Poliz mahsulotlari, mevalar, oziq-ovqat mahsulotlarining inson hayoti uchun xavfsizligi nazorat qilinmoqda

Ayni kunlarda serquyosh oʻlkamizda yoz fasli hukum surmoqda. Yangi uzilgan va tomorqalarda yetishtirilgan turfa poliz ekinlari hamda mevalar bozorlarimiz rastalarini toʻldirib turibdi.

Ammo, sotilayotgan ushbu qishloq xoʻjaligi mahsulotlari aholi salomatligi uchun xavfsizmi?

Amudaryo tumani Sanitariya-epidemiologik osoyishtalik va jamoat salomatligi markazi xodimlari tomonidan har kuni tumandagi dehqon bozori va doʻkonlar rastalariga sotuvga chiqarilayotgan poliz mahsulotlari, sarxil mevalar, oziq-ovqat mahsulotlarining inson hayoti uchun xavfsizligi nazorat qilinmoqda.

Maʼlumki, qishloq xoʻjaligi mahsulotlariga nisbatan notoʻgʻri agrotexnik tadbirlar amalga oshirilganda, qolaversa, doʻkonlardagi oziq-ovqat mahsulotlarining isteʼmolga yaroqlilik muddati tugagan va boshqa holatlarda oʻtkir yuqumli ichak kasalliklari kelib chiqadi.

 Mangʻit dehqon bozori hududida joylashgan veterinariya-sanitariya labarotoriyasi xodimlari ushbu noxush holatlarning oldini olish maqsadida bozor rastalariga kelib tushgan qovun-tarvuz hamda boshqa poliz ekinlarini ekspress usulda tekshirmoqdalar. Tarkibidagi nitrat miqdori normadan yuqori boʻlgan mahsulotlar tegishli tartibda savdodan chetlatilmoqda.

Shu kunga qadar Mangʻit dehqon bozori hududida joylashgan veterinariya-sanitariya laboratoriyasi tomonidan tarkibidagi nitrat miqdori meʼyordan yuqori boʻlgan 148 kg tarvuz savdodan olinib, tegishli tartibda yoʻq qilindi.

Undan tashqari, tuman Sanitariya-epidemiologik osoyishtalik va jamoat salomatligi markazi xodimlari tomonidan oziq-ovqat va qishloq xoʻjaligi mahsulotlari savdosi bilan shugʻullanadigan tadbirkorlarga mahsulotlarni saqlash va sotish qoidalariga amal qilinmaslik oqibatida kelib chiqadigan oʻtkir yuqumli oshqozon-ichak kasalliklari haqida maʼlumotlar berilib, ularning oldini olish boʻyicha profilaktik targʻibot ishlari olib borilmoqda.

Profilaktik tadbirlar natijasida “Mangʻit dehqon bozori” masʼuliyati cheklangan jamiyati xodimlariga bozordagi mavjud kamchiliklarni bartaraf etish, bozorning sanitariya holatini yaxshilash va bu orqali aholi orasida yuqumli kasalliklar va ovqatdan zaharlanishning oldini olish maqsadida tavsiyalar berilmoqda.

Shuningdek, profilaktik tadbirlar davomida uy sharoitida tayyorlangan tuzlangan pomidor va bodring savdosi bilan shugʻullanayotgan sotuvchilarning mahsulotlari tekshirilib, yaroqlilik muddati oʻtib ketgan 14,5 kg mahsulotlar isteʼmolga yaroqsiz deb topildi hamda 6 nafar fuqaroga “Maʼmuriy javobgarlik toʻgʻrisida”gi kodeksning 53-moddasiga muvofiq jarima solindi.

Shu oʻrinda aytish kerakki, yoz faslida pishib yetilgan qishloq xoʻjaligi mahsulotlarini yigʻib-terib olish, saqlash va sotuvga chiqarish borasida belgilangan sanitariya-gigiyena qoidalariga rioya qilish har bir tadbirkorning kasbiy va insoniy burchidir. Shuningdek, fuqarolar ham sogʻligiga beeʼtibor boʻlmasdan, xarid qilingan oziq-ovqat mahsulotlarini gigiyena qoidalariga rioya qilgan holda xarid qilishlari va isteʼmol qilishlari lozim.

 Bir soʻz bilan aytganda, har kim oʻzi va oʻzgalar sogʻligi uchun javobgar ekanligini chuqur his qilmogʻi darkor. Zero, salomatlik – tuman boylikdir.

Tuman hokimligining Axborot xizmati.