“БЕШ ТАШАББУС ОЛИМПИАДАСИ”НИНГ 2-МАВСУМИ ТУМАН БОСҚИЧИ ҒОЛИБЛАРИ ТАҚДИРЛАНДИ

Мамлакатимизда алоҳида иқтидорга эга қобилиятли ёшларни қўллаб-қувватлаш, уларнинг қизиқиш ва интилишларини  рағбатлантириш мақсадида Президентимиз ташаббуси билан амалга оширилаётган “Беш ташаббус олимпиадаси” доирасида маданият, санъат, спорт, китобхонлик, ахборот технологиялари йўналишлари бўйича турли хил танлов ва мусобақалар ташкил этилиб, мазкур тадбирларда миллионлаб ёшлар қамраб олинмоқда.

Хусусан, жорий йилнинг апрель-июнь ойлари давомида илк марта ўтказилган “Беш ташаббус олимпиадаси”да 6,2 миллион нафардан ортиқ ёшлар иштирок этиб, 540 нафардан зиёд ёшлар турли танлов ва мусобақаларнинг ғолиблари бўлдилар.

Олимпиаданинг иккинчи мавсуми ҳам ёшларнинг фаол иштироки билан давом этди. Жорий йилнинг 11 ноябрь санасида Президент таълим муассасалари агентлиги тизимидаги Амударё ихтисослаштирилган мактабида “Беш ташаббус олимпиадаси” 2-мавсумининг туман босқичи ғолиблари ва совриндорларини тақдирлаш маросими бўлиб ўтди.

Тақдирлаш маросимида Амударё тумани ҳокими Султонбой Йўлдашев “Беш ташаббус олимпиадаси” доирасида ўтказилаётган танловлар ва спорт мусобақаларининг аҳамияти, ёшлар тарбиясида тутган ўрни ҳақида тўхталиб, олимпиаданинг 2-мавсуми ҳам туманда кўтанринки руҳда ўтказилганини, унда энг иқтидорли ёшлар иштирок этишганини, ёшларнинг ижтимоий фаоллиги тобора ошиб бораётганини қайд этди.

Айтиш керакки, Амударё туманида ҳам “Беш ташаббус олимпиадаси”да маданият, санъат, спорт, китобхонлик ва ахборот технологиялари йўналишлари бўйича ўз иқтидорларини амалда намойиш этиш истагидаги қобилиятли, эпчил, билимдон ва изланувчан ёшлар иштирок этишмоқда. 5 та босқичда – маҳалла, сектор, туман, ҳудуд ва республика миқёсида амалга оширилаётган тадбирларда спорт, маданий-маърифий тадбирларда фаол иштирок этиб, тенгдошлари орасида энг кучли, эпчил, билимдон, дунёқараши кенг, ўз шахсий фикрига эга, изланувчан ва ташаббускор, чаққон эканликларини исботлаган ёшлар дастлабки учта босқичда ғолибликка эришиб, олимпиаданинг туман босқичида ўзаро куч синашдилар.

Амударё туманида мазкур олимпиаданинг 2-мавсуми 3 та босқичи – маҳалла – сектор – туман миқёсида жами 14 та йўналиш бўйича юқори савияда, қизиқарли таассуротларга бой тарзда ўтказилиб, унда 35 минг нафардан зиёд ёшлар иштирок этишди. Иштирокчи ёшлардан 430 нафари ғолиб ва  совриндорлар сафидан жой олдилар.

Тадбирда ғолиб ва совриндор ёшлар туман ҳокими Султонбой Йўлдашев ва секторлар раҳбарлари томонидан 1-2-3-даражали Дипломлар, эсдалик совғалари билан тақдирланди.

“Беш ташаббус олимпиадаси”нинг 2-мавсуми 3-босқичида ўзлари танлаган йўналишлари бўйича энг юқори натижаларга эришган ғолиб иштирокчиларга олимпиаданинг тўртинчи – Қорақалпоғистон Республикаси босқичига йўлланмалар берилди.

Мазкур мусобақалар ёшлар маънавиятини юксалтириш, ижтимоий фаоллигини ошириш, уларни илм-фан, спорт, санъат, маданият, китобхонлик, ахборот технологиялари соҳасига ошно қилиш каби мақсадларда, жами 14 та йўналиш бўйича ўтказилмоқда. Келажагимиз эгаларининг билим ва салоҳиятини ривожлантириш, дунёқарашларини кенгайтиришга қаратилган “Беш ташаббус олимпиадаси” доирасидаги танловлар ва спорт мусобақалари, маънавий-маърифий тадбирлар миллионлаб ёшларни бир эзгу мақсад – Янги Ўзбекистонда янгича фикрлаш, истиқлолни янада мустаҳкамлаш йўлида бирлаштиргани билан муҳим аҳамият касб этмоқда.

Робия ЙЎЛДОШЕВА.