Дурунки маҳалласида 3-сектор раҳбари, туман ИИБ бошлиғининг сайёр қабули бўлиб ўтди

Аҳоли билан доимий мулоқот қилиш, фуқароларни қийнаётган муаммоларни ҳал этишнинг самарали механизми ва усуллари жорий этилгани мамлакатимизда амалга оширилаётган ислоҳотларнинг устувор йўналишига айланди. Одамларнинг дардини эшитиш, оғирини енгил қилиш юртдошларимизнинг адолатга, давлатга бўлган ишончини мустаҳкамлашга хизмат қилаётир.

Хусусан, секторлар раҳбарлари ва мутасадди идора, ташкилот вакиллари томонидан мурожаатларни жойига чиққан ҳолда, сайёр қабуллар орқали тинглаш амалиёти кенг йўлга қўйилганлиги халқимизнинг давлат идораларига нисбатан ишончинининг янада ортишига сабаб бўлмоқда.

Яқинда Амударё туманининг Дурунки маҳалла фуқаролар йиғинида навбатдаги сайёр қабул бўлиб ўтди.

Унда 3-сектор раҳбари, туман Ички ишлар бўлими бошлиғи, Жамаладдин Юсупов, туман Халқ қабулхонаси бўлими мудири Эркин Ражабов, тегишли ташкилот масъуллари ҳамда овул ҳудудида истиқомат қилувчи 26 нафар фуқаро иштирок этишди.

Аҳоли билан мулоқот жараёнида фуқаролардан ички ишлар органларига ҳамда расмий сайтларга келиб тушаётган саволлар ва мурожаатлар таҳлили орқали бугунги кундаги долзарб мавзулар аниқлаб олинди.

Сайёр қабулда дастлаб туман Ички ишлар бўлими бошлиғи Жамаладдин Юсупов маҳаллаларда фаолият олиб бораётган маҳалла раиси, ҳоким ёрдамчиси, ёшлар етакчиси, хотин-қизлар фаоли аҳоли муаммолари билан ишлашда “хонадонбай” ва “маҳаллабай” ишлашлари лозимлиги ҳар бир фуқаро билан якка тартибда мулоқот қилиб, уларнинг муаммо ва таклифларини ўрганиш, ҳал қилиниш зарурлигини, мушкул бўлган мурожаатларни сектор раҳбари билан биргаликда ҳал этиш чоралари кўрилишини маълум қилди.

Шунингдек, вояга етмаганлар ўртасида жиноятчилик ва ҳуқуқбузарликнинг олдини олиш, тарбияси оғир ёшлар билан ишлашиш бўйича ўз тавсияларини бериб ўтди.

Туман Халқ қабулхонаси мудири Эркин Ражапов эса мурожаатлар ҳеч қачон эътибордан четда қолмаслигини, иложи борича ижобий ечим топишини таъкидлади.

Шунингдек, ёшлар учун, умумун туманимизда истиқомат қилаётган ҳар бир фуқаро учун, туман Халқ қабулхонаси эшиклари доимо очиқлиги, ҳар бир фуқаро ўз муаммолари билан бемалол мурожаат қилишлари мумкинлигини айтиб ўтди.

Сайёр қабул давомида фуқаролар томонидан турли мазмундаги 11 та мурожаат келиб тушди.

Келиб тушган ҳар бир мурожаат атрофлича ўрганилиб, тегишли соҳавий ташкилот раҳбарларига йўналтирилди ҳамда ўз вақтида, адолатли ва холис кўриб чиқиш юзасидан аниқ топшириқлар берилди.

Бундай учрашувларнинг ўтказилиши аҳолининг турмуш фаровонлигини янада яхшилаш, энг муҳими муаммоларни ижобий ҳал этиш орқали халқни рози қилиш учун хизмат қилиши билан алоҳида аҳамият касб этади.

Туман ҳокимлигининг Ахборот хизмати.