Туманда ғалла ўрим-йиғими олдидан кўргазмали семинар бўлиб ўтди

Ғалла – ризқ-рўзимиз, нон – дастурхонимиз кўрки, файзи ҳисобланади. Шу сабабли ҳам деҳқонларимиз ғаллачиликда ҳосилдорликни ошириш, эл-юртимиз дастурхони тўкинлигини таъминлашга доимий эътибор қаратиб келишади. Айниқса, амударёлик ғаллакорлар ҳар йили мўл ҳосил олиб, юксак хирмонлари билан мамлакатимизда пешқадамлар сафида келмоқда.

Бу йил ҳам туман фермерларининг далаларида мўл ҳосил етиштирилди. Туманда 344 та фермер хўжаликлари ҳамда қишлоқ хўжалиги корхоналари томонидан ўтган йил кузда 6 минг гектар майдонга сара буғдой уруғлари қадалган бўлиб, ғаллачилик кластерлари билан дон етказиб бериш бўйича шартномалар тузилди.

Буғдой уруғи қадалганидан тортиб, ғалла ҳосили пишиб етилгунига қадар барча агротехник тадбирлар ўз вақтида ва сифатли амалга оширилди. Натижада далаларда мўл ҳосил тўпланди. Етиштирилган мўл ҳосилни қисқа фурсатларда нес-нобуд қилмай ўриб-йиғиб олиш мақсадида барча ҳаракатлар изчиллик билан амалга оширилмоқда.

9 июнь куни туманнинг Қипчоқ овулидаги “Ҳайтимбетов Султон” фермер хўжалигида жорий йилги ғалла ўрим-йиғими мавсуми бошланиши муносабати билан кўргазмали семинар бўлиб ўтди.

Унда туман ҳокими Султонбой Йўлдашев, Қорақалпоғистон Республикаси Қишлоқ хўжалиги вазири Зоҳид Зиядуллаев, “Qipchoq g‘alla klaster” масъулияти чекланган жамияти директори Баҳром Йўлдашев, қишлоқ хўжалиги бўлими масъуллари, фермер ҳамда механизаторлар қатнашдилар.

 Семинар аввалида ёши улуғ отахонлар ғалла майдонларида етиштирилган буғдой навлари бу йил ҳар йилдагиданда ўзгача ҳосил йиққанини таъкидлаб, юртимизда мўл-кўлчилик, тўкин-сочинлик дастурхонларимизда ноз-у неъматлар бисёр бўлишини тилаб дуо қилдилар. Қолаверса, бободеҳқонларга олдидаги машаққатли, шу билан бирга шарафли ишларида куч-қувват тиладилар.

Шундан сўнг семинар иштирокчиларига 16 июндан 5 июлгача давом этадиган ўрим-йиғим мавсумида амалга ошириладиган ишлар бўйича чора-тадбирлар дастури кенг турда тушунтирилди.

Семинарда таъкидланганидек, туманимизда дон қабул қилиш шахобчаси томонидан жорий йилда жами 8 минг 960 тонна бошоқли дон экинларини қабул қилиш режа қилинган. Ушбу ишларни уюшқоқлик билан, тизимли равишда амалга ошириш мақсадида штаб ташкил қилиниб, 17 та ўрим отрядларига 18 та комбайнлар бириктирилди.

Бугунги кунда комбайинлар ўрим йиғим мавсумига тайёр ҳолатга келтирилди ҳамда мавсум давомида узлуксиз ишлашини таъминлаш учун эҳтиёт қисмлар заҳиралари яратилди. Комбайнлар билан бир қаторда мавсумда дон ташишга мўлжалланган ҳамда хизмат кўрсатадиган техникалар ҳам жалб қилиниб, уларнинг ҳам мавсум давомида тўлиқ ишчи ҳолатида бўлишини таъминлаш чоралари кўрилди.

Қолаверса, мавсум давомида комбайн ҳайдовчиларига етарли шарт-шароит яратиб бериш, уларни ҳар томонлама қўллаб-қувватлаш, моддий рағбатлантириш масалалари ҳам алоҳида эътиборга олинди.

Шунингдек, туманда озиқ-овқат хавфсизлиги ҳамда аҳолини қишлоқ хўжалиги маҳсулотлари билан мунтазам равишда таъминлаш мақсадида ғалла майдонларидан бўшайдиган ерларнининг 1 минг 997 гектарига такрорий экинлар экиш режа қилинганлиги қайд этиб ўтилди.

Семинар якунида ғалла майдонларида ўрим-йиғим олдидан ёнғин хавфсизлиги қоидаларига риоя этиш, ғалланинг исроф бўлиб ўрилишига йўл қўймаслик, ўрилган ғалла майдонларидаги сомонларни ёқмаслик борасида фермер хўжаликларининг мутасадди ходимларига, ғаллакор ва механизаторларга тушунтиришлар бериб ўтилди.

Туман ҳокимлигининг Ахборот хизмати.