Уч кунлик ўқув-амалий семинарни муваффақиятли якунлаган ҳоким ёрдамчиларига махсус сертификатлар топширилди

Янгиликлар 17 06 2022

1. Бугунги кунда Амударё туманидаги 49 та овул ва маҳалла фуқаролар йиғинида тадбиркорликни ривожлантириш, аҳоли бандлигини таъминлаш ва камбағалликни қисқартириш масалалари бўйича 49 нафар ҳоким ёрдамчилари фаолият юритмоқда.

Ўзбекистон Республикаси Иқтисодий тараққиёт ва камбағалликни қисқартириш вазирлиги ҳузуридаги Бизнес ва тадбиркорлик Олий мактаби ҳамда Маҳаллабай ишлаш ва тадбиркорликни ривожлантириш агентлиги билан ҳамкорликда тузилган меморандумга асосан 9-13 июнь кунлари Беруний туманида жойлашган 35-сонли ихтисослаштирилган давлат умумтаълим мактаби биносида Амударё, Беруний, Тўрткўл, Элликқалъа тумани маҳаллаларида фаолият юритаётган ҳоким ёрдамчилари учун “Ҳоким ёрдамчилари фаолиятини самарали ташкил қилиш: маҳаллада тадбиркорликни ривожлантириш, аҳоли бандлигини таъминлаш ва камбағалликни қисқартириш йўллари” мавзусида семинар ташкил этилган эди.

Уч кун давом этган семинарда ҳоким ёрдамчиларига малакали профессор-ўқитувчилар томонидан аҳоли бандлигини таъминлаш йўллари, маҳаллаларда тадбиркорликни ривожлантиришнинг молиявий манбалари, маҳалланинг “ўсиш нуқтаси”ни аниқлаш, “маҳаллабай” ишлаш тизими каби мавзуларда батафсил маълумотлар берилди.

Қолаверса, маърузачилар томонидан иқтисодиёт ва менежмент асослари йўналишида маҳорат дарслари ташкил этилиб, ҳоким ёрдамчилари учун фаолиятлари давомида зарур бўладиган билимлар ноанъанавий усулларда тушунтирилди.

Ўқув-амалий семинар 13 июнь санасида якунланди. Мазкур туманлар кесимидаги семинарда жами 162 нафар ҳоким ёрдамилари ўз билимларини амалий ва кейс машғулотлар асосида янада мустаҳкамладилар.

 13 июнь куни Амударё тумани ҳокимлиги биносида ўқув-курсни якунлаб, тестлардан муваффақиятли ўтган ҳоким ёрдамчиларига сертификатлар тантанали тарзда топширилди.

Тадбирда Амударё тумани ҳокимининг биринчи ўринбосари Рашид Салаев, Бизнес ва тадбиркорлик олий мактаби Қорақалпоғистон Республикаси филиали раҳбари Гулзира Ризаева ҳамда Иқтисодий тараққиёт ва камбағалликни қисқартириш вазирлиги ҳузуридаги Маҳаллабай ишлаш ва тадбиркорликни ривожлантириш агентлигининг Қорақалпоғистон Республикаси бошқармаси бош мутахассиси Азиза Худайназаровалар иштирок этишди.

Тадбир давомида Гулзира Ризаева туманда ҳоким ёрдамчилари томонидан аҳолинининг яшаш шароитини яхшилаш, бандлигини таъминлаш, тадбиркорлик режаларини қўллаб-қувватлаш борасида амалга оширилаётган ишларни алоҳида эътироф этиб ўтди.

Шунингдек, ҳоким ёрдамчиларига халқ хизматига доимо шай бўлиб, сидқидилдан меҳнат қилишларида куч-қувват ва зафарлар тилади.

Туман ҳокимлигининг Ахборот хизмати.