TUMAN SPORT MAKTABIDA BADIIY GIMNASTIKA BOʻYIChA OChIQ BIRINChILIK MUSOBAQASI OʻTKAZILDI

Badiiy gimnastika tasma, koptok, xalqa, argʻamchi yordamida, shuningdek, hech qanday detallarsiz, yaʼni nafis gimnastika, raqs mashqlarini musiqa sadolari ostida bajarishdan iborat sport turi boʻlib, keyingi yillarda oʻsmir-yoshlar orasida juda ommalashmoqda.

Oʻtgan asrning 40-yillaridan boshlab ilk badiiy gimnastika musobaqalari oʻtkazila boshlagan boʻlsa, 50-yillari oxirida xalqaro gimnastika Federatsiyasi badiiy gimnastikani sport turi sifatida tan oldi. 1963-yildan boshlab har ikki yilda bir marta mazkur sport turidan jahon chempionati oʻtkazib kelinmoqda. 1984-yilda ushbu sport turi Olimpia oʻyinlari dasturiga kiritilgan.

Sportning ushbu turiga mamlakatimizda, shu jumladan, Amudaryo tumanida ham ulkan eʼtibor qaratilmoqda. Natijada shugʻullanuvchilar orasida nufuzli xalqaro musobaqalar gʻoliblari, Oʻzbekiston chempionlari yetishib chiqayapti.

26-noyabr kuni tuman sport maktabi rahbariyati va trener Shahodat Rajabova tashabbusi bilan badiiy gimnastika boʻyicha maktab ochiq birinchiligi musobaqalari boʻlib oʻtdi.

Bellashuvda Nukus shahridan 3 ta jamoa, Ellikqalʼa tumanidan 2 ta jamoa va tuman sport maktabidan iqtidorli gimnastikachi qizlar ishtirok etdilar va gʻoliblik uchun bahs olib bordilar.

Ochiq birinchilik musobaqalari ochilish marosimi bayram tusini oldi. Tuman sport maktabi direktori Chorsham Tojimurodov musobaqada qatnashib, oʻz iqtidorini sinovdan oʻtkazish, sahnada yuksak mahorat koʻrsatib, gʻoliblikka erishish, oʻz tengdoshlari bilan doʻstona munosabatda tajribalarini oʻrganish maqsadida tashrif buyurgan badiiy gimnastikachi qizlarga minnatdorlik bildirdi va muvaffaqiyatlar tiladi.

Sport maktabi zalida oʻz murabbiylari bilan saf tortib turgan badiiy gimnastikachi qizlarga musobaqa bosh hakami, oliy toifali hakam G.Bobojonova tanishtirilgach, musobaqa shartlari eʼlon qilindi.

Musobaqani kichik yoshdagi badiiy gimnastikachi qizlar boshlab berishdi. Jami 80 nafar qizlar sport maktab ochiq birinchiligi musobaqalarida oʻzaro mahoratlarini sinovdan oʻtkazishdi.

Natijalarga koʻra, tuman sport maktabi tarbiyalanuvchilari Ruxsora Alimboyeva, Sevinchoy Alimboyeva, Zarnigora Qadamboyeva, Xulkaroy Abdullayeva, Sevinchoy Gulimbetova, Maftuna Shuhratova, Sugʻdiyona Bektemirovalar oʻz vazn toifasi boʻyicha gʻoliblikni qoʻlga kiritdilar.

Bu natijalarga oʻz-oʻzidan erishilayotgani yoʻq. Sport maktabda 4 nafar malakali murabbiylar 150 nafardan ziyod isteʼdodli qizaloqlarga badiiy gimnastika sir-asrorlarini oʻrgatishayapti. Mashqlar davomida ushbu nafis sport turi yosh qizlarga qunt bilan oʻrgatilayotgani shugʻullanuvchilar erishayotgan yutuqlarda ham namoyon boʻlayotir.

Ochiq birinchilik musobaqalari yakunida gʻolib boʻlgan va faol ishtirok etgan badiiy gimnatikachi qizlar sport maktab maʼmuriyati tomonidan ragʻbatlantirildi.

Oygul RAJABOVA.