Амударё тумани ҳокими Султонбой Йўлдашевнинг 1 октябрь – Ўқитувчи ва мураббийлар куни муносабати билан барча устоз ва муаллимларга байрам табриги

Муҳтарам устоз ва мураббийлар! Қадрли фахрийлар!

Аввало, Сиз, азизларни, сиз орқали таълим-тарбия соҳасининг барча жонкуяр ходимларини умумхалқ байрами — Ўқитувчи ва мураббийлар куни билан чин қалбимдан самимий табриклайман!

Ушбу қутлуғ айёмда Сиз – азиз устоз ва муаллимларга кўнглимизда, юрагимизда бўлган юксак ҳурмат-эҳтиром ва эзгу тилакларни сўз билан ифода этиш қийин, албатта. Чунки Сиз ҳаёт йўлларимизни ёритувчи, инсониятга илм зиёсини тарқатувчи мўътабар инсонларсиз. Биз ким бўлмайлик, қайси соҳада ишламайлик, Сизнинг қаршингизда бош эгиб, таъзим қиламиз!

Қадрли устозлар ва мураббийлар!

Мамлакатимизда сўнгги йилларда илм-фан ва таълим-тарбия соҳасини давлат сиёсатининг устувор йўналишига айлантиришга қаратилган, оилада фарзанд туғилганидан бошлаб, камолот ёшига етгунга қадар уни ҳар томонлама қўллаб-қувватлайдиган, ҳаётда муносиб ўрин топишига хизмат қиладиган яхлит ва узлуксиз тизим яратилди.

Ҳурматли Президентимиз бу жараёнда инсон капиталига эътиборни янада кучайтириш, бунинг учун барча имкониятларни сафарбар этиш борасида муҳим дастур ва лойиҳаларни амалга оширмоқда.

Бу каби ислоҳотлар Амударё туманида ҳам ўз аксини топиб, ижобий самараларини бермоқда.

Масалан, бундан 5 йил олдин туманда 37 та боғча фаолият юритиб, болаларни мактабгача таълим билан қамраб олиш кўрсаткичи 25,7 фоизни ташкил этган бўлса, ҳозирги кунда бундай муассасалар сони 123 тага, тизимдаги қамров даражаси салкам 71 фоизга етди.

Туманимиздаги мавжуд 85 та умумий ўрта таълим мактабларида 38 минг 496 нафар ўқувчилар сифатли таълим-тарбия олишмоқда. Ўқувчиларга янада қулай шароитлар яратиш мақсадида биргина жорий йилда 55-сонли мактабга 330 ўринли, 76-сонли мактабга 360 ўринли, 14-, 18-, 36- ва 69-сонли мактабларнинг ҳар бирига 180 ўринли қўшимча бинолар қурилмоқда.

Таълим соҳасига берилаётган эътиборнинг самараси сифатида якунланган ўқув йилида 11-синфни битирган 2582 нафар ўқувчидан 2394 нафари олий таълим муассасаларига ҳужжат топшириб, 571 нафари талаба бўлди.

Мамлакатимизда Президент мактаблари, ижод мактаблари, ихтисослашган мактаблар фаолияти йўлга қўйилгани таълим соҳасида муҳим янгилик бўлди. Туманимизда ҳам жорий йилда Президент таълим муассасалари агентлиги тизимидаги Амударё тумани ихтисослаштирилган мактаби дастлабки ўқувчиларини ўз бағрига қабул қилди.

Амударё муҳандислик техникуми, Манғит шаҳри ва Қипчоқ шаҳарчасидаги касб-ҳунар мактаблари ҳам самарали фаолият юритиб, малакали ўқитувчилар ва ишлаб чиқариш таълими усталари замон талабларига мос кадрлар етиштириб чиқариш мақсадида ёшларимизга касб-ҳунар сирларини пухта ўргатмоқдалар.

Ўқувчиларни мактабдан ташқари тўгаракларга жалб қилиш, уларнинг қобилият ва истеъдодларини рўёбга чиқариш борасида туман “Баркамол авлод” болалар мактаби ҳам самарали фаолият юритмоқда. Бугунги кунда ушбу мактабнинг 68 та тўгаракларидаги 139 та гуруҳларга 1668 нафар ўқувчи-ёшлар қамраб олинган.

Тажрибали спорт мураббийлари, малакали тренерлардан спорт сирларини ўрганиб, тўгаракларга қатнаётган ўсмирлар ва ёшларимиз эса бугун улкан натижаларни қўлга киритиб, туманимиз шарафини юксакларга кўтармоқда. Энг муҳими, улар мустаҳкам иродаси ва ғайрат-шижоати билан ёшларимиз орасида соғлом турмуш тарзи тарғиботига муносиб ҳисса қўшмоқдалар.

Юртимизда устоз ва мураббийларга кўрсатилаётган ҳурмат ва эътибор бугун ҳар қачонгидан ҳам юксакдир. Ўқитувчилик касбининг жамиятдаги нуфузини ошириш, уларга қулай меҳнат шароитларини яратиш, иш ҳақларини ошириш, ҳар томонлама қўллаб-қувватлаш борасида тизимли ишлар амалга оширилмоқда.

Яқиндагина имзоланган Президентимизнинг Фармонига кўра байрам арафасида таълим-тарбия тизимида алоҳида ўрнак кўрсатган ходимлардан бир гуруҳи давлат мукофотлари билан тақдирлангани ҳам устоз ва мураббийларимиз фидойи меҳнатларининг эътирофидир. Фармонга мувофиқ туманимиздаги 5-сонли умумий ўрта таълим мактабининг француз тили фани ўқитувчиси Гулбаҳор Саидова II даражали “Соғлом авлод учун” ордени билан мукофотлангани эса амударёлик устоз ва мураббийларнинг меҳнатларига берилган юксак баҳодир.

Фурсатдан фойдаланиб, байрам арафасида Ўзбекистон ҳамда Қорақалпоғистон Республикаларининг давлат мукофотлари, Халқ таълими вазирлигининг фахрий нишонлари билан мукофотланган фидойи ўқитувчиларни муборакбод этамиз.

Қадрли устозлар!

Бизнинг асосий мақсадимиз – дунёдаги тараққий топган демократик давлатлар қаторига кириш, халқимиз учун эркин ва фаровон ҳаёт қуришдан иборат экан, бу вазифани шараф билан уддалайдиган билимли ва истеъдодли, ҳеч кимдан кам бўлмаган навқирон авлодни тарбиялашда фидойи ўқитувчи ва мураббийларнинг ўрни алоҳида.

Шундай экан, ёш авлодга илм ва фан, касб ҳамда ҳунар сирларини ўргатаётган, таълим ва тарбия бераётган Сиз азиз ва қадрли устозларни, меҳридарё ўқитувчиларни, тарбиячиларни, ишлаб чиқариш таълими усталари, ардоқли мураббийлар ҳамда соҳада узоқ йиллар меҳнат қилиган фахрийларимизни яна бир бора касб байрамингиз – Ўқитувчи ва мураббийлар куни билан табриклайман!

Барчангизга сиҳат-саломатлик, бахту саодат, шарафли ва масъулиятли фаолиятингизда улкан муваффақиятлар тилайман!

Ҳамиша соғ-омон бўлинг, муҳтарам устозлар!