Полиз маҳсулотлари, мевалар, озиқ-овқат маҳсулотларининг инсон ҳаёти учун хавфсизлиги назорат қилинмоқда

Айни кунларда серқуёш ўлкамизда ёз фасли ҳукум сурмоқда. Янги узилган ва томорқаларда етиштирилган турфа полиз экинлари ҳамда мевалар бозорларимиз расталарини тўлдириб турибди.

Аммо, сотилаётган ушбу қишлоқ хўжалиги маҳсулотлари аҳоли саломатлиги учун хавфсизми?

Амударё тумани Санитария-эпидемиологик осойишталик ва жамоат саломатлиги маркази ходимлари томонидан ҳар куни тумандаги деҳқон бозори ва дўконлар расталарига сотувга чиқарилаётган полиз маҳсулотлари, сархил мевалар, озиқ-овқат маҳсулотларининг инсон ҳаёти учун хавфсизлиги назорат қилинмоқда.

Маълумки, қишлоқ хўжалиги маҳсулотларига нисбатан нотўғри агротехник тадбирлар амалга оширилганда, қолаверса, дўконлардаги озиқ-овқат маҳсулотларининг истеъмолга яроқлилик муддати тугаган ва бошқа ҳолатларда ўткир юқумли ичак касалликлари келиб чиқади.

 Манғит деҳқон бозори ҳудудида жойлашган ветеринария-санитария лабароторияси ходимлари ушбу нохуш ҳолатларнинг олдини олиш мақсадида бозор расталарига келиб тушган қовун-тарвуз ҳамда бошқа полиз экинларини экспресс усулда текширмоқдалар. Таркибидаги нитрат миқдори нормадан юқори бўлган маҳсулотлар тегишли тартибда савдодан четлатилмоқда.

Шу кунга қадар Манғит деҳқон бозори ҳудудида жойлашган ветеринария-санитария лабораторияси томонидан таркибидаги нитрат миқдори меъёрдан юқори бўлган 148 кг тарвуз савдодан олиниб, тегишли тартибда йўқ қилинди.

Ундан ташқари, туман Санитария-эпидемиологик осойишталик ва жамоат саломатлиги маркази ходимлари томонидан озиқ-овқат ва қишлоқ хўжалиги маҳсулотлари савдоси билан шуғулланадиган тадбиркорларга маҳсулотларни сақлаш ва сотиш қоидаларига амал қилинмаслик оқибатида келиб чиқадиган ўткир юқумли ошқозон-ичак касалликлари ҳақида маълумотлар берилиб, уларнинг олдини олиш бўйича профилактик тарғибот ишлари олиб борилмоқда.

Профилактик тадбирлар натижасида “Манғит деҳқон бозори” масъулияти чекланган жамияти ходимларига бозордаги мавжуд камчиликларни бартараф этиш, бозорнинг санитария ҳолатини яхшилаш ва бу орқали аҳоли орасида юқумли касалликлар ва овқатдан заҳарланишнинг олдини олиш мақсадида тавсиялар берилмоқда.

Шунингдек, профилактик тадбирлар давомида уй шароитида тайёрланган тузланган помидор ва бодринг савдоси билан шуғулланаётган сотувчиларнинг маҳсулотлари текширилиб, яроқлилик муддати ўтиб кетган 14,5 кг маҳсулотлар истеъмолга яроқсиз деб топилди ҳамда 6 нафар фуқарога “Маъмурий жавобгарлик тўғрисида”ги кодекснинг 53-моддасига мувофиқ жарима солинди.

Шу ўринда айтиш керакки, ёз фаслида пишиб етилган қишлоқ хўжалиги маҳсулотларини йиғиб-териб олиш, сақлаш ва сотувга чиқариш борасида белгиланган санитария-гигиена қоидаларига риоя қилиш ҳар бир тадбиркорнинг касбий ва инсоний бурчидир. Шунингдек, фуқаролар ҳам соғлигига беэътибор бўлмасдан, харид қилинган озиқ-овқат маҳсулотларини гигиена қоидаларига риоя қилган ҳолда харид қилишлари ва истеъмол қилишлари лозим.

 Бир сўз билан айтганда, ҳар ким ўзи ва ўзгалар соғлиги учун жавобгар эканлигини чуқур ҳис қилмоғи даркор. Зеро, саломатлик – туман бойликдир.

Туман ҳокимлигининг Ахборот хизмати.