ТУМАНДАГИ НАШРИЁТДА ТАЙЁРЛАНГАН “УММОНДАН ТЕРИЛГАН МАРЖОНЛАР” ТЎПЛАМИНИНГ ТАҚДИМОТИ ЎТКАЗИЛДИ

“Тараққиёт кўзгуси” газетаси таҳририяти ижодий жамоаси ташаббуси билан ташкил этилган “Жайхун илҳомлари” нодавлат нотижорат ташкилоти туманимиздаги ижодкор ёшларни қўллаб-қувватлаб, уларнинг қобилиятларини ривожлантиришга хизмат қилиб келмоқда.

Ташкилот 2021 йилнинг сентябрида Ўзбекистон Республикаси Олий Мажлиси ҳузуридаги нодавлат нотижорат ташкилотларини ва фуқаролик жамиятининг бошқа институтларини қўллаб-қувватлаш жамоат фонди таъсис этган грант танловларида “Ёшлар – Янги Ўзбекистон бунёдкорлари” лойиҳаси билан қатнашиб, ғолиб бўлди ва лойиҳа 2022 йилнинг 31 августигача муваффақиятли амалга оширилди.

Лойиҳа доирасида таълим муассасасаларида, овул, маҳаллаларда учрашув, давра суҳбатлари ўтказилиб, ёшларни гиёҳвандлик, ахлоқсизлик ва ёт ғоялардан ҳимоя қилишга алоҳида эътибор қаратилди, ўқувчи ёшларнинг бўш вақтларини мазмунли ўтказиш мақсадида иншолар танловлари ўтказилиб, ғолиблар рағбатлантирилди. Энг мазмунли ва равон  ёзилган иншолар туман матбуотида ёритилди. Амударё телевидениесида мавзуга доир кўпгина кўрсатувлар эфирга берилди.

Лойиҳа иш режасига мувофиқ туманимизнинг истеъдодли ёш қаламкашларини элга танитиш, уларга ижодий руҳ, рағбат бағишлаш мақсадида туманимиз мактабларида таълим-тарбия олаётган 84 нафар ўқувчиларнинг ижод намуналари жой олган “Уммондан берилган маржонлар” тўплами нашр этилди.

10 октябрь куни 55-сонли мактабда ижодий-маданий ишлар бўйича мактаб тарғиботчиси, Қорақалпоғистонда хизмат кўрсатган маданият ходими, “Баркамол авлод” болалар мактаби директори Хонимжон Ражабова, “Жайхун илҳомлари” нодавлат нотижорат ташкилоти раиси Ўрозали Рейимовлар ташаббуси билан ушбу китоб тақдимоти ўтказилди.

Тадбирда мактаб ўқитувчилари, ўқувчилари иштирок этдилар. Китоб тақдимоти айнан шу мактабда ўтказилгани бежиз эмас. Сабаби, мазкур мактаб ўқувчилари Жасмина Бекимбетова, Маржона Деҳқоноваларнинг шеърлари ҳам тўпламдан жой олган.

Тадбирда бу ҳақда батафсил сўз  юритилди. Маржона Деҳқонова, Жасмина Бекимбетоваларни устозлари, дўстлари қизғин табриклаб, янгидан-янги ижодий муваффақиятлар тиладилар. Жасмина ва Маржона самимий тилаклардан, тенгдошларининг ҳавас билан боқишларидан кўнгиллари қувончга тўлди.

- Бу сизларнинг ижод йўлидаги илк муваффақиятингиз. Ҳали ўқиб, ўрганиб, салоҳиятли қизлар бўлиб камолга етишингизга, машаққатларидан чўчимай сермаҳсул ижод қилишингизга ишонаман, - деди уларга Хонимжон Ражабова.

Мамлакатимизда ёшларнинг чуқур илм олишларига, қобилиятларини намоён этишларига шароит яратилаётганлиги уларнинг олға интилишларига рағбат бўлмоқда.

“Уммондан терилган маржонлар” тўпламида ижод намуналари ёритилган туманимизнинг ёш ижодкорлари келажагида ҳам бунинг исботини кўришимизга шубҳа йўқ. Тўпламга кўпсонли  адабиёт ихлосмандларининг машқлари саралаб олингани рамзи сифатида “Уммондан терилган маржонлар” дея номлангани ҳам бежиз эмас.

Тўплам тақдимоти тадбир иштирокчиларида улкан таассуротлар қолдирди.

Ойгул РАЖАБОВА.