ТИЛ – МИЛЛАТ ТИМСОЛИ
Ўзбек тили туркий тиллар оиласига мансуб бўлиб, ҳозирги кунда Ер юзи аҳолисининг қарийиб 50 миллион аҳолиси учун асосий мулоқот воситасидир. Тил-миллатнинг борлиги, миллат бирлиги ва бутунлигининг тимсолидир. Ҳар қандай халқнинг тарихи ҳам, дунёда ўзининг кимлигини англаш, жамиятнинг келажагини кўриш идроки ҳам шу тимсолга кўра мавжуддир. Бу тимсол барча кишиларимизнинг бир юрт фуқаролари сифатида бирлашувига хизмат қилмоқда. Бу ҳолат табиийки, ўзбек тили ривожининг жадаллашувига, имкониятларининг янада кенгайишига ҳам кўмак бермоқда.
Миллий маънавиятимизнинг ажралмас қисми бўлган она тилимизга 1989 йил 21 октябрь куни давлат тили мақоми берилган. Шу кундан эътиборан ҳар йили бу сана байрам сифатида юртимизнинг турли гўшаларида кўтаринки руҳда нишонланиб келмоқда.
Ўзбек тили мустақил давлатимизнинг байроғи, герби, мадҳияси, Конституцияси қаторида турадиган, қонун йўли билан ҳимоя қилинадиган тимсолларидан бирига айланди. Ўзбек тилига давлат тили мақомининг берилиши бу тилнинг нуфузини оширибгина қолмай, юртимизнинг турли миллатга мансуб фуқаролари ўзбек тилини давлатимизнинг муқаддас тимсоли сифатида ўрганмоқдалар, бу тилда гаплашмоқдалар, унга юксак эҳтиром кўрсатмоқдалар.
Она тили ва адабиёт фани ўқитувчиси сифатида шуни алоҳида эътироф этишим керакки, мактабда ўқувчиларда нутқ маданиятини ривожлантириш ўзбек тили таълимининг асосий вазифаларидан бири саналади. Таълим жараёнида ўқувчиларга нутқда миллий тилнинг ўзига хослиги, маъно жиҳатидан аниқлигига, сўзларни қўллашга эътибор бериши кераклиги доим тушунтириб борилади. Шу билан бирга адабий тилнинг орфоэпик меъёрлари, ёзма шакли, яъни орфография, услуб ва шу каби меъёрлар ҳақида кўникмалар ҳосил қилинади. Нутқ маданияти адабий тил меъёрлари асосида ўқувчиларнинг ақлий ва амалий тушунчаларини кенгайтириш натижасида шаклланади.
Улуғ бобомиз Алишер Навоий “Маҳбуб-ул-қулуб” асарида таъкидлаганидек, “Тил... нутқнинг қуролидир. Агар нутқ номаъқул бўлиб чиқса, тилнинг офатидир”. Миллатимиз қадр-қимматининг бош устуни бўлмиш тилимиз ҳурматини жойига қўйишдай шарафли ишда ҳамиша фаол бўлиш, уни софлигича асраб-авайлаш ҳар биримиз учун ҳам фарз, ҳам қарздир.
Анора Қозоқова, 65-сонли мактабнинг она тили ва адабиёт фани ўқитувчиси.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
