ТУМАН СПОРТ МАКТАБИДА БАДИИЙ ГИМНАСТИКА БЎЙИЧА ОЧИҚ БИРИНЧИЛИК МУСОБАҚАСИ ЎТКАЗИЛДИ

Бадиий гимнастика тасма, копток, халқа, арғамчи ёрдамида, шунингдек, ҳеч қандай деталларсиз, яъни нафис гимнастика, рақс машқларини мусиқа садолари остида бажаришдан иборат спорт тури бўлиб, кейинги йилларда ўсмир-ёшлар орасида жуда оммалашмоқда.

Ўтган асрнинг 40-йилларидан бошлаб илк бадиий гимнастика мусобақалари ўтказила бошлаган бўлса, 50-йиллари охирида халқаро гимнастика Федерацияси бадиий гимнастикани спорт тури сифатида тан олди. 1963 йилдан бошлаб ҳар икки йилда бир марта мазкур спорт туридан жаҳон чемпионати ўтказиб келинмоқда. 1984 йилда ушбу спорт тури Олимпиа ўйинлари дастурига киритилган.

Спортнинг ушбу турига мамлакатимизда, шу жумладан, Амударё туманида ҳам улкан эътибор қаратилмоқда. Натижада шуғулланувчилар орасида нуфузли халқаро мусобақалар ғолиблари, Ўзбекистон чемпионлари етишиб чиқаяпти.

26 ноябрь куни туман спорт мактаби раҳбарияти ва тренер Шаҳодат Ражабова ташаббуси билан бадиий гимнастика бўйича мактаб очиқ биринчилиги мусобақалари бўлиб ўтди.

Беллашувда Нукус шаҳридан 3 та жамоа, Элликқалъа туманидан 2 та жамоа ва туман спорт мактабидан иқтидорли гимнастикачи қизлар иштирок этдилар ва ғолиблик учун баҳс олиб бордилар.

Очиқ биринчилик мусобақалари очилиш маросими байрам тусини олди. Туман спорт мактаби директори Чоршам Тожимуродов мусобақада қатнашиб, ўз иқтидорини синовдан ўтказиш, саҳнада юксак маҳорат кўрсатиб, ғолибликка эришиш, ўз тенгдошлари билан дўстона муносабатда тажрибаларини ўрганиш мақсадида ташриф буюрган бадиий гимнастикачи қизларга миннатдорлик билдирди ва муваффақиятлар тилади.

Спорт мактаби залида ўз мураббийлари билан саф тортиб турган бадиий гимнастикачи қизларга мусобақа бош ҳаками, олий тоифали ҳакам Г.Бобожонова таништирилгач, мусобақа шартлари эълон қилинди.

Мусобақани кичик ёшдаги бадиий гимнастикачи қизлар бошлаб беришди. Жами 80 нафар қизлар спорт мактаб очиқ биринчилиги мусобақаларида ўзаро маҳоратларини синовдан ўтказишди.

Натижаларга кўра, туман спорт мактаби тарбияланувчилари Рухсора Алимбоева, Севинчой Алимбоева, Зарнигора Қадамбоева, Хулкарой Абдуллаева, Севинчой Гулимбетова, Мафтуна Шуҳратова, Суғдиёна Бектемировалар ўз вазн тоифаси бўйича ғолибликни қўлга киритдилар.

Бу натижаларга ўз-ўзидан эришилаётгани йўқ. Спорт мактабда 4 нафар малакали мураббийлар 150 нафардан зиёд истеъдодли қизалоқларга бадиий гимнастика сир-асрорларини ўргатишаяпти. Машқлар давомида ушбу нафис спорт тури ёш қизларга қунт билан ўргатилаётгани шуғулланувчилар эришаётган ютуқларда ҳам намоён бўлаётир.

Очиқ биринчилик мусобақалари якунида ғолиб бўлган ва фаол иштирок этган бадиий гимнатикачи қизлар спорт мактаб маъмурияти томонидан рағбатлантирилди.

Ойгул РАЖАБОВА.