Сенатнинг 29-ялпи мажлисида қабул қилинган қонун ҳужжатларининг мазмун-моҳиятини тушунтиришга бағишланган йиғилиш бўлиб ўтди

Жорий йилнинг 4–5 август кунлари Тошкент шаҳрида Ўзбекистон Республикаси Олий Мажлиси Сенатининг йигирма тўққизинчи ялпи мажлиси бўлиб ўтган эди. Ялпи мажлисда 14 та масала, шу жумладан 6 та қонун лойиҳаси кўриб чиқилиб, сенаторлар томонидан қизғин муҳокама қилинди.

 11 август куни Амударё тумани ҳокимлигининг мажлислар залида Сенатнинг мазкур ялпи мажлисида кўриб чиқилган масалалар, муҳокама қилинган қонун лойиҳаларининг мазмун-моҳиятини тушунтириш ва жамоатчилик назоратини йўлга қўйиш бўйича йиғилиш бўлиб ўтди.

Йиғилишда Ўзбекистон Республикаси Олий Мажлиси Сенатининг Оролбўйи минтақасини ривожлантириш масалалари қўмитаси раиси, сенатор Борий Алиханов, туман ҳокими Султонбой Йўлдашев ҳамда тумандан сайланган Қорақалпоғистон Республикаси Жўқорғи Кенгеси депутатлари, Халқ депутатлари туман Кенгаши депутатлари, сектор раҳбарлари, ҳоким ўринбосарлари ҳамда тегишли корхона ва ташкилот раҳбарлари, оммавий ахборот воситалари вакиллари иштирок этишди.

Йиғилишни туман ҳокими Султонбой Йўлдашев очди ва олиб борди.

Дасталаб, сенатор Борий Алиханов ялпи мажлис давомида кўриб чиқилган масалалар юзасидан маъруза қилди. Сенатор жамият тараққиёти, мамлакат ривожи қонун устуворлиги билан кафолатланиши, ҳар қандай глобал шароитда, ҳар қандай вазиятда инсон ҳуқуқ ва манфаатларини таъминлаш, иқтисодий барқарорликни сақлаб қолиш, ижтимоий ҳимояни кучайтириш, ёш авлод тарълим-тарбиясига янада жиддий эътибор қаратиш муҳим вазифалардан саналишини таъкидлади.

Шундан сўнг сенатор “Давлат қарзи тўғрисида”ги Қонун лойиҳасининг мазмун-моҳиятига тўхталиб ўтди.

Қайд этилганидек, Қонун билан давлат қарзи ва унга хизмат кўрсатиш харажатларининг устуворлиги, давлат қарзининг чекланган ҳажмлари, давлат ҳокимияти ва бошқарув органларининг давлат қарзини бошқаришдаги ваколатларни белгилаш кўзда тутилган. “Давлат қарзи тўғрисида”ги ахборотнинг очиқлиги ва ва шаффофлигини таъминлашга қаратилган Қонун сенаторлар томонидан маъқулланган.

Йиғилиш давомида сенатор “Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида”ги Қонуннинг мазмун моҳияти ҳақида ҳам батафсил тушунтириш бериб ўтди.

Қонунда Ўзбекистон Республикасининг “Маҳаллий давлат ҳокимияти тўғрисида”ги, “Ички ишлар органлари тўғрисида”ги ва “Маъмурий қамоқни ўташ тартиби тўғрисида”ги қонунларига ҳамда Маъмурий жавобгарлик тўғрисидаги кодексига ўзгартиш ва қўшимчалар киритиш назарда тутилган.

Йиғилиш қатнашчилари кун тартибида кўриб чиқилган масалалар юзасидан ўз фикр ва мулоҳазаларини билдирди. Шунингдек, ўзларини қизиқтирган саволлар билан сенаторга мурожаат қилиб, тегишлича жавоблар олди.

Шу ўринда айтиш керакки, Олий Мажлис Сенатининг йигирма тўққизинчи ялпи мажлисида кўриб чиқилган қонун лойиҳаларининг ҳуқуқий асосини такомиллаштиришга оид бир қатор масалалар билан кенг жамоатчилик вакилларини таништириш ҳамда уларнинг фикрларини ўрганиш жамиятмиздаги ҳар бир фуқаронинг мамлакатимизда рўй бераётган муҳим сиёсий жараёнларга ўз муносабатини билдириб, фаол иштирок этишида муҳим омил бўлиб хизмат қилаётир.

Туман ҳокимлигининг Ахборот хизмати.