Kadastr agentligi tuman boʻlimi tomonidan joriy yilda 105 ta holatda 41,28 gektar yer maydonlari fuqarolar tomonidan oʻzboshimchalik bilan egallab olingani aniqlandi

2020-yilning sentyabr oyida yer resurslari, geodeziya, kartografiya va davlat kadastri davlat qoʻmitasining vazifalari qayta koʻrib chiqildi, buning natijasida yerlarni hisobga olish – yer balansini yuritish va kadastr sohasidagi vazifalarni belgilab beruvchi Davlat soliq qoʻmitasi huzuridagi Kadastr agentligi tashkil etildi.

Bugungi kunda Kadastr agentligi asosan 11 turdagi davlat xizmatlarini taqdim etadi. Barcha xizmatlar Davlat xizmatlari markazlari va yagona interaktiv davlat xizmatlari portali orqali taqdim etiladi. Chunki Kadastr agentligi tomonidan amalga oshiriladigan barcha ishlar aniqlik va shaffoflikni, ochiqlikni talab etadi.

Shu bois, agentlik mutaxassislari tomonidan aholi keng qatlami orasida yer ishlari, koʻchmas mulk obʼektlari xususidagi huquqiy munosabatlar toʻgʻrisida joylarga chiqqan holda tushuntirishlar olib borilmoqda. Shunday boʻlsa-da, bu borada muammolar talaygina. Ayniqsa, yerni oʻzboshimchalik bilan egallab olish, ruxsat etilmagan qurilishlarni amalga oshirish kabi holatlar tez-tez uchrab turibdi.

Kadastr agentligi Amudaryo tuman boʻlimi tomonidan joriy yil davomida yerlardan samarali foydalanish yuzasidan oʻtkazilgan nazorat tadbirlari davomida 105 ta holatda 41,28 gektar yer maydonlari fuqarolar tomonidan oʻzboshimchalik bilan egallab olingani aniqlandi. Shundan 81 ta holatda 40,7 gektar qishloq xoʻjaligi yerlaridan fuqarolar tomorqa sifatida foydalanib kelganligi maʼlum boʻldi. Ushbu holatlar boʻyicha tegishli shaxslarga ogohlantirishlar berildi. Belgilangan muddatda yer maydonlari fuqarolardan qaytarib olinib, huquqiy oqibatlari bartaraf qilindi.

Shuningdek, 24 ta holatda oʻzboshimchalik bilan qurilish ishlarini amalga oshirgan fuqarolarning har biriga 45 mln. soʻm miqdorda, jami 1 mlrd. 80 mln. soʻm jarima qoʻllanildi. 22 ta holatda oʻzboshimchalik bilan qurilgan qurilishlarni buzdirish, yer maydonini oldingi holatiga qaytarish boʻyicha Amudaryo tumani Fuqarolik ishlari boʻyicha sudiga daʼvo arizalari kiritildi. Natijada 2 ta holatda fuqarolar oʻzboshimchalik bilan qurgan qurilishni buzib, yer maydonlarini oldingi holatiga keltirdilar.

Tushuntirish ishlari natijasida 20 ta holatda fuqarolar tomonidan Vazirlar Mahkamasining tegishli qarori talablari buzilganligi aniqlanib, 16 mln. 200 ming soʻm miqdorida jarima jazosi qoʻllanildi.

312 nafar fuqaro Vazirlar Mahkamasining tegishli qarori bilan belgilangan koʻchmas mulkga boʻlgan huquqlarini davlat roʻyxatidan oʻtkazish uchun oʻz vaqtida murojaat qilmaganligi sababli 783 mln. 660 ming soʻm miqdorida jarimaga tortildi.

Kadastr agentligi tuman boʻlimi mutaxassislarining niyatlari xolis, shu bois, buni xalqimiz tushunishi, davlatimizning har bir qarich yeri hisobda ekanligini anglagan holda, qurilish ishlarini, ekin-tikin ishlarini qonuniy asosda amalga oshirishlari shart. Ana shunda ortiqcha chiqim, ovoragarchiliklarga hojat qolmaydi. Oʻz vaqtida, qonuniy asosda amalga oshirilgan ishlarning samaradorligi ham ortadi.

A.SAPARBAYeV, Kadastr agentligi Amudaryo tuman boʻlimi boshligʻi.