Gʻolib yoshlar munosib taqdirlandi

Yoshlar har bir davlatning kelajagini, salohiyatini belgilovchi muhim ijtimoiy qatlam sanaladi. Zero, har bir jamiyatning holati, taqdiri va istiqboli unda yashayotgan yoshlarning salmogʻi, maʼnaviyati va ongliligi darajasi bilan belgilanadi. Yoshlar jamiyatning ertangi kelajagi, uning faol aʼzosi, taʼbir joiz boʻlsa jamiyat ertasining munosib vorislaridir. Mazkur nuqtai nazarga koʻra ham yoshlar davlat va jamiyat tomonidan doimiy eʼtiborda boʻladi.

Oʻz taqdirini Vatan kelajagida koʻruvchi iqtidroli yoshlar davlatimiz tomonidan yaratib berilayotgan imkoniyatlardan unumli foydalanib, Vatan taraqqiyotiga munosib hissa qoʻshib kelmoqdalar.

Yaqinda Toshkent shahrida “Oʻzbek jang sanʼati” milliy sport turi boʻyicha respublika chempionati oʻtkazildi. Ushbu sport turining yaratilganiga bu yil 16-yil toʻldi. Oʻzbek jang sanʼati bobokalonlarimiz Amir Temur, Jaloliddin Manguberdi, Zahiriddin Muhammad Boburning jang qilish uslublari hamda, karate taekvando kabi sport turlarining zamonaviy uslublari  omuhtalashishi natijasida yaratildi.

Bundan maqsad− oʻzbek xalqining qadimiy jang sanʼaniti saqlab qolish, hamda kelgusi avlodga yetkazishdan iborat. Hozirgi kunda ushbu sport turiga yoshlar juda katta qiziqish bildirib, turli musobaqa va olimpiadalarda qatnashib yuqori natijalarga erishib kelmoqdalar.

Jumladan, Oʻzbek jang sanʼatining mergan, chavandozlik yoʻnalishlari boʻyicha fevral oyida boʻlib oʻtgan Oʻzbekiston chempionatida 69-sonli umumtaʼlim maktabining oʻquvchi qizlari Laylo Xudoybergenova 1-oʻrinni, Sevinchoy Rajabboyeva 2-oʻrinni, Lolagul Tozaboyeva 3-oʻrinni egallab qaydilar. 

May oyida mazkur sport turining shaxsiy bellashuv yoʻnalishda Hilola Tursunboyeva, Shabbona Azadovalar faxrli 1-oʻrinni, Xolida Otajanova  faxrli 2-oʻrinni egallab oltin va kumush medallar bilan qaytdilar.

Sport musobaqalarida yuqori natijalarga erishib, oʻz maktabi mahallasi va oilasi shaʼnini munosib himoya qilgan sportchi qizlarning yutuqlari Amudaryo tumani hokimligi, tuman prokuraturasi, Yoshlar ishlari agentligi tuman boʻlimi tomonidan eʼtirof etilib, esdalik sovgʻalari bilan taqdirlandi. Taqdirlash marosimi maktabning iqtidorli oʻquvchilari tomonidan tayyorlangan goʻzal raqslar, sahna koʻrinishlariga ulanib ketdi.

Yoshlarga qaratilayotgan eʼtibor, muntazam ravishda oʻtkazilib kelinadigan “Hokim va yoshlar” , “Prokuror va yoshlar” uchrashuvlari ularni yanada ruhlantirib, yangi marralar va zafarlar sari undamoqda.

Yaqinda Yangiobod mahalla fuqarolar yigʻini binosida “Prokuror va yoshlar uchrashuvi” boʻlib oʻtdi. Unda tuman prokurori yordamchisi, tegishli tashkilot masʼullari va mahalla hududida istiqomat qiluvchi 30 ga yaqin faol yoshlar ishtirok etishdi. Uchrashuv davomida yoshlardan bandlik, imtiyozli kredit olish kabi masalalarda murojaatlar kelib tushdi. Murojaatlar boʻyicha tegishli soha xodimlariga qatʼiy belgilangan topshiriqlar berilib, ijrosi nazoratga olindi.

Shuningdek, uchrashuv yakunida  “Besh muhim tashabbus” doirasida amalga oshirilishi belgilangan “Zukko kitobxon” koʻrik tanlovining tuman bosqichida gʻolib boʻlib, Respublika bosqichiga yoʻllanmani qoʻlga kiritgan “Yangiobod yoshlari” jamoasi munosib taqdirlandi.

Aytish kerakki, mamlakatimizning ertangi kuni, farovonligi farzandlarimiz qanday inson boʻlib kamolga yetishi bilan bogʻliq. Bizning asosiy vazifamiz – yoshlarning oʻz salohiyatini namoyon qilishi uchun zarur sharoitlar yaratishdan iboratdir.

Tuman hokimligining Axborot xizmati