“Ал-кафил бизнес пласт” МЧЖ ички бозорни юқори сифатли пластмасса маҳсулотлари билан таъминлаб келмоқда

Мамлакат иқтисодиётининг барқарор ўсиши ва унинг жаҳон бозорига кириб боришини таъминловчи асосий омиллардан бири соҳалар бўйича экспорт салоҳиятини ошириш ҳисобланади. Шу мақсадда ўтган йиллар давомида мамлакатимизда кўплаб эркин иқтисодий зона ва кичик саноат зоналари ташкил этилди. Уларда мингдан ортиқ лойиҳалар ишга туширилган бўлиб, 100 мингдан ортиқ иш ўрни яратилди ва республикамизда маҳсулот ишлаб чиқариш ҳажми кескин ошди.

Дарҳақиқат, кейинги даврда ҳар бир туманга саноат кириб бориб, олис ва чекка ҳудудларда янги ишлаб чиқариш субъектлари пайдо бўлмоқда. Амударё туманида ташкил этилган кичик саноат зонасида фаолият юритувчи “Ал-кафил бизнес пласт” масъулияти чекланган жамияти ҳам йилдан-йилга ривожланиб, нафақат туманимиздаги, балки бошқа ҳудудлардаги бозорларни ҳам ўзининг сифатли пластмасса маҳсулотлари билан таъминлаб келмоқда.

“Ал-кафил бизнес пласт” масъулияти чекланган жамияти 2019 йилнинг апрель ойида ташкил қилинган эди. Шу йили ишлаб чиқариш фаолиятини бошлаши учун Халқ банки томонидан 37 минг АҚШ доллари миқдорида имтиёзли кредит олди. Хитой Халқ Республикасидан пластмасса маҳсулотларини ишлаб чиқарувчи дастгоҳлар олиб келиниши натижасида халқ кундалик турмушида фойдаланиладиган 10дан ортиқ турдаги пластмасса  буюмлари ишлаб чиқарила бошланди. Ўша даврда МЧЖда 10 нафар ишчи ходим фаолият юритган бўлса, бугунги кунда 15 нафар тажрибали ходим меҳнат қилмоқда.

Мазкур жамият томонидан 4 хил турдаги, ҳар хил кичик ва ўрта ҳажмдаги хўжалик ва уй-рўзғор учун идишлар ишлаб чиқарилади. Жорий йилда ишлаб чиқариш фаолиятини кенгайтириш мақсадида Хитой Халқ Республикасидан янги дастгоҳлар олиб келинди. Бунинг натижасида яна 6 хил турдаги пластмасса маҳсулотлари, жумладан ҳар хил ҳажмдаги катта идишлар ишлаб чиқарилиши йўлга қўйилди ва қўшимча иш ўринлари ташкил этилди.

Ҳозирги кунда “Ал-кафил бизнес пласт” МЧЖда иш вақти 3 сменада ташкил этилиб, ишлаб чиқариш ҳажми ой сайин ошиб бормоқда. Масъулияти чекланган жамияти бугунги кунда маҳсулотларини Қорақалпоғистондан ташқари Хоразм, Навоий, Бухоро, Самарқанд ва Тошкент вилоятларига етказиб беради.

“Ал-кафил бизнес пласт” масъулияти чекланган жамияти хорижий ва қўшни давлатларда ташкил этилаётган “Made in Uzbekistan” кўргазмаларида фаол иштирок этади. Яқинда Қозоғистон Республикасида ташкил этилган саноат кўргазмасида мазкур корхона ходимлари ҳам иштирок этиб, юқори сифатли пластмасса маҳсулотлари билан Амударё туманининг ишлаб чиқариш салоҳиятини намойиш этишди.

Шу кунларда корхона раҳбарияти маҳсулотларини қўшни давлатлар, яъни Қозоғистон, Тожикистон ва Қирғиз Республикаларига экспорт қилишни режалаштирмоқда. Ушбу лойиҳалар амалга ошиши натижасида яна кўплаб янги иш ўринлари ташкил этилиши кўзда тутилган.

Шоҳзод Қурбонбоев