Amudaryo tumani fermerlari gʻalla topshirish rejasini ortigʻi bilan bajardi

Mamlakatimizda qishloq xoʻjaligi sohasida amalga oshirilayotgan islohotlar xalq farovonligining yuksalishiga xizmat qilmoqda. Ayniqsa, boshoqli don ekinlarini yetishtirishga qaratilayotgan eʼtibor dasturxonimiz toʻkinligini taʼminlashda muhim ahamiyatga ega.

Mamlakatimizning barcha hududlarida, shu jumladan Amudaryo tumanida ham gʻallachilik yoʻnalishidagi fermer xoʻjaliklari tomonidan har yilgi shartnomaviy rejalar ortigʻi bilan bajarilib, yil davomida xalqimizni sifatli un va un mahsulotlari bilan taʼminlash imkoniyati oshib bormoqda.

Joriy yil hosili uchun tumanimizda 344 ta fermer xoʻjaliklari hamda qishloq xoʻjaligi korxonalari tomonidan 6 ming gektar maydonga gʻalla ekilib, tekis unib chiqqan bugʻdoy maysalari agrotexnika qoidalari asosida parvarish qilindi.

 Fermer xoʻjaliklari tomonidan bugʻdoy dalalarini kuz-qish mavsumida sugʻorish va oziqlantirish ishlariga katta eʼtibor berilib, kechiktirib boʻlmaydigan agrotexnik tadbirlar uyushqoqlik bilan tizimli ravishda amalga oshirildi.

Erta bahorda bugʻdoy maysalarini sugʻorish va oziqlantirish, suspenziya sepish, zararkunandalarga qarshi kurashish va begona oʻtlardan tozalash tadbirlari davom ettirildi. Natijada yozning oʻrtalariga kelib dalalarimizda koʻzni quvontiradigan, moʻl hosildan darak beruvchi gʻalla boshoqlari boʻliq boʻlib yetildi.

Ayniqsa, klasterlar tashkil qilingani hamda gʻallani sotish jarayoniga bozor mexanizmlari joriy qilinayotgani fermerlarning moddiy manfaatdorligini oshirdi. Islohotlar natijasida bu yilgi mavsumdan boshlab yangi tizim joriy qilinib, don yetishtirgan fermer xoʻjaliklariga davlat xaridlari uchun yetkazilib beriladigan 1 kg tovar donning narxi 3 ming soʻm qilib belgilandi. Tuman boʻyicha oladigan boʻlsak, davlat xaridlari uchun sotilishi reja qilingan tovar donning 5 ming 944 tonnasi, yaʼniy 78 foizi 3 ming soʻmdan kafolatli sotib olinadi. Qolgan 3 ming 378 tonna bugʻdoy don korxonasida ijara asosida saqlanib, birja savdolari orqali iyul, avgust, sentyabr oylarida erkin narxlarda sotilishi rejalashtirilgan. Ushbu oʻzgarishlar fermerlarni yerdan koʻproq daromad va moʻl hosil olishga undashi bilan ahamiyatlidir.

Yetishtirilgan hosilni oʻrib olish maqsadida tumanda jami 17 ta oʻrim otryadlari tashkil etilib, ularga 18 ta kombaynlar biriktirildi. Oʻrim-yigʻim mavsumi oldidan don qabul qilish maskanlari toʻliq taʼmirlanib, jalb qilinadigan texnikalar texnik koʻrikdan oʻtkazildi va bu ishlarda qatnashuvchi ishchilarning malakalari oshirildi.

Oʻrim-yigʻim mavsumining uyushqoqlik bilan tashkil qilingani natijasida yetishtirilgan donni yigʻib olish ishlari qisqa fursatlarda yakunlandi. Bir kunda salkam 850 tonna don qabul maskanlariga kiritilgani ham fikrimizning dalilidir.

Bu kabi uyushqoqlik natijasida fermerlarimiz shartnomadagi 10 ming 672 tonna oʻrniga 10 ming 704,6 tonna don topshirib, 24-iyun kuniyoq rejalarini ortigʻi bilan bajardilar va Qoraqalpogʻistonda birinchilardan boʻlib eng sarbaland gʻalla xirmonini koʻtardilar.

Shartnomaviy rejadan tashqari yetishtirilgan hosilning fermer xoʻjaliklari tasarrufida qolishi qishloq ahlining turmush farovonligini taʼminlanishda muhim ahamiyat kasb etadi.

Tumanda oʻrim-yigʻim ishlari hali davom etmoqda. Amudaryolik gʻallakorlar dalalarda pishib yetilgan boshoqli donni nes-nobut qilmay, soʻnggi misqoligacha yigʻishtirib olish uchun mehnat qilmoqdalar.

Fursatdan foydalanib, barcha gʻallakorlarimizga xirmoningiz hamisha sarbaland boʻlsin, halol mehnatlaringizning rohatini koʻrish nasib qilsin, deymiz. Mehnat zafaringiz muborak, aziz amudaryolik gʻallakorlar!

Tuman hokimligining Axborot xizmati.