СПОРТЧИ ҚИЗ ОЛТИНОЙ
Спорт – ёшларнинг жисмонан соғлом, етук ва баркамол инсонлар бўлиб камол топишида муҳим аҳамият касб этади. Шу сабабдан ҳам юртимизнинг барча ҳудудлари бўйлаб ёшларни спортга жалб қилиш борасида кўплаб амалий ишлар амалга оширилмоқда. Жамиятимизда соғлом турмуш тарзини шакллантириш, аҳолининг, айниқса, ўсиб келаётган ёш авлоднинг спорт билан мунтазам шуғулланиши учун зарур шарт-шароитлар яратилган.
Ушбу имкониятлардан унумли фойдаланиб келаётган ёшлар сафи туманимизда ҳам талайгина. Ана шундай ёш спортчилардан Олтиной Шукуруллаева спортнинг оғир атлетика тури бўйича кўпгина мусобақалар ғолиби. У ўзининг иқтидори ва қобилияти билан тенгдошларидан ажралиб туради. Тўққиз ёшида туман Болалар-ўсмирлар спорт мактабининг оғир атлетика гуруҳига қатнай бошлади. Устози Анвар Бобониёзовдан оғир атлетика спорт тури сир-асрорларини ўрганди. Кўплаб шогирдларнинг талабчан устози Анвар Бобониёзов Олтинойда спортнинг бу турига бўлган қизиқиш жуда кучли эканлигини сезгач, унга жиддий эътибор берадиган, у билан алоҳида ҳам шуғулланадиган бўлди.
Ёш спортчи қизда ўзи ўрганаётган спорт турига ихлосни мураббийи жуда қадрлади. Шу сабабдан унинг ҳам жисмоний, ҳам руҳий тайёргарлигини оширишга киришди, машғулотлар давомида амалий билимларни эринмай ўргатди. Талабчан ва жонкуяр мураббийидан олган сабоқлари самараси ҳадемай Олтинойнинг ютуқларида акс эта бошлади.
Бугунги кунда туманимиздаги 21-сонли мактабда таълим олаётган Олтиной Шукуруллаева Қорақалпоғистон, Ўзбекистон чемпионатлари соҳибаси.
Шулардан, 2019 йил Хива шаҳрида бўлиб ўтган 2005 йилда туғилган ва ундан кичик ёшдаги ўсмирлар ўртасида Ўзбекистон чемпионатида 71 кг. вазн тоифасида 1-ўрин, 2020 йил Чирчиқ шаҳрида бўлиб ўтган Ўзбекистон чемпионатида 76 кг. вазн тоифасида 2-ўрин, 2021 йил Самарқанд шаҳрида ўтказилган Ўзбекистон чемпионатида 71 кг. вазн тоифасида 2-ўрин, 2021 йил Хива шаҳрида Болалар ва ўсмирлар спорт мактаблари спортчилари ўртасида ўтказилган мусобақада 71 кг. вазн тоифасида 2-ўрин, 2005-2009 йилларда туғилган ўсмирлар ва қизлар орасидаги Қорақалпоғистон Республикаси чемпионатида 1-ўрин, қизлар ўртасида ўтказилган Қорақалпоғистон Республикаси кубогида 76 кг. вазнда 1-ўринни қўлга киритди. Бундан ташқари, у мактабда ўтказилган маънавий тадбирларда ҳам фаол қатнашиб келади.
Олтиной каби оғир атлетика спорт турини ўрганиб, нуфузли мусобақаларда совринли ўринни олаётган спортчи қизларнинг ўқишда ва спорт соҳасида ҳам муваффақиятларга эришаверишини тилаймиз.
Шаҳзод Қурбонбоев,
ҚДУ талабаси.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
