Амударё тумани фермерлари ғалла топшириш режасини ортиғи билан бажарди

Мамлакатимизда қишлоқ хўжалиги соҳасида амалга оширилаётган ислоҳотлар халқ фаровонлигининг юксалишига хизмат қилмоқда. Айниқса, бошоқли дон экинларини етиштиришга қаратилаётган эътибор дастурхонимиз тўкинлигини таъминлашда муҳим аҳамиятга эга.

Мамлакатимизнинг барча ҳудудларида, шу жумладан Амударё туманида ҳам ғаллачилик йўналишидаги фермер хўжаликлари томонидан ҳар йилги шартномавий режалар ортиғи билан бажарилиб, йил давомида халқимизни сифатли ун ва ун маҳсулотлари билан таъминлаш имконияти ошиб бормоқда.

Жорий йил ҳосили учун туманимизда 344 та фермер хўжаликлари ҳамда қишлоқ хўжалиги корхоналари томонидан 6 минг гектар майдонга ғалла экилиб, текис униб чиққан буғдой майсалари агротехника қоидалари асосида парвариш қилинди.

 Фермер хўжаликлари томонидан буғдой далаларини куз-қиш мавсумида суғориш ва озиқлантириш ишларига катта эътибор берилиб, кечиктириб бўлмайдиган агротехник тадбирлар уюшқоқлик билан тизимли равишда амалга оширилди.

Эрта баҳорда буғдой майсаларини суғориш ва озиқлантириш, суспензия сепиш, зараркунандаларга қарши курашиш ва бегона ўтлардан тозалаш тадбирлари давом эттирилди. Натижада ёзнинг ўрталарига келиб далаларимизда кўзни қувонтирадиган, мўл ҳосилдан дарак берувчи ғалла бошоқлари бўлиқ бўлиб етилди.

Айниқса, кластерлар ташкил қилингани ҳамда ғаллани сотиш жараёнига бозор механизмлари жорий қилинаётгани фермерларнинг моддий манфаатдорлигини оширди. Ислоҳотлар натижасида бу йилги мавсумдан бошлаб янги тизим жорий қилиниб, дон етиштирган фермер хўжаликларига давлат харидлари учун етказилиб бериладиган 1 кг товар доннинг нархи 3 минг сўм қилиб белгиланди. Туман бўйича оладиган бўлсак, давлат харидлари учун сотилиши режа қилинган товар доннинг 5 минг 944 тоннаси, яъний 78 фоизи 3 минг сўмдан кафолатли сотиб олинади. Қолган 3 минг 378 тонна буғдой дон корхонасида ижара асосида сақланиб, биржа савдолари орқали июль, август, сентябрь ойларида эркин нархларда сотилиши режалаштирилган. Ушбу ўзгаришлар фермерларни ердан кўпроқ даромад ва мўл ҳосил олишга ундаши билан аҳамиятлидир.

Етиштирилган ҳосилни ўриб олиш мақсадида туманда жами 17 та ўрим отрядлари ташкил этилиб, уларга 18 та комбайнлар бириктирилди. Ўрим-йиғим мавсуми олдидан дон қабул қилиш масканлари тўлиқ таъмирланиб, жалб қилинадиган техникалар техник кўрикдан ўтказилди ва бу ишларда қатнашувчи ишчиларнинг малакалари оширилди.

Ўрим-йиғим мавсумининг уюшқоқлик билан ташкил қилингани натижасида етиштирилган донни йиғиб олиш ишлари қисқа фурсатларда якунланди. Бир кунда салкам 850 тонна дон қабул масканларига киритилгани ҳам фикримизнинг далилидир.

Бу каби уюшқоқлик натижасида фермерларимиз шартномадаги 10 минг 672 тонна ўрнига 10 минг 704,6 тонна дон топшириб, 24 июнь куниёқ режаларини ортиғи билан бажардилар ва Қорақалпоғистонда биринчилардан бўлиб энг сарбаланд ғалла хирмонини кўтардилар.

Шартномавий режадан ташқари етиштирилган ҳосилнинг фермер хўжаликлари тасарруфида қолиши қишлоқ аҳлининг турмуш фаровонлигини таъминланишда муҳим аҳамият касб этади.

Туманда ўрим-йиғим ишлари ҳали давом этмоқда. Амударёлик ғаллакорлар далаларда пишиб етилган бошоқли донни нес-нобут қилмай, сўнгги мисқолигача йиғиштириб олиш учун меҳнат қилмоқдалар.

Фурсатдан фойдаланиб, барча ғаллакорларимизга хирмонингиз ҳамиша сарбаланд бўлсин, ҳалол меҳнатларингизнинг роҳатини кўриш насиб қилсин, деймиз. Меҳнат зафарингиз муборак, азиз амударёлик ғаллакорлар!

Туман ҳокимлигининг Ахборот хизмати.