Келажак учун муваффақиятли касб-ҳунарларни эгаллаш – давр талаби

Мамлакатимизда ёшларнинг касб-ҳунар ўрганиши, амалий кўникмага эга бўлиши ва замонавий мутахассис сифатида шаклланишига алоҳида эътибор қаратилмоқда. Бу борадаги саъй-ҳаракатлар жойлардаги касб-ҳунар таълими муассасалари фаолиятида ҳам яққол намоён бўлмоқда. Хусусан, Амударё тумани 2-сонли политехникуми нафақат ўқувчиларга касб ўргатиш, балки уларнинг ҳаётий йўлини тўғри танлашларига кўмаклашишда ҳам фаоллик кўрсатмоқда.

Политехникумда ўтказилган навбатдаги “Касблар фестивали” ҳамда “Очиқ эшиклар куни” тадбирлари муассасанинг таълим салоҳияти ва касбий йўналишлардаги имкониятларини кенг жамоатчиликка намойиш қилишда муҳим платформа вазифасини ўтади.

Тадбирда туман прокуратураси ходимлари, барча умумтаълим мактабларининг 9-11-синф битирувчилари, Мактабгача ва мактаб таълими бўлими психологлари, ўқитувчилар, ота-оналар иштирок этишди.

Тадбирни политехникум директорининг ёшлар билан ишлаш бўйича ўринбосари Жасурбек Атажонов кириш сўзи очиб, мамлакатимизда касб-ҳунар таълимига берилаётган эътибор, ёшларни мутахассис сифатида етиштиришдаги давлат сиёсати хусусида тўхталиб ўтди. Шунингдек, таълим муассасасида мавжуд бўлган йўналишлар ҳақида батафсил маълумот берилди.

Тадбир аввалида ўтган ўқув йилида билим ва фаолияти билан юқори натижаларга эришган ўқувчилар тантанали равишда тақдирланди.

Иштирокчилар махсус безатилган ҳовлида ташкил этилган кўргазмалар, тўгараклар ва ишлаб чиқариш устахоналари фаолияти билан танишдилар.

Политехникумдаги замонавий ўқув ва амалиёт хоналари, лабораториялар, компьютер ва мультимедиа синфлари, махсус касб-ҳунар хоналари иштирокчиларда катта таассурот қолдирди. Ўқитувчилар ва амалиёт усталари иштирокчиларга таълим муассасасидаги имкониятлар ҳақида маълумот бериб, касб-ҳунар таълими жараёнини намойиш этди.

Фестиваль доирасида политехникумда таҳсил олаётган чевар қизлар томонидан тайёрланган миллий ва замонавий либослар кўргазмаси ҳам ўтказилди. Шунингдек, маданий-маърифий концерт дастури, рақслар ва ижодий чиқишлар тадбирга байрамона руҳ бағишлади.

Маълумот ўрнида таъкидлаш жоизки, политехникум Қорақалпоқ давлат университетига бириктирилган бўлиб, ўқув жараёни миллий ва халқаро стандартларга мос равишда олиб борилади.

Муассасада 37 нафар олий маълумотли ўқитувчи, шу жумладан, 2 нафар бош ўқитувчи, 11 нафар етакчи ўқитувчи ва 10 нафар катта ўқитувчи фаолият олиб боради. Шу билан бирга, 30 нафар умумкасбий амалиёт усталари ҳам таълим жараёнида иштирок этишади.

Политехникумда ўқувчилар учун барча зарур шарт-шароитлар яратилган. Замонавий таълим инфратузилмаси, инновацион ёндашув ва юқори малакали мутахассислар иштирокидаги ўқув жараёни бу ерда таълим олишни янада самарали қилади. Муассаса ҳудудида 150 ўринли ишлаб чиқариш устахоналари, фаоллар ва спорт заллари, очиқ спорт майдончалари, лингафон хоналари, махсус касб-ҳунар хоналари, замонавий лабораториялар мавжуд бўлиб, улар ўқувчиларнинг назарий билимларини амалий машғулотлар билан бойитиш ва танлаган касбларига бўлган қизиқишларини ривожлантириш имконини беради.

Шунингдек, замонавий техника ва асбоб-ускуналар билан жиҳозланган устахоналар, компьютер ва мультимедиа синфхоналари орқали ўқувчилар янги технологиялар билан ишлашни амалда ўрганадилар. Ҳар бир ўқувчи учун индивидуал ёндашув, интерфаол дарслар ва кўргазмали таълим усуллари қўлланилади.

Политехникумнинг асосий мақсади – муҳандислик ва техник соҳаларда ўрта бўғин мутахассисларини тайёрлашдан иборат. Бундан ташқари, ошпазлик ва мактабгача таълим ташкилотларининг маиший масалалари менежери каби йўналишларда дуал таълим шакли жорий қилинган бўлиб, иш берувчилар билан ҳамкорлик асосида ўқувчилар ишлаб чиқариш жараёнига жалб этилади. 2025-2026 ўқув йилида Амударё тумани 2-сонли политехникуми бошланғич касбий таълим дастурлари бўйича 9-синф битирувчилари учун автомобилларни таъмирлаш ва уларга хизмат кўрсатиш, пайвандловчи, оқава сув ва сув таъминоти тизимларидан фойдаланиш ва монтаж қилиш устаси, маиший техника жиҳозларига хизмат кўрсатиш ва таъмирлаш, ошпазлик, якка тартибда кийим тикувчи ҳамда рақамли ахборотларни қайта ишлаш устаси йўналишларида таълим олиш имконини тақдим этади.

Шунингдек, ўрта ва ўрта махсус касбий таълим дастурлари бўйича мактабгача таълим ташкилоти услубчиси, кутубхонашунослик ва библиография, спорт фаолияти ҳамда мактабгача таълим ташкилотларининг маиший масалалари менежери каби йўналишларда мутахассислар тайёрланади.

Политехникумда таълим олувчилар ўз мутахассисликлари бўйича амалий тажрибага эга бўлишлари учун ишлаб чиқариш корхоналари ва муассасалар билан ҳамкорлик ўрнатилган. Бундан ташқари, битирувчилар ўзлаштирган модуллари, тўплаган кредитлари ва олий таълим ташкилоти томонидан белгиланган баллар асосида олий таълимнинг тегишли босқичидан ўқишни давом эттириш имконига эга бўладилар.

Шу билан бирга, политехникум турли иш берувчи ташкилотлар билан ҳамкорлик қилгани сабабли, битирувчилар учун меҳнат бозорида ишга жойлашиш имкониятлари анча кенгдир. Касбга эга бўлган ёшлар давлат ва хусусий секторда, стартапларда ва ҳатто ўз бизнесларини бошлашда катта устунликка эга бўладилар.

Иштирокчилар тадбир орқали келажакдаги касб танлови олдидан керакли маълумотларга эга бўлиш, ўзларини қизиқтирган йўналишларни кўздан кечириш, устозлар билан бевосита мулоқотда бўлиш имконига эга бўлдилар. Кўргазмали воситалар, ўқувчиларнинг ишлари, интерактив машғулотлар орқали уларда касбга бўлган қизиқиш ва ишонч мустаҳкамланди.

Шунингдек, тадбир доирасида битирувчиларнинг ишга жойлашуви, корхона ва ташкилотлар билан ҳамкорлик алоқалари, амалиёт тизими ҳақида ҳам маълумотлар берилди.

Бир сўз билан айтганда, бу каби тадбирлар нафақат ўқувчиларнинг касбга бўлган иштиёқини оширади, балки уларни ҳаётга тайёрлайди, жамиятда ўз ўрнини топишга ундайди.

Шоҳзод Қурбонбоев тайёрлади.