ЖОРИЙ ЙИЛНИНГ ЎТГАН 9 ОЙИДА ТЕЗ ТИББИЙ ЁРДАМ БЎЛИМИ 37744 НАФАР БЕМОРГА ТЕЗ ТИББИЙ ЁРДАМ КЎРСАТДИ

Мамлакатимизда соғлиқни сақлаш тизимини ривожлантириш, фуқароларнинг соғлиқни сақлашга доир ҳуқуқларининг давлат томонидан кафолатланишини таъминлаш, фуқароларда соғлом турмуш тарзини шакллантириш, аҳоли барча қатламларининг тиббий хизматдан фойдаланиши учун шароит яратиш борасида комплекс чора-тадбирлар амалга оширилмоқда.

Соҳада амалга оширилаётган ислоҳотлар тез тиббий ёрдам кўрсатиш сифати яхшиланиши, ҳаёт учун хавф туғдирувчи ҳолатларда беморларга тезкор тиббий ёрдам бериш имконини бераяпти.

Амударё тумани тиббиёт бирлашмасининг тез тиббий ёрдам бўлими туман аҳолисига зарурат туғилганда кеча-ю кундуз узлуксиз тез тиббий ёрдам кўрсатмоқда. Бунинг учун 15 та бригада фаолияти йўлга қўйилган бўлиб, чақирув бўлган ҳудудга энг яқин жойлашган бригада чақирувга тезкор йўналтирилади. Бу амалиёт соғлиғи хавф остида қолган беморга қисқа фурсатда тиббий ёрдам кўрсатилишини таъминлайди.

Чақириқларни қисқа “103” линияси орқали бериш йўлга қўйилган. Диспетчер хонасида манитор ўрнатилган. Бу бўлимнинг барча автомашиналарига сунъий йўлдош орқали кузатув тизими ўрнатилганлиги туфайли ҳаракатланишини онлайн кузатиб бориш имконини беради. Шу тариқа чақирувга тез тиббий ёрдам ходимлари тезкор етиб боради.

Туманимиз аҳолисига тез тиббий ёрдам кўрсатишда 37 нафар асосий ва 54 нафар ўриндош шифокорлар, 141 нафар ўрта тиббиёт ходимлари меҳнат қилишмоқда. Шифокорларнинг 52 нафари малака тоифасига эга. Чақирувга ўз вақтида етиб боришида 15 та автомашиналар хизматидан фойдаланилади. Бўлим реанимобил автомашинаси, умумтармоқ бригадалар машиналари керакли асбоб-ускуналар, жиҳозлар билан таъминланган.

Шунингдек, бўлимда тез тиббий ёрдам кўрсатилиши учун 41 номдаги дори препаратлари билан таъминланган.

Бўлим тиббиёт ходимларининг чақирув бўлганда беморга биринчи тез ва сифатли тиббий ёрдам кўрсатиши учун барча шароитлар яратилган. Бундан унумли фойдаланиб, халқимиз соғлиғини сақлаш йўлида фидойилик билан меҳнат қилмоқдалар.

Жорий йилимизнинг ўтган 9 ойи давомида бўлимимизга 38 минг 5 та мурожаатлар келиб тушди. Шундан 37 минг 741 нафар беморга тез тиббий ёрдам кўрсатилган.

Жами чақириқларнинг 914 таси бахтсиз ҳодисалар, 1909 таси шошилинч чақириқлар, 16337 таси шошилинч бўлмаган чақириқлар, 1472 таси туғруқ ва ҳомиладорлар паталогияси бўйича чақириқлар, 19 таси эса шифохонадан шифохонага ташишларни ташкил этади.

Бўлимда 1889 нафар беморга амбулатор ёрдам кўрсатилди. Ҳар бир чақириққа сарфланган дори-дармон 6416 сўмликдан зиёдни ташкил этади.

Бизнинг бўлимимиз шифокорлари зиммасидаги вазифа жуда масъулиятли: тезкор тиббий ёрдамга муҳтож инсонга аниқ ташхис қўйиб, тез тиббий ёрдам кўрсатиш. Бу йўлда бор куч ва имкониятларимизни сарфлайверамиз.

К.ШАБАЕВ, туман Тиббиёт бирлашмаси тез тиббий ёрдам бўлими мудири.