Босув маҳалласида туман ҳокимининг ёшлар билан навбатдаги учрашуви бўлиб ўтди

8 сентябрь куни Босув маҳалла фуқаролар йиғини ҳудудида жойлашган 26-сонли умумтаълим мактаби биносида навбатдаги “Ҳоким ва ёшлар учрашуви” бўлиб ўтди.

Учрашувда туман ҳокими Султонбой Йўлдашев, туман Халқ қабулхонаси бўлими мудири Эркин Ражабов, тегишли ташкилот масъуллари ҳамда маҳалланинг 40 дан зиёд фаол ёшлари иштирок этишди.

 Учрашувда дастлаб туман ҳокими Султонбой Йўлдашев ёшларга Ўзбекистон Республикаси Президенти томонидан жорий йил 31 август куни имзоланган “Қорақалпоғистон Республикасида тадбиркорлик, инновацион технологиялар ва инфратузилмаларни жадал суръатларда ривожлантириш орқали аҳоли фаровонлигини оширишнинг қўшимча чора-тадбирлари тўғрисида”ги Фармоннинг мазмун-моҳияти ҳақида тушинтиришлар берди.

Фармоннинг ёшларга оид банди, яъни 2022-2023 ўқув йили учун Қорақалпоғистон Республикасида умумий ўрта, ўрта-махсус ва профессионал таълим муассасаларини тамомлаган 500 нафар, кейинги ўқув йиллари учун эса ҳар йили 1 сентябрга қадар 6 500 нафар ёшларнинг вилоятлардаги давлат олий таълим муассасаларига қўшимча қабул параметрлари асосида ўқишга қабул қилиниши Қорақалпоғистонлик ёшлар учун катта имконият эканлигини таъкидлади.

Шундан сўнг туман Халқ қабулхонаси бўлими мудири Эркин Ражабов ёшларга яратилаётган шароитлар, имкониятлар ҳақида гапириб, кўпроқ илм олишга, ҳунар ўрганишга чақирди. Учрашувда маҳалланинг ёшлар етакчиси фаолиятининг натижадорлигига ҳам эътибор қаратилди.

Туман ҳокимининг ёшлар билан бўлиб ўтган самимий ва очиқ мулоқоти ёшларга ўзгача куч ва ғайрат бағишлади. Учрашувда ёшлардан контракт тўловининг қоплаб берилиши, тадбиркорлик учун объект берилиши ва табиий газ билан боғлиқ масалалар бўйича мурожаатлар келиб тушди.

Мурожаатларнинг 1 тасига шу ернинг ўзида тушунтириш берилиб, 2 таси бўйича ўрганиш ишларини олиб бориш ҳамда ҳал этиш Ёшлар ишлари агентлиги туман бўлими бошлиғи Сардор Исмаиловнинг зиммасига юклатилди.

Бугун юртимизда униб-ўсаётган ҳар бир ёш авлод Ўзбекистоннинг порлоқ келажагидир. Олдимиздаги турган эзгу мақсадларимиз-мамлакатимизнинг буюк келажаги хам, эртанги кунимиз, эркин ва фаравон ҳаётимиз хам, Ўзбекистоннинг ХХI асрда жаҳон ҳамжамиятида қандай ўрин эгаллаши ҳам авваламбор ёш авлод, униб-ўсиб келаётган фарзандларимиз қандай инсонлар бўлиб вояга етишига боғлиқдир.

Шундай экан, уларни қўллаб-қувватлаш, қобилиятларини рўёбга чиқариш, бугунги куннинг муҳим ва долзарб вазифасидир.

 Туман ҳокимлигининг Ахборот хизмати.