“Al-kafil biznes plast” MChJ ichki bozorni yuqori sifatli plastmassa mahsulotlari bilan taʼminlab kelmoqda
Mamlakat iqtisodiyotining barqaror oʻsishi va uning jahon bozoriga kirib borishini taʼminlovchi asosiy omillardan biri sohalar boʻyicha eksport salohiyatini oshirish hisoblanadi. Shu maqsadda oʻtgan yillar davomida mamlakatimizda koʻplab erkin iqtisodiy zona va kichik sanoat zonalari tashkil etildi. Ularda mingdan ortiq loyihalar ishga tushirilgan boʻlib, 100 mingdan ortiq ish oʻrni yaratildi va respublikamizda mahsulot ishlab chiqarish hajmi keskin oshdi.
Darhaqiqat, keyingi davrda har bir tumanga sanoat kirib borib, olis va chekka hududlarda yangi ishlab chiqarish subʼektlari paydo boʻlmoqda. Amudaryo tumanida tashkil etilgan kichik sanoat zonasida faoliyat yurituvchi “Al-kafil biznes plast” masʼuliyati cheklangan jamiyati ham yildan-yilga rivojlanib, nafaqat tumanimizdagi, balki boshqa hududlardagi bozorlarni ham oʻzining sifatli plastmassa mahsulotlari bilan taʼminlab kelmoqda.
“Al-kafil biznes plast” masʼuliyati cheklangan jamiyati 2019-yilning aprel oyida tashkil qilingan edi. Shu yili ishlab chiqarish faoliyatini boshlashi uchun Xalq banki tomonidan 37 ming AQSh dollari miqdorida imtiyozli kredit oldi. Xitoy Xalq Respublikasidan plastmassa mahsulotlarini ishlab chiqaruvchi dastgohlar olib kelinishi natijasida xalq kundalik turmushida foydalaniladigan 10dan ortiq turdagi plastmassa buyumlari ishlab chiqarila boshlandi. Oʻsha davrda MChJda 10 nafar ishchi xodim faoliyat yuritgan boʻlsa, bugungi kunda 15 nafar tajribali xodim mehnat qilmoqda.
Mazkur jamiyat tomonidan 4 xil turdagi, har xil kichik va oʻrta hajmdagi xoʻjalik va uy-roʻzgʻor uchun idishlar ishlab chiqariladi. Joriy yilda ishlab chiqarish faoliyatini kengaytirish maqsadida Xitoy Xalq Respublikasidan yangi dastgohlar olib kelindi. Buning natijasida yana 6 xil turdagi plastmassa mahsulotlari, jumladan har xil hajmdagi katta idishlar ishlab chiqarilishi yoʻlga qoʻyildi va qoʻshimcha ish oʻrinlari tashkil etildi.
Hozirgi kunda “Al-kafil biznes plast” MChJda ish vaqti 3 smenada tashkil etilib, ishlab chiqarish hajmi oy sayin oshib bormoqda. Masʼuliyati cheklangan jamiyati bugungi kunda mahsulotlarini Qoraqalpogʻistondan tashqari Xorazm, Navoiy, Buxoro, Samarqand va Toshkent viloyatlariga yetkazib beradi.
“Al-kafil biznes plast” masʼuliyati cheklangan jamiyati xorijiy va qoʻshni davlatlarda tashkil etilayotgan “Made in Uzbekistan” koʻrgazmalarida faol ishtirok etadi. Yaqinda Qozogʻiston Respublikasida tashkil etilgan sanoat koʻrgazmasida mazkur korxona xodimlari ham ishtirok etib, yuqori sifatli plastmassa mahsulotlari bilan Amudaryo tumanining ishlab chiqarish salohiyatini namoyish etishdi.
Shu kunlarda korxona rahbariyati mahsulotlarini qoʻshni davlatlar, yaʼni Qozogʻiston, Tojikiston va Qirgʻiz Respublikalariga eksport qilishni rejalashtirmoqda. Ushbu loyihalar amalga oshishi natijasida yana koʻplab yangi ish oʻrinlari tashkil etilishi koʻzda tutilgan.
Shohzod Qurbonboyev
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
