ИЧКИ КАСАЛЛИКЛАРГА ИХТИСОСЛАШГАН ЯНГИ “MAFTUNA MED” КЛИНИКАСИНИНГ ОЧИЛИШ МАРОСИМИ БЎЛДИ

Амударёда “MAFTUNA MED MANGIT” МЧЖга қарашли ички касалликларга ихтисослашган хусусий клиника янгидан фаолият бошлади.

23 ноябрь куни Навоий номли маҳаллада жойлашган ушбу клиниканинг очилиши маросими бўлиб ўтди. Тадбирда туман ҳокими ўринбосарлари Рашид Салаев, Маҳмуд Шерметов, 4-сектор раҳбари, туман Давлат Солиқ инспекцияси бошлиғи Айдос Сеитов, “MAFTUNA MED MANGIT” масъулияти чекланган жамияти раҳбари Улуғбек Абдураҳмонов, туман “Нуронийлар” жамоатчилик Кенгаши раиси ўринбосари Бекман Аллаберганов, клиника раҳбари, олий тоифали шифокор Зулхумор Гаипова ва бошқа тиббиёт ходимлари, фуқаролар йиғини раиси, масъуллари ва фаоллар иштирок этишди.

Маросимда сўзга чиққанлар дастлаб тиббиёт тизимига сўнгги йилларда қаратилаётган алоҳида эътибор, бу борада муҳим асос бўлаётган Президент ва ҳукумат қарорлари, амалга оширилаётган ислоҳотлар, ўзгаришлар хусусида гапирдилар.

Таъкидланганидек, кейинги йилларда соғлиқни сақлашда хусусий секторни ривожлантириш борасида изчил ишлар амалга оширилди. Хусусий тиббиёт бинолари учун тадбиркорларга ерлар берилиб, улар учун кредит маблағлари ажратилмоқда. Ҳозирги кунда энг чекка қишлоқларда ҳам хусусий клиникалар ташкил этилиб, аҳолига кўрсатилаётган тиббий хизмат сифати янада яхшиланмоқда. Биргина Амударё туманда 15 тага яқин хусусий клиникалар ва диагностика марказлари фаолият қўрсатмоқда. Уларнинг 11 таси Манғит шаҳри марказида, 4 таси эса қишлоқ жойларида аҳолига тиббий хизмат кўрсатмоқда. Албатта, бу ўз навбатида чекка ҳудудлар аҳолисига ҳам сифатли тиббий хизмат кўрсатиш имконини бермоқда.

“MAFTUNA MED” хусусий клиникасининг ташкил этилишига 225 млн. сўм банк кредити ва 100 млн. сўм тадбиркорнинг ўз маблағи, жами 325 млн. сўм маблағ сарфланди. Клиникада янгидан 4 та иш ўрни очилди. Шунингдек, бу ерда касалларнинг стационар тарзда даволанишлар учун 15 та жой мавжуд. Бу ерга беморларга ташхис қўйиш ва даволаш учун малакали шифокор ва тиббиёт ходимлари жалб этилган бўлиб, энг замонавий тиббий асбоб-ускуналар билан жиҳозланган. Соғлигидан шикоят қилиб келган беморлар малакали шифокордан тўлиқ муолажалар олиб, даволаниш, ўз саломатлигини қайта тиклаш имкониятига эга бўлишади.

Клиникада аҳолига терапия-стационар, диагностика, тиббий маслаҳат ва консерватив даволаш каби хизматлар кўрсатилади. Шунингдек, замонавий ультратовуш ташхиси, эхо-кардиограмма, ЭКГ ускуналари ёрдамида тиббий текширувлар ўтказилади ва беморларга аниқ ташхислар қўйилади. Ундан ташқари, малакали тиббиёт ходимлари томонидан муолажалар, даво чоралари қўлланилиб, соғлом ҳаётга қайтишларига кўмак берилади.

Янги клиниканинг очилиш маросимига келган меҳмонлар замонавий бинода яратилган шарт-шароитлар, ўрнатилган тиббий жиҳозлар билан таништирилди. Меҳмонлар тиббиёт масканида ташхис қўйиладиган, тиббий муолажалар олиб бориладиган хоналар, кутиш залларида бошқа юқумли касалликларнинг олдини олиш чоралари кўрилгани, санитария-гигиена воситалари билан таъминланганини мамнуният билан эътироф этдилар.

Хусусий клиника маъмурияти ва ходимлари туман аҳолисига сифатли тиббий хизмат кўрсатишни йўлга қўйиш орқали аҳолига кўрсатилаётган тиббий ёрдам сифатининг янада яхшиланишига ўз ҳиссаларини қўшишни мақсад қилганлар.

Озода Худойберганова.