IChKI KASALLIKLARGA IXTISOSLAShGAN YaNGI “MAFTUNA MED” KLINIKASINING OChILISh MAROSIMI BOʻLDI

Amudaryoda “MAFTUNA MED MANGIT” MChJga qarashli ichki kasalliklarga ixtisoslashgan xususiy klinika yangidan faoliyat boshladi.

23-noyabr kuni Navoiy nomli mahallada joylashgan ushbu klinikaning ochilishi marosimi boʻlib oʻtdi. Tadbirda tuman hokimi oʻrinbosarlari Rashid Salayev, Mahmud Shermetov, 4-sektor rahbari, tuman Davlat Soliq inspektsiyasi boshligʻi Aydos Seitov, “MAFTUNA MED MANGIT” masʼuliyati cheklangan jamiyati rahbari Ulugʻbek Abdurahmonov, tuman “Nuroniylar” jamoatchilik Kengashi raisi oʻrinbosari Bekman Allaberganov, klinika rahbari, oliy toifali shifokor Zulxumor Gaipova va boshqa tibbiyot xodimlari, fuqarolar yigʻini raisi, masʼullari va faollar ishtirok etishdi.

Marosimda soʻzga chiqqanlar dastlab tibbiyot tizimiga soʻnggi yillarda qaratilayotgan alohida eʼtibor, bu borada muhim asos boʻlayotgan Prezident va hukumat qarorlari, amalga oshirilayotgan islohotlar, oʻzgarishlar xususida gapirdilar.

Taʼkidlanganidek, keyingi yillarda sogʻliqni saqlashda xususiy sektorni rivojlantirish borasida izchil ishlar amalga oshirildi. Xususiy tibbiyot binolari uchun tadbirkorlarga yerlar berilib, ular uchun kredit mablagʻlari ajratilmoqda. Hozirgi kunda eng chekka qishloqlarda ham xususiy klinikalar tashkil etilib, aholiga koʻrsatilayotgan tibbiy xizmat sifati yanada yaxshilanmoqda. Birgina Amudaryo tumanda 15 taga yaqin xususiy klinikalar va diagnostika markazlari faoliyat qoʻrsatmoqda. Ularning 11 tasi Mangʻit shahri markazida, 4 tasi esa qishloq joylarida aholiga tibbiy xizmat koʻrsatmoqda. Albatta, bu oʻz navbatida chekka hududlar aholisiga ham sifatli tibbiy xizmat koʻrsatish imkonini bermoqda.

“MAFTUNA MED” xususiy klinikasining tashkil etilishiga 225 mln. soʻm bank krediti va 100 mln. soʻm tadbirkorning oʻz mablagʻi, jami 325 mln. soʻm mablagʻ sarflandi. Klinikada yangidan 4 ta ish oʻrni ochildi. Shuningdek, bu yerda kasallarning statsionar tarzda davolanishlar uchun 15 ta joy mavjud. Bu yerga bemorlarga tashxis qoʻyish va davolash uchun malakali shifokor va tibbiyot xodimlari jalb etilgan boʻlib, eng zamonaviy tibbiy asbob-uskunalar bilan jihozlangan. Sogʻligidan shikoyat qilib kelgan bemorlar malakali shifokordan toʻliq muolajalar olib, davolanish, oʻz salomatligini qayta tiklash imkoniyatiga ega boʻlishadi.

Klinikada aholiga terapiya-statsionar, diagnostika, tibbiy maslahat va konservativ davolash kabi xizmatlar koʻrsatiladi. Shuningdek, zamonaviy ultratovush tashxisi, exo-kardiogramma, EKG uskunalari yordamida tibbiy tekshiruvlar oʻtkaziladi va bemorlarga aniq tashxislar qoʻyiladi. Undan tashqari, malakali tibbiyot xodimlari tomonidan muolajalar, davo choralari qoʻllanilib, sogʻlom hayotga qaytishlariga koʻmak beriladi.

Yangi klinikaning ochilish marosimiga kelgan mehmonlar zamonaviy binoda yaratilgan shart-sharoitlar, oʻrnatilgan tibbiy jihozlar bilan tanishtirildi. Mehmonlar tibbiyot maskanida tashxis qoʻyiladigan, tibbiy muolajalar olib boriladigan xonalar, kutish zallarida boshqa yuqumli kasalliklarning oldini olish choralari koʻrilgani, sanitariya-gigiyena vositalari bilan taʼminlanganini mamnuniyat bilan eʼtirof etdilar.

Xususiy klinika maʼmuriyati va xodimlari tuman aholisiga sifatli tibbiy xizmat koʻrsatishni yoʻlga qoʻyish orqali aholiga koʻrsatilayotgan tibbiy yordam sifatining yanada yaxshilanishiga oʻz hissalarini qoʻshishni maqsad qilganlar.

Ozoda Xudoyberganova.