Кадастр агентлиги туман бўлими томонидан жорий йилда 105 та ҳолатда 41,28 гектар ер майдонлари фуқаролар томонидан ўзбошимчалик билан эгаллаб олингани аниқланди

2020 йилнинг сентябрь ойида ер ресурслари, геодезия, картография ва давлат кадастри давлат қўмитасининг вазифалари қайта кўриб чиқилди, бунинг натижасида ерларни ҳисобга олиш – ер балансини юритиш ва кадастр соҳасидаги вазифаларни белгилаб берувчи Давлат солиқ қўмитаси ҳузуридаги Кадастр агентлиги ташкил этилди.

Бугунги кунда Кадастр агентлиги асосан 11 турдаги давлат хизматларини тақдим этади. Барча хизматлар Давлат хизматлари марказлари ва ягона интерактив давлат хизматлари портали орқали тақдим этилади. Чунки Кадастр агентлиги томонидан амалга ошириладиган барча ишлар аниқлик ва шаффофликни, очиқликни талаб этади.

Шу боис, агентлик мутахассислари томонидан аҳоли кенг қатлами орасида ер ишлари, кўчмас мулк объектлари хусусидаги ҳуқуқий муносабатлар тўғрисида жойларга чиққан ҳолда тушунтиришлар олиб борилмоқда. Шундай бўлса-да, бу борада муаммолар талайгина. Айниқса, ерни ўзбошимчалик билан эгаллаб олиш, рухсат этилмаган қурилишларни амалга ошириш каби ҳолатлар тез-тез учраб турибди.

Кадастр агентлиги Амударё туман бўлими томонидан жорий йил давомида ерлардан самарали фойдаланиш юзасидан ўтказилган назорат тадбирлари давомида 105 та ҳолатда 41,28 гектар ер майдонлари фуқаролар томонидан ўзбошимчалик билан эгаллаб олингани аниқланди. Шундан 81 та ҳолатда 40,7 гектар қишлоқ хўжалиги ерларидан фуқаролар томорқа сифатида фойдаланиб келганлиги маълум бўлди. Ушбу ҳолатлар бўйича тегишли шахсларга огоҳлантиришлар берилди. Белгиланган муддатда ер майдонлари фуқаролардан қайтариб олиниб, ҳуқуқий оқибатлари бартараф қилинди.

Шунингдек, 24 та ҳолатда ўзбошимчалик билан қурилиш ишларини амалга оширган фуқароларнинг ҳар бирига 45 млн. сўм миқдорда, жами 1 млрд. 80 млн. сўм жарима қўлланилди. 22 та ҳолатда ўзбошимчалик билан қурилган қурилишларни буздириш, ер майдонини олдинги ҳолатига қайтариш бўйича Амударё тумани Фуқаролик ишлари бўйича судига даъво аризалари киритилди. Натижада 2 та ҳолатда фуқаролар ўзбошимчалик билан қурган қурилишни бузиб, ер майдонларини олдинги ҳолатига келтирдилар.

Тушунтириш ишлари натижасида 20 та ҳолатда фуқаролар томонидан Вазирлар Маҳкамасининг тегишли қарори талаблари бузилганлиги аниқланиб, 16 млн. 200 минг сўм миқдорида жарима жазоси қўлланилди.

312 нафар фуқаро Вазирлар Маҳкамасининг тегишли қарори билан белгиланган кўчмас мулкга бўлган ҳуқуқларини давлат рўйхатидан ўтказиш учун ўз вақтида мурожаат қилмаганлиги сабабли 783 млн. 660 минг сўм миқдорида жаримага тортилди.

Кадастр агентлиги туман бўлими мутахассисларининг ниятлари холис, шу боис, буни халқимиз тушуниши, давлатимизнинг ҳар бир қарич ери ҳисобда эканлигини англаган ҳолда, қурилиш ишларини, экин-тикин ишларини қонуний асосда амалга оширишлари шарт. Ана шунда ортиқча чиқим, оворагарчиликларга ҳожат қолмайди. Ўз вақтида, қонуний асосда амалга оширилган ишларнинг самарадорлиги ҳам ортади.

А.САПАРБАЕВ, Кадастр агентлиги Амударё туман бўлими бошлиғи.