Jayxun ilhomlari

Hayot falsafasi

Dunyoning ishlari toʻqson-u toʻqqiz,

Hech qachon, hech vaqt u boʻlmagan yuz.

Qoʻlingda arabiy taqdir xati bor,

Chap qoʻlda sakson bir, oʻngda oʻn sakkiz,

Ikkisin qoʻshib koʻr, boʻlar bir kam yuz.

Baʼzilar boylikning izidan ketdi,

Qanoat fazilatin ular unutdi.

Dunyoning boyligi qoʻlida boʻlgan,

Sulaymon ham  dunyodan qoʻli boʻsh ketdi.

Yaratgan Allohni Bir-u Bor bil,

Bergan neʼmatiga shukronalar qil.

Shukr qilsang yana beraveradi,

Shukr qilmasang gar, neni beradi.

Yomon va yaxshilik besamar ketmas,

Yaxshilar olajak ajr-savobin.

Bu dunyo ishlari hisob-kitobli,

Kim yomon, u dunyo olar jazosin.

Baraka boʻladi hamjihatlikda,

Ogʻzi ola yerda chiqadi nizo.

Qars – ikki qoʻldan, biridan chiqmas,

Ogʻizlar birligin sevadi Xudo.

"Bismilloh", deb aytib, yegil taomni,

Taomdan soʻng ayt "Alhamdulillah"ni.

"Bismilloh" soʻzida bordir baraka,

Shukronalik bor "Alhamdulillah"da.

Odil Olloyorov.

Dunyo qiziq ekan...

Bu besh kunlik dunyo kimlardan qolmas,

Sinov daftariga kimlar yozilmas.

Dunyo goʻzal, dunyo gashtli shunchalar,

Daryo toʻlqiniday bir tekis emas.

Goh xayolan kelajakning yoʻllarin,

Tekislaymiz goho oʻr va qirlarin.

Dunyo baʼzan beoqibat shunchalar,

Kutmaganda otar chaqir toshlarin.

Goho mungʻayamiz hayotdan bezib,

Salgina achchiq soʻz yurakka tegib.

Dunyo bir tugundir, yechmoq imkonsiz,

Yaxshi-yomon qalam yotar bellashib.

Yer dumaloq olti qitʼasi bilan,

Okean, dengiz, yurt – qalʼasi bilan.

Ming bitta qirrali ekan bu dunyo,

Inson yashar zolim, sarasi bilan.

Uch yuz oltmish besh kun – bir yillik yoʻlda,

Toʻrt arava sudrar ob-havoni.

Dunyo sirlariga tutgancha yelka,

Toʻrt fasl aylanar ming xil maʼvoni.

Tong otar, kun botar Alloh qudrati,

Hayot asli uning ulugʻ neʼmati.

Insonga kuch bergan va umr bergan,

Dunyo goʻzalligi – Haqning sanʼati.

Onadan tugʻilib, aql kirganda,

Hayotga mustaqil qadam qoʻyganda.

Barcha yoʻllar bizga kulib boqqanda,

“Chida”, deb bu dunyo sinovin boshlar.

Umr! Qatʼiy nizom bilan boshqarar –

Ona tabiatning oʻz qonuni bor.

Yashamoq sururi dilni oʻstirar,

Xudoyimning amri mangu ustuvor.

Daqiqalardan to asrga qadar,

Vaqtning hukmi ustun erur har safar.

Dunyo qiziq, armonlidir shunchalar,

Ertasini bilmay yashar insonlar.

Liza QALMURATOVA, Nazarxon ovuli.