HOKIM YoRDAMChISI AHOLINING MUNOSIB HAYoT KEChIRIShIGA INTILMOQDA

Prezidentimizning 2021-yil 3-dekabrda “Mahallada tadbirkorlikni rivojlantirish, aholi bandligini taʼminlash va kambagʻallikni qisqartirish masalalari boʻyicha hokim yordamchilari faoliyatini tashkil etish chora-tadbirlari toʻgʻrisida”gi Qaroriga muvofiq Amudaryo tumanining ovul va mahallalarida ish boshlagan hokim yordamchilari ham hududlarda ishsiz aholi bandligini taʼminlash, yangi ish oʻrinlari yaratish, tadbirkorlik faoliyatini qoʻllab-quvvatlash hamda ularga munosib sharoitlar yaratishda muhim rol oʻynamoqdalar.

Ular oʻzlari xizmat olib borayotgan ovul va mahallalarda har bir xonadonga tashrif buyurib, mavjud holatni oʻrgangan holda aholiga amalga oshirilayotgan davlat siyosati va islohotlarning mazmun-mohiyatini tushuntirmoqda, aniqlangan muammolarni joyida hal qilish choralarini koʻrmoqda.

Shuningdek, hokim yordamchilari aholini, xususan, ishsiz yoshlarni tadbirkorlik faoliyatiga jalb qilib, ularning bandligini taʼminlashga va doimiy daromad manbaiga ega boʻlishlariga koʻmaklashmoqdalar. Qolaversa, ular tomorqalardan unumli foydalanishni, uy sharoitida dehqonchilik, chorvachilik, parrandachilik, asalarichilik, gulchilik kabi faoliyat turlarini yoʻlga qoʻyishni targʻib qilmoqdalar.

Tumanning Yuqori qishloq mahallasida ish olib borayotgan hokim yorlamchisi Doniyor Xudoyqulov oʻz faoliyatini fuqarolar yigʻini raisi, yoshlar yetakchisi, ayol-qizlar faoli bilan hamjihatlikda xonadonlarga birma-bir tashrif buyurib, xatlovdan oʻtkazishdan boshladi. Xatlov natijalariga koʻra aholi 4 ta toifaga boʻlib olindi va natijalarga qarab ular bilan ishlashish tartibi belgilandi.

Mahallada oʻrganishlar tufayli 68 ta xonadonda yashovchilar oilaviy daromadi kam, ishsiz aʼzolari bor va biron faoliyat turi bilan shugʻullanish istagida yurgani, 270 ta xonadonda yashovchilar esa doimiy daromadga ega boʻlib, ularning ham qoʻshimcha daromad topish istagi bor ekanligini aniqlandi. Shuningdek, 19 xonadonda nogironligi bor, bemor, boquvchisini yoʻqotgan va ijtimoiy himoyaga muhtoj boʻlgan, 128 ta xonadonda esa iqtisodiy ahvoli yaxshi boʻlgan aholi yashashi maʼlum boʻldi.

Hokim yordamchisi mahalladagi har bir oilaning oʻziga toʻq, farovon yashashiga erishishni asosiy maqsad qilib oldi. Uning koʻmagi bilan shu kungacha aniqlangan 111 nafar ishsiz fuqarodan 73 nafarining bandligining taʼminlandi. 53 nafar fuqaroning mahalla dasturi orqali 781 million soʻmlik kredit olishiga koʻmaklashildi. Ularning 2 nafari baliqchilik, 3 nafari qoʻychilik bilan shugʻullanmoqda, boshqalari ham qishloq xoʻjaligining turli sohalarida faoliyat boshladi.

Shuningdek, mahallada yashovchi Davronbek Xoʻjamurodov “Har bir oila – tadbirkor” dasturi boʻyicha 31 million soʻm kredit olib, baliqchilik faoliyatini yoʻlga qoʻygan boʻlsa, Muxtor Ishmetov ushbu dastur asosida ikkilamchi yoʻnalishi uchun 5 million soʻm kredit olib, tadbirkorlik faoliyatini kengaytirdi.

Aholi turmush farovonligini oshirishning muhim sharti – bandlikdir. Shu maʼnoda olib qaraydigan boʻlsak, Yuqori qishloq mahallasida tadbirkorlikni rivojlantirish, kambagʻallikni qisqartirish va aholi bandligini taʼminlash boʻyicha hokim yordamchisi Doniyor Xudoyqulovning olib borayotgan saʼy-harakatlari ham kelgusida oʻzining ijobiy natijalarini berishiga shubha yoʻq.

Oygul RAJABOVA.