Жайхун илҳомлари

Ҳаёт фалсафаси

Дунёнинг ишлари тўқсон-у тўққиз,

Ҳеч қачон, ҳеч вақт у бўлмаган юз.

Қўлингда арабий тақдир хати бор,

Чап қўлда саксон бир, ўнгда ўн саккиз,

Иккисин қўшиб кўр, бўлар бир кам юз.

Баъзилар бойликнинг изидан кетди,

Қаноат фазилатин улар унутди.

Дунёнинг бойлиги қўлида бўлган,

Сулаймон ҳам  дунёдан қўли бўш кетди.

Яратган Аллоҳни Бир-у Бор бил,

Берган неъматига шукроналар қил.

Шукр қилсанг яна бераверади,

Шукр қилмасанг гар, нени беради.

Ёмон ва яхшилик бесамар кетмас,

Яхшилар олажак ажр-савобин.

Бу дунё ишлари ҳисоб-китобли,

Ким ёмон, у дунё олар жазосин.

Барака бўлади ҳамжиҳатликда,

Оғзи ола ерда чиқади низо.

Қарс – икки қўлдан, биридан чиқмас,

Оғизлар бирлигин севади Худо.

"Бисмиллоҳ", деб айтиб, егил таомни,

Таомдан сўнг айт "Алҳамдулиллаҳ"ни.

"Бисмиллоҳ" сўзида бордир барака,

Шукроналик бор "Алҳамдулиллаҳ"да.

Одил Оллоёров.

Дунё қизиқ экан...

Бу беш кунлик дунё кимлардан қолмас,

Синов дафтарига кимлар ёзилмас.

Дунё гўзал, дунё гаштли шунчалар,

Дарё тўлқинидай бир текис эмас.

Гоҳ хаёлан келажакнинг йўлларин,

Текислаймиз гоҳо ўр ва қирларин.

Дунё баъзан беоқибат шунчалар,

Кутмаганда отар чақир тошларин.

Гоҳо мунғаямиз ҳаётдан безиб,

Салгина аччиқ сўз юракка тегиб.

Дунё бир тугундир, ечмоқ имконсиз,

Яхши-ёмон қалам ётар беллашиб.

Ер думалоқ олти қитъаси билан,

Океан, денгиз, юрт – қалъаси билан.

Минг битта қиррали экан бу дунё,

Инсон яшар золим, сараси билан.

Уч юз олтмиш беш кун – бир йиллик йўлда,

Тўрт арава судрар об-ҳавони.

Дунё сирларига тутганча елка,

Тўрт фасл айланар минг хил маъвони.

Тонг отар, кун ботар Аллоҳ қудрати,

Ҳаёт асли унинг улуғ неъмати.

Инсонга куч берган ва умр берган,

Дунё гўзаллиги – Ҳақнинг санъати.

Онадан туғилиб, ақл кирганда,

Ҳаётга мустақил қадам қўйганда.

Барча йўллар бизга кулиб боққанда,

“Чида”, деб бу дунё синовин бошлар.

Умр! Қатъий низом билан бошқарар –

Она табиатнинг ўз қонуни бор.

Яшамоқ сурури дилни ўстирар,

Худойимнинг амри мангу устувор.

Дақиқалардан то асрга қадар,

Вақтнинг ҳукми устун эрур ҳар сафар.

Дунё қизиқ, армонлидир шунчалар,

Эртасини билмай яшар инсонлар.

Лиза ҚАЛМУРАТОВА, Назархон овули.