“БЕШ МУҲИМ ТАШАББУС – ЁШЛАРГА ҚАНОТ” ГРАНТ ЛОЙИҲАСИ ДОИРАСИДА КОНЦЕРТ ДАСТУРИ НАМОЙИШ ЭТИЛДИ

Ўзбекистон Республикаси Олий Мажлиси ҳузуридаги Нодавлат нотижорат ташкилотларини ва фуқаролик жамиятининг бошқа институтларини қўллаб-қувватлаш жамоат фонди томонидан ташкил қилинган давлат гранти танловида “Менинг оилам” газетаси таҳририятининг “Беш муҳим ташаббус – ёшларга қанот” номли лойиҳаси ғолиб бўлган эди.

“Менинг оилам” газетаси таҳририяти ижодий жамоаси мазкур фонд томонидан молиялаштирилган лойиҳа доирасида ўқув муассасаларида, овул ва маҳаллаларда турли хил мавзулардаги маънавий-маърифий тадбирлар ўтказиш орқали Президентимиз ташаббуси билан жорий этилган беш муҳим ташаббус бўйича ёшларнинг ижтимоий фоллигини ошириш борасида фаолият олиб боришмоқда.

Газетанинг махсус мухбири, Қорақалпоғистон Республикасида хизмат кўрсатган журналист, лойиҳа координатори Робия Йўлдошева лойиҳада кўзда тутилган режа асосида Манғит шаҳридаги 9-сонли болалар мусиқа ва санъат мактабида ногиронлиги бўлган ёшларнинг мусиқа ва санъатга қизиқишини ошириш мақсадида мазкур мусиқа ва санъат мактаби маъмурияти ҳамда туман Ногиронлар жамияти билан ҳамкорликда мусиқа ва санъат мактаби ўқувчиларининг концерт дастурини ташкил этди.

Ушбу концерт дастури давомида Амударё туманининг турли ҳудудларидаги умумтаълим мактабларининг уйда таълим олувчи ўқувчилари, шунингдек овул ва маҳаллаларда истиқомат қилувчи ногиронлиги бўлган, санъат ва мусиқага ихлосманд ёшлар ва уларнинг ота-оналари иштирок этдилар.

Тадбирни “Беш муҳим ташаббус – ёшларга қанот” лойиҳаси координатори Робия Йўлдошева очди ва мамлакатимизда имконияти чекланган ёшларни ҳар томонлама қўллаб-қувватлаш, уларнинг мусиқа ва санъатга бўлган иқтидорларини ривожлантириш мақсадида ташкил этилаётган мазкур концерт дастурининг аҳамияти хусусида сўз юритиб, тадбир иштирокчиларини 3 декабрь – Халқаро Ногиронлар куни ва яқинлашиб келаётган Ўзбекистон Республикаси Конституцияси қабул қилинганининг 30 йиллиги билан табриклади.

Концерт дастури давомида 9-сонли болалар мусиқа ва санъат мактаби директори, Қорақалпоғистон Республикасида хизмат кўрсатган маданият ходими Йўлдашбой Обдалов, “Беш муҳим ташаббус”нинг биринчи йўналиши ёшларни мусиқа ва санъатга қизиқтириш, уларнинг ушбу йўналиш бўйича иқтидорларини ривожлантириш ва қўллаб-қувватлаш юзасидан мамлакатимизда, шу жумладан туманимизда, шунингдек 9-сонли болалар мусиқа ва санъат мактабида амалга оширилаётган амалий ишларнинг аҳамияти хусусида сўз юритди.

Шундан сўнг, мусиқа ва санъат мактабида таълим олаётган санъатсевар ёшлар ўз иқтидорларини намойиш этдилар. Ўзбек ва қадрдош халқлар миллий чолғу асбобларида бири-биридан мазмундор, ёқимли куйлар чалиб, ашулалар айтишди, рақслар ижро этишди. Айниқса, халқ чолғулари оркестри, эстарада хонандалиги, анъанавий ижрочилик, рубоб, доира, рақс йўналишларида мусиқий таълим олаётган ўқувчи-ёшларнинг ижролари концерт дастурини янада бойитди.

Концерт дастурида иштирок этган ёшлар ўз тенгдошларининг ижро маҳоратларидан мамнун бўлдилар, шу билан бирга улар қалбида мусиқа ва санъатга бўлган меҳр ва иштиёқлари ортди. Тадбирда иштирок этган ёшлар мириқиб ҳордиқ чиқардилар ҳамда ўзлари ҳам мусиқа билан шуғулланиш истагида эканликларини билдирдилар.

Концерт дастури якунида фаол ва жамоатчи ёшларга совғалар берилиб, “Ранглар жилоси” Республика танловида муносиб иштирок этган ижодкор ёшларга мазкур мусиқа ва санъат мактаби директори Йўлдошбой Обдалов томонидан ташаккурномалар топширилди.

Робия ЙЎЛДОШЕВА.