҳисса қўшиб келмоқдалар.

Яқинда Тошкент шаҳрида “Ўзбек жанг санъати” миллий спорт тури бўйича республика чемпионати ўтказилди. Ушбу спорт турининг яратилганига бу йил 16 йил тўлди. Ўзбек жанг санъати бобокалонларимиз Амир Темур, Жалолиддин Мангуберди, Заҳириддин Муҳаммад Бобурнинг жанг қилиш услублари ҳамда, карате таэквандо каби спорт турларининг замонавий услублари  омуҳталашиши натижасида яратилди.

Бундан мақсад− ўзбек халқининг қадимий жанг санъанити сақлаб қолиш, ҳамда келгуси авлодга етказишдан иборат. Ҳозирги кунда ушбу спорт турига ёшлар жуда катта қизиқиш билдириб, турли мусобақа ва олимпиадаларда қатнашиб юқори натижаларга эришиб келмоқдалар.

Жумладан, Ўзбек жанг санъатининг мерган, чавандозлик йўналишлари бўйича феврал ойида бўлиб ўтган Ўзбекистон чемпионатида 69-сонли умумтаълим мактабининг ўқувчи қизлари Лайло Худойбергенова 1-ўринни, Севинчой Ражаббоева 2-ўринни, Лолагул Тозабоева 3-ўринни эгаллаб қайдилар. 

Май ойида мазкур спорт турининг шахсий беллашув йўналишда Ҳилола Турсунбоева, Шаббона Азадовалар фахрли 1-ўринни, Холида Отажанова  фахрли 2-ўринни эгаллаб олтин ва кумуш медаллар билан қайтдилар.

Спорт мусобақаларида юқори натижаларга эришиб, ўз мактаби маҳалласи ва оиласи шаънини муносиб ҳимоя қилган спортчи қизларнинг ютуқлари Амударё тумани ҳокимлиги, туман прокуратураси, Ёшлар ишлари агентлиги туман бўлими томонидан эътироф этилиб, эсдалик совғалари билан тақдирланди. Тақдирлаш маросими мактабнинг иқтидорли ўқувчилари томонидан тайёрланган гўзал рақслар, саҳна кўринишларига уланиб кетди.

Ёшларга қаратилаётган эътибор, мунтазам равишда ўтказилиб келинадиган “Ҳоким ва ёшлар” , “Прокурор ва ёшлар” учрашувлари уларни янада руҳлантириб, янги марралар ва зафарлар сари ундамоқда.

Яқинда Янгиобод маҳалла фуқаролар йиғини биносида “Прокурор ва ёшлар учрашуви” бўлиб ўтди. Унда туман прокурори ёрдамчиси, тегишли ташкилот масъуллари ва маҳалла ҳудудида истиқомат қилувчи 30 га яқин фаол ёшлар иштирок этишди. Учрашув давомида ёшлардан бандлик, имтиёзли кредит олиш каби масалаларда мурожаатлар келиб тушди. Мурожаатлар бўйича тегишли соҳа ходимларига қатъий белгиланган топшириқлар берилиб, ижроси назоратга олинди.

Шунингдек, учрашув якунида  “Беш муҳим ташаббус” доирасида амалга оширилиши белгиланган “Зукко китобхон” кўрик танловининг туман босқичида ғолиб бўлиб, Республика босқичига йўлланмани қўлга киритган “Янгиобод ёшлари” жамоаси муносиб тақдирланди.

Айтиш керакки, мамлакатимизнинг эртанги куни, фаровонлиги фарзандларимиз қандай инсон бўлиб камолга етиши билан боғлиқ. Бизнинг асосий вазифамиз – ёшларнинг ўз салоҳиятини намоён қилиши учун зарур шароитлар яратишдан иборатдир.

Туман ҳокимлигининг Ахборот хизмати