Tumanda gʻalla oʻrim-yigʻimi oldidan koʻrgazmali seminar boʻlib oʻtdi

Gʻalla – rizq-roʻzimiz, non – dasturxonimiz koʻrki, fayzi hisoblanadi. Shu sababli ham dehqonlarimiz gʻallachilikda hosildorlikni oshirish, el-yurtimiz dasturxoni toʻkinligini taʼminlashga doimiy eʼtibor qaratib kelishadi. Ayniqsa, amudaryolik gʻallakorlar har yili moʻl hosil olib, yuksak xirmonlari bilan mamlakatimizda peshqadamlar safida kelmoqda.

Bu yil ham tuman fermerlarining dalalarida moʻl hosil yetishtirildi. Tumanda 344 ta fermer xoʻjaliklari hamda qishloq xoʻjaligi korxonalari tomonidan oʻtgan yil kuzda 6 ming gektar maydonga sara bugʻdoy urugʻlari qadalgan boʻlib, gʻallachilik klasterlari bilan don yetkazib berish boʻyicha shartnomalar tuzildi.

Bugʻdoy urugʻi qadalganidan tortib, gʻalla hosili pishib yetilguniga qadar barcha agrotexnik tadbirlar oʻz vaqtida va sifatli amalga oshirildi. Natijada dalalarda moʻl hosil toʻplandi. Yetishtirilgan moʻl hosilni qisqa fursatlarda nes-nobud qilmay oʻrib-yigʻib olish maqsadida barcha harakatlar izchillik bilan amalga oshirilmoqda.

9-iyun kuni tumanning Qipchoq ovulidagi “Haytimbetov Sulton” fermer xoʻjaligida joriy yilgi gʻalla oʻrim-yigʻimi mavsumi boshlanishi munosabati bilan koʻrgazmali seminar boʻlib oʻtdi.

Unda tuman hokimi Sultonboy Yoʻldashev, Qoraqalpogʻiston Respublikasi Qishloq xoʻjaligi vaziri Zohid Ziyadullayev, “Qipchoq g‘alla klaster” masʼuliyati cheklangan jamiyati direktori Bahrom Yoʻldashev, qishloq xoʻjaligi boʻlimi masʼullari, fermer hamda mexanizatorlar qatnashdilar.

 Seminar avvalida yoshi ulugʻ otaxonlar gʻalla maydonlarida yetishtirilgan bugʻdoy navlari bu yil har yildagidanda oʻzgacha hosil yiqqanini taʼkidlab, yurtimizda moʻl-koʻlchilik, toʻkin-sochinlik dasturxonlarimizda noz-u neʼmatlar bisyor boʻlishini tilab duo qildilar. Qolaversa, bobodehqonlarga oldidagi mashaqqatli, shu bilan birga sharafli ishlarida kuch-quvvat tiladilar.

Shundan soʻng seminar ishtirokchilariga 16-iyundan 5-iyulgacha davom etadigan oʻrim-yigʻim mavsumida amalga oshiriladigan ishlar boʻyicha chora-tadbirlar dasturi keng turda tushuntirildi.

Seminarda taʼkidlanganidek, tumanimizda don qabul qilish shaxobchasi tomonidan joriy yilda jami 8 ming 960 tonna boshoqli don ekinlarini qabul qilish reja qilingan. Ushbu ishlarni uyushqoqlik bilan, tizimli ravishda amalga oshirish maqsadida shtab tashkil qilinib, 17 ta oʻrim otryadlariga 18 ta kombaynlar biriktirildi.

Bugungi kunda kombayinlar oʻrim yigʻim mavsumiga tayyor holatga keltirildi hamda mavsum davomida uzluksiz ishlashini taʼminlash uchun ehtiyot qismlar zahiralari yaratildi. Kombaynlar bilan bir qatorda mavsumda don tashishga moʻljallangan hamda xizmat koʻrsatadigan texnikalar ham jalb qilinib, ularning ham mavsum davomida toʻliq ishchi holatida boʻlishini taʼminlash choralari koʻrildi.

Qolaversa, mavsum davomida kombayn haydovchilariga yetarli shart-sharoit yaratib berish, ularni har tomonlama qoʻllab-quvvatlash, moddiy ragʻbatlantirish masalalari ham alohida eʼtiborga olindi.

Shuningdek, tumanda oziq-ovqat xavfsizligi hamda aholini qishloq xoʻjaligi mahsulotlari bilan muntazam ravishda taʼminlash maqsadida gʻalla maydonlaridan boʻshaydigan yerlarnining 1 ming 997 gektariga takroriy ekinlar ekish reja qilinganligi qayd etib oʻtildi.

Seminar yakunida gʻalla maydonlarida oʻrim-yigʻim oldidan yongʻin xavfsizligi qoidalariga rioya etish, gʻallaning isrof boʻlib oʻrilishiga yoʻl qoʻymaslik, oʻrilgan gʻalla maydonlaridagi somonlarni yoqmaslik borasida fermer xoʻjaliklarining mutasaddi xodimlariga, gʻallakor va mexanizatorlarga tushuntirishlar berib oʻtildi.

Tuman hokimligining Axborot xizmati.