ҲОКИМ ЁРДАМЧИСИ АҲОЛИНИНГ МУНОСИБ ҲАЁТ КЕЧИРИШИГА ИНТИЛМОҚДА

Президентимизнинг 2021 йил 3 декабрда “Маҳаллада тадбиркорликни ривожлантириш, аҳоли бандлигини таъминлаш ва камбағалликни қисқартириш масалалари бўйича ҳоким ёрдамчилари фаолиятини ташкил этиш чора-тадбирлари тўғрисида”ги Қарорига мувофиқ Амударё туманининг овул ва маҳаллаларида иш бошлаган ҳоким ёрдамчилари ҳам ҳудудларда ишсиз аҳоли бандлигини таъминлаш, янги иш ўринлари яратиш, тадбиркорлик фаолиятини қўллаб-қувватлаш ҳамда уларга муносиб шароитлар яратишда муҳим роль ўйнамоқдалар.

Улар ўзлари хизмат олиб бораётган овул ва маҳаллаларда ҳар бир хонадонга ташриф буюриб, мавжуд ҳолатни ўрганган ҳолда аҳолига амалга оширилаётган давлат сиёсати ва ислоҳотларнинг мазмун-моҳиятини тушунтирмоқда, аниқланган муаммоларни жойида ҳал қилиш чораларини кўрмоқда.

Шунингдек, ҳоким ёрдамчилари аҳолини, хусусан, ишсиз ёшларни тадбиркорлик фаолиятига жалб қилиб, уларнинг бандлигини таъминлашга ва доимий даромад манбаига эга бўлишларига кўмаклашмоқдалар. Қолаверса, улар томорқалардан унумли фойдаланишни, уй шароитида деҳқончилик, чорвачилик, паррандачилик, асаларичилик, гулчилик каби фаолият турларини йўлга қўйишни тарғиб қилмоқдалар.

Туманнинг Юқори қишлоқ маҳалласида иш олиб бораётган ҳоким ёрламчиси Дониёр Худойқулов ўз фаолиятини фуқаролар йиғини раиси, ёшлар етакчиси, аёл-қизлар фаоли билан ҳамжиҳатликда хонадонларга бирма-бир ташриф буюриб, хатловдан ўтказишдан бошлади. Хатлов натижаларига кўра аҳоли 4 та тоифага бўлиб олинди ва натижаларга қараб улар билан ишлашиш тартиби белгиланди.

Маҳаллада ўрганишлар туфайли 68 та хонадонда яшовчилар оилавий даромади кам, ишсиз аъзолари бор ва бирон фаолият тури билан шуғулланиш истагида юргани, 270 та хонадонда яшовчилар эса доимий даромадга эга бўлиб, уларнинг ҳам қўшимча даромад топиш истаги бор эканлигини аниқланди. Шунингдек, 19 хонадонда ногиронлиги бор, бемор, боқувчисини йўқотган ва ижтимоий ҳимояга муҳтож бўлган, 128 та хонадонда эса иқтисодий аҳволи яхши бўлган аҳоли яшаши маълум бўлди.

Ҳоким ёрдамчиси маҳалладаги ҳар бир оиланинг ўзига тўқ, фаровон яшашига эришишни асосий мақсад қилиб олди. Унинг кўмаги билан шу кунгача аниқланган 111 нафар ишсиз фуқародан 73 нафарининг бандлигининг таъминланди. 53 нафар фуқаронинг маҳалла дастури орқали 781 миллион сўмлик кредит олишига кўмаклашилди. Уларнинг 2 нафари балиқчилик, 3 нафари қўйчилик билан шуғулланмоқда, бошқалари ҳам қишлоқ хўжалигининг турли соҳаларида фаолият бошлади.

Шунингдек, маҳаллада яшовчи Давронбек Хўжамуродов “Ҳар бир оила – тадбиркор” дастури бўйича 31 миллион сўм кредит олиб, балиқчилик фаолиятини йўлга қўйган бўлса, Мухтор Ишметов ушбу дастур асосида иккиламчи йўналиши учун 5 миллион сўм кредит олиб, тадбиркорлик фаолиятини кенгайтирди.

Аҳоли турмуш фаровонлигини оширишнинг муҳим шарти – бандликдир. Шу маънода олиб қарайдиган бўлсак, Юқори қишлоқ маҳалласида тадбиркорликни ривожлантириш, камбағалликни қисқартириш ва аҳоли бандлигини таъминлаш бўйича ҳоким ёрдамчиси Дониёр Худойқуловнинг олиб бораётган саъй-ҳаракатлари ҳам келгусида ўзининг ижобий натижаларини беришига шубҳа йўқ.

Ойгул РАЖАБОВА.