Тўлқин овулида марҳум спортчи Фурқат Ражапов хотирасига бағишлаб бокс бўйича очиқ биринчилик ўтказилди

9 май – Хотира ва қадрлаш куни мамлакатимизда кенг нишонланиб, сана муносабати билан Иккинчи жаҳон урушида қатнашган қаҳрамонлар хотираси ёдга олинади, орамизда юрган фахрийлар ва нуронийларга янада чуқур эъзоз-эҳтиром кўрсатилади. Нафақат урушда, балки юрт тараққиёти ва халқ фаровонлиги йўлида фидокорона меҳнат қилиб, бу ёруғ дунёни барвақт тарк этган ватандошларимиз хотираси ҳам ушбу сана сабабли яна бир марта ёд этилади.

Амударё туманининг Тўлқин овулида шу овулнинг бир гуруҳ фаоллари – бокс мураббийлари Азимжон Мухторов, Низомаддин Қипчақбаевлар ҳамда маҳалла фаоли Абай Сағинбаев ташаббуси билан ҳам ана шундай хайрли тадбир ташкил қилинди.

Хотира ва қадрлаш куни муносабати билан 9, 10 ва 11 май кунлари ўтказилган, бир қанча Халқаро мусобақалар, уч карра Қорақалпоғистон Республикаси чемпиони бўлган марҳум Ражапов Фурқат Гулмирзаевич хотирасига бағишланган бокс мусобақалари юзлаб ёшларни қамраб олди. Мусобақага марҳум Фурқат Ражаповнинг ота-онаси ва яқин қариндошлари ҳамда ушбу ҳудудда яшовчи спортсевар ёшлар, кенг жамоатчилик вакиллари ташриф буюрди.

Мусобақанинг очилиш маросимида Амударё тумани спорт мактаби директори Чоршам Тажимуратов ва бошқалар сўзга чиқиб, Фурқат Ражаповнинг ёрқин хотирасини ёдга олдилар ва унинг эришган муваффақиятлари, тайёрлаган шогирдлари ва туманимизда спорт, хусусан бокс ривожига қўшган ҳиссаси ҳақида сўзладилар.

Мусобақаларда Қорақалпоғистон Республикасининг Амударё, Тахиятош, Чимбой туманлари ҳамда Нукус шаҳридан, Хоразм вилоятининг Гурлан ва Хива туманларидан жами 150 нафардан ортиқ ёш спортчилар иштирок этиб, 20та вазн тоифасида ўзаро куч синашдилар.

Айтиш жоизки, ёшларни спортга жалб қилиш уларнинг жисмоний ва руҳий саломатлигини мустаҳкамлаш, шунингдек соғлом турмуш тарзини шакллантиришда муҳим аҳамиятга эга. Шу сабабли ҳам маҳаллаларда ёшларни оммавий спортга жалб қилишни янги босқичга олиб чиқиш чора-тадбирлари ишлаб чиқилган ва бу бўйича амалий ишлар қилинмоқда. Бу дастурлар асосида ташкил қилинаётган тадбирлар ёшларни спорт билан фаол равишда шуғулланишга рағбатлантиради. Шунингдек, мазкур дастурлар оммавий спорт тадбирларини ташкил этиш, спорт иншоотларини замонавий жиҳозлар билан таъминлаш ва имконияти чекланган ёшлар учун спорт инфратузилмасини яратиш каби муҳим йўналишларни ўз ичига олади.

Бундан ташқари, маҳаллаларда жамоатчилик фаоллари ташаббуси билан ташкил қилинаётган турли спорт тадбирлари ҳам ёшларнинг бўш вақтларини мазмунли ўтказиш, уларни спортга ошно қилиш, турли ёт ғоя ва иллатлардан ҳимоя қилишда муҳим аҳамият касб этиб, келажагимиз эгаларининг баркамол авлод бўлиб вояга етишларига пухта замин ҳозирламоқда.

Дўстлик учрашуви дея эътироф этилган ушбу мусобақлар якунига кўра амударёлик, хусусан Тўлқин овуллик боксчилар умумий ҳисобда 1-ўринни эгаллаб, ғолибликни қўлга киритди. Ғолибларга ташкилотчилар томонидан дипломлар ва эсдалик совғалари топширилди.

Бу каби спорт тадбирлари, мусобақалар нафақат ёшларнинг бўш вақтларини мазмунли ўтказиш ҳамда жисмоний саломатликларини мустаҳкамлашда, балки ижтимоий фаоллигини оширишда ҳам муҳим аҳамият касб этади. Қолааверса, бу маҳаллаларда спортни оммалаштириш ва ёшларнинг спортга бўлган қизиқишини рағбатлантириш борасида амалга оширилаётган ислоҳотларнинг амалий ифодасидир.