Ming oylik dovondan oshgan umrning serhosil mevalari

Oqar daryo misoli umrning har bir qatrasidan yaxshilik, halol mehnat ortidan sermeva bogʻlar yaratish, hayot sahifalariga goʻzal amallar, chiroyli nom yozib, asrlarga tatigulik kitob qoldirish mumkin ekan. Butun umri, mehnat faoliyati davomida halollikni shior etib, nafaqat oʻzi va oilasining manfaati uchun, balki jamiyat rivoji, xalq farovonligini taʼminlash bel bogʻlagan Hazrati Insonlar bor ekan, bugunimiz kechagi kunimizdan, ertamiz bugunimizda farovonroq boʻlib boraveradi... Ha, soʻz qudratini chuqur anglagan inson bu maʼnolarning zalvorli yukini his etgani kabi, uning mazmunidagi umrni yashab oʻtish ham oson emasligini yaxshi biladi. Shu sababdirki, hayot yoʻli va mehnat faoliyati bilan bunday sermazmun kitob bitish hammaga ham nasib etavermaydi.

Oʻzida yuksak maʼnaviyatni shakllantirgan, samarali mehnat faoliyati va insoniy fazilatlari bilan el-yurt hurmatiga sazovor boʻlgan inson — Qoraqalpogʻiston Respublikasida xizmat koʻrsatgan kommunal, maishiy xizmat va savdo xodimi, tadbirkor Tursunboy Ahmedovning ming oylik dovondan oshgan umr sahifalarida ham ulkan bogʻning goʻzal manzaralarini koʻramiz.

Oʻtgan asrning 41-yili, bahorning ayni kunlarida Amu elining Xitoy qishlogʻida muqaddas zamin tuprogʻiga ildiz otgan koʻchat — Tursunboy ota Ahmedov bugun umrining 84-bahorida ham koʻnglidagi yoshlarga xos gʻayratu zavq bilan, hayotga ishtiyoq, muhabbat bilan yashamoqda. Bu insonning barkamol shaxs sifatida shakllanishida mehnatga boʻlgan muhabbat, halollik va masʼuliyat kabi fazilatlarning oʻrni beqiyos.

Qahramonimiz qariyb 40-yildan buyon “Mangʻit” MChJga rahbarlik qilib kelmoqda. Dastlab faqat toʻrt turdagi maishiy xizmat koʻrsatish bilan faoliyat boshlagan jamiyat, bugungi kunda aholiga keng qamrovli xizmat turlarini taqdim etayotgan zamonaviy markazga aylangan. Xususan, maishiy texnika taʼmiri, payvandlash, temirchilik, vulkanizatsiya, sartaroshlik, tikuvchilik va boshqa yoʻnalishlarda aholiga sifatli xizmat koʻrsatmoqda. Jamiyat nafaqat ishonchli xizmat koʻrsatadi, balki koʻplab insonlar uchun sevimli ish joyi, kasbga muhabbat uygʻotuvchi maskan, ustoz-shogird anʼanalarining yorqin namunasidir.

Tursunboy otaning rahbarlik fazilatlari va bilimdon tadbirkorligi tufayli mazkur korxonada faoliyat yuritayotgan har bir mutaxassis oʻz sohasining ustasi. Masalan, sartarosh Shuhrat Bozorboyev Oʻzbekiston Sartaroshlar Assotsiatsiyasi koʻrgazmasida ishtirok etib, 3-oʻringa sazovor boʻlgan. Bugungi kunda Tursunboy otaning nevarasi Asadbek ham sartaroshlik sohasida mehnat qilib, bobosi kabi xalqimizga xizmat qilmoqda. Shu bilan birga, Asadbek har bir ishni pishiq-puxta bajarishga intiladi va jamiyatning ijrochi direktori sifatida ham faoliyat olib bormoqda.

Tursunboy ota — hayotda soddadil, samimiy, oʻz ishining puxta mutaxassisi, masʼuliyatli va xalqchil inson sifatida yurtdoshlarimiz mehrini qozongan. U mehnatsevarlik, shukronalik va haqgoʻylikni inson tabiatidagi eng ulugʻ fazilatlar deb biladi. “Shukr qilmaydigan, mehnatdan qochadigan insonni hech qachon tushunmayman”, degan soʻzlari uning hayotga, odamlarga boʻlgan munosabatini yaqqol aks ettiradi. Yana, qahramonimiz oʻz taʼbiri bilan aytganda: “Tuyani hazm qilib ham ishtahasi bosilmaydigan kimsalarni jamiyatni kemiruvchi illat deb biladi”.

Tursunboy ota — nafaqat tadbirkor, balki sanʼat va adabiyot muxlisi, maʼnaviyat targʻibotchisi sifatida ham keng jamoatchilik orasida tanilgan. Turli davrlarda ijod etgan hofiz va shoirlarning asarlarini tinglab, ulugʻ badiiy merosni asrab-avaylash, uni yosh avlodga tavsiya etish — uning maʼnaviy dunyosida muhim oʻrin tutadi.

U inson doʻst tanlash, insonlarni qadrlash, tinglash, turli yosh va kasb egalari bilan samimiy muloqot qilish, ular bilan chuqur munosabat oʻrnatishda ham ibratli shaxs. Doʻstlari orasida hojilar, yosh sportchilar, hunarmandlar va rahbarlar ham bor. Bu uning har sohada bilimdon va samimiy inson ekanligini koʻrsatadi.

Saxovatpeshalik ham Tursunboy ota Ahmedov siymosida namoyon boʻladigan muhim fazilatlardan. Muhtoj insonlarga kishi bilar-bilmas qoʻlidan kelgan yordamini ayamaydi. 2020-yilda — koronovirus infektsiyasi keng tarqalgan davrda Umra ziyorati uchun jamgʻargan mablagʻini ehtiyojmand insonlar koʻnglini obod qilish yoʻlida ehson qilgani ham uning qalbi keng, yuragi mehrga toʻla inson ekanini tasdiqlaydi.

Tursunboy ota mamlakatda olib borilayotgan islohotlarga befarq emas. Yangiliklarni diqqat bilan kuzatadi, qoʻllab-quvvatlaydi. Zamon bilan hamnafas, xalq dardi bilan yashaydi, yurt roziligini ulugʻ maqsad deb biladigan fidoyi insonlardan biri hisoblanadi.

Tursunboy otaning halol mehnati va fidoyiligi bilan yaratgan umr bogʻi bugun oʻz mevasini bermoqda. Bu bogʻdan nafaqat farzandlari, nevara-chevaralari, shogirdlari va doʻstlari, balki butun el bahramand boʻlmoqda. Undan tarbiya olgan oʻgʻil-qizlari, taʼlim olgan shogirdlari, uning yoʻl-yoʻriqlari bilan faoliyatini yuksak choʻqqilarga olib chiqqan tadbirkorlar bu bogʻning bunyodkori va bogʻbonidan bir umr minnatdorlar. Uni tangan, suhbatidan bahra olgan, tajribasidan oʻrganish baxtiga muyassar boʻlgan har bir inson, albatta, ruhlanadi, ibrat oladi.

Shunday nurli hayotni barpo etgan, atrofidagilarga ezgulik ulashgan, oʻz umrini xalq xizmatiga bagʻishlagan Tursunboy Ahmedovga yana ming oy umr tilaymiz!

Shohzod Qurbonboyev.