“BESh TAShABBUS OLIMPIADASI”NING 2-MAVSUMI TUMAN BOSQIChI GʻOLIBLARI TAQDIRLANDI

Mamlakatimizda alohida iqtidorga ega qobiliyatli yoshlarni qoʻllab-quvvatlash, ularning qiziqish va intilishlarini  ragʻbatlantirish maqsadida Prezidentimiz tashabbusi bilan amalga oshirilayotgan “Besh tashabbus olimpiadasi” doirasida madaniyat, sanʼat, sport, kitobxonlik, axborot texnologiyalari yoʻnalishlari boʻyicha turli xil tanlov va musobaqalar tashkil etilib, mazkur tadbirlarda millionlab yoshlar qamrab olinmoqda.

Xususan, joriy yilning aprel-iyun oylari davomida ilk marta oʻtkazilgan “Besh tashabbus olimpiadasi”da 6,2 million nafardan ortiq yoshlar ishtirok etib, 540 nafardan ziyod yoshlar turli tanlov va musobaqalarning gʻoliblari boʻldilar.

Olimpiadaning ikkinchi mavsumi ham yoshlarning faol ishtiroki bilan davom etdi. Joriy yilning 11-noyabr sanasida Prezident taʼlim muassasalari agentligi tizimidagi Amudaryo ixtisoslashtirilgan maktabida “Besh tashabbus olimpiadasi” 2-mavsumining tuman bosqichi gʻoliblari va sovrindorlarini taqdirlash marosimi boʻlib oʻtdi.

Taqdirlash marosimida Amudaryo tumani hokimi Sultonboy Yoʻldashev “Besh tashabbus olimpiadasi” doirasida oʻtkazilayotgan tanlovlar va sport musobaqalarining ahamiyati, yoshlar tarbiyasida tutgan oʻrni haqida toʻxtalib, olimpiadaning 2-mavsumi ham tumanda koʻtanrinki ruhda oʻtkazilganini, unda eng iqtidorli yoshlar ishtirok etishganini, yoshlarning ijtimoiy faolligi tobora oshib borayotganini qayd etdi.

Aytish kerakki, Amudaryo tumanida ham “Besh tashabbus olimpiadasi”da madaniyat, sanʼat, sport, kitobxonlik va axborot texnologiyalari yoʻnalishlari boʻyicha oʻz iqtidorlarini amalda namoyish etish istagidagi qobiliyatli, epchil, bilimdon va izlanuvchan yoshlar ishtirok etishmoqda. 5 ta bosqichda – mahalla, sektor, tuman, hudud va respublika miqyosida amalga oshirilayotgan tadbirlarda sport, madaniy-maʼrifiy tadbirlarda faol ishtirok etib, tengdoshlari orasida eng kuchli, epchil, bilimdon, dunyoqarashi keng, oʻz shaxsiy fikriga ega, izlanuvchan va tashabbuskor, chaqqon ekanliklarini isbotlagan yoshlar dastlabki uchta bosqichda gʻoliblikka erishib, olimpiadaning tuman bosqichida oʻzaro kuch sinashdilar.

Amudaryo tumanida mazkur olimpiadaning 2-mavsumi 3 ta bosqichi – mahalla – sektor – tuman miqyosida jami 14 ta yoʻnalish boʻyicha yuqori saviyada, qiziqarli taassurotlarga boy tarzda oʻtkazilib, unda 35 ming nafardan ziyod yoshlar ishtirok etishdi. Ishtirokchi yoshlardan 430 nafari gʻolib va  sovrindorlar safidan joy oldilar.

Tadbirda gʻolib va sovrindor yoshlar tuman hokimi Sultonboy Yoʻldashev va sektorlar rahbarlari tomonidan 1-2-3-darajali Diplomlar, esdalik sovgʻalari bilan taqdirlandi.

“Besh tashabbus olimpiadasi”ning 2-mavsumi 3-bosqichida oʻzlari tanlagan yoʻnalishlari boʻyicha eng yuqori natijalarga erishgan gʻolib ishtirokchilarga olimpiadaning toʻrtinchi – Qoraqalpogʻiston Respublikasi bosqichiga yoʻllanmalar berildi.

Mazkur musobaqalar yoshlar maʼnaviyatini yuksaltirish, ijtimoiy faolligini oshirish, ularni ilm-fan, sport, sanʼat, madaniyat, kitobxonlik, axborot texnologiyalari sohasiga oshno qilish kabi maqsadlarda, jami 14 ta yoʻnalish boʻyicha oʻtkazilmoqda. Kelajagimiz egalarining bilim va salohiyatini rivojlantirish, dunyoqarashlarini kengaytirishga qaratilgan “Besh tashabbus olimpiadasi” doirasidagi tanlovlar va sport musobaqalari, maʼnaviy-maʼrifiy tadbirlar millionlab yoshlarni bir ezgu maqsad – Yangi Oʻzbekistonda yangicha fikrlash, istiqlolni yanada mustahkamlash yoʻlida birlashtirgani bilan muhim ahamiyat kasb etmoqda.

Robiya YOʻLDOShEVA.