Амударё тумани ҳокими Султонбой Йўлдашевнинг Ўзбекистон Республикаси Конституциясининг 30 йиллиги муносабати билан туманимиз халқига байрам табриги

Ассалому алайкум, азиз ватандошлар!

Аввало, Сиз азизларни, Сизларнинг тимсолингизда бутун халқимизни мамлакатимиз ҳаётидаги муҳим сана – Ўзбекистон Республикаси Конституцияси қабул қилинганининг 30 йиллиги билан чин қалбимдан самимий табриклайман!

Қадрли юртдошлар!

Бош Қомусимиз бўлган Конституциямиз мустақиллик йилларида эришган барча ютуқ ва марраларимизнинг мустаҳкам ҳуқуқий пойдевори, халқимиз эркин ва фаровон турмуш кечиришининг қонуний кафолати бўлиб хизмат қилиб келмоқда.

Айнан Конституциямизга таяниб, ҳурматли Президентимиз раҳбарлигида Янги Ўзбекистонни барпо этиш бўйича кенг кўламли ислоҳотлар амалга оширилмоқда.

Ўтган йиллар давомида давлатимиз ва жамиятимиз ҳаётида жуда катта янгиланишлар рўй бермоқда. Асосий Қонунимизда белгиланган халқ манфаатининг ҳамма нарсадан устунлиги, эркинлик ва очиқлик, қонун устуворлиги тамойиллари нафақат Конституциямизда, балки амалда ҳам давлатимиз сиёсатининг асосий йўналишига айланди.

Конституциямиздаги “Халқ давлат ҳокимиятининг бирдан-бир манбаидир” деган тамойилдан келиб чиқиб аҳоли билан доимий мулоқот қилиш давлат идораларининг бош вазифаси этиб белгиланди. Давлат органлари раҳбарлари фуқаролар олдида ҳисобот берадиган, уларнинг муаммоларини тинглаб, ҳал қиладиган самарали тизим йўлга қўйилди.

Давлат органлари фаолиятида очиқлик ва ошкоралик амалда таъминланиб, муҳим қарор ва қонунлар лойиҳалари муҳокамаларида фуқароларимиз ҳам фаол иштирок этмоқда. Бюджет маблағларидан фойдаланиш, давлат харидлари ва бошқа кўплаб масалалар бўйича муҳим кўрсаткичлар жамоатчиликка очиқ тақдим қилинмоқда.

Бир сўз билан айтганда, Бош Қомусимиз юртимизда озод ва обод, демократик жамият барпо этишнинг мустаҳкам ҳуқуқий асоси бўлиб хизмат қилмоқда.

Бош Қомусимизда “Давлат ўз фаолиятини инсон ва жамият фаровонлигини кўзлаб, ижтимоий адолат ва қонунийлик принциплари асосида амалга оширади” дея белгилаб қўйилган.

Шундан келиб чиққан ҳолда юртимизда аҳолининг эҳтиёжманд қатламларини ҳимоя қилиш, камбағалликни қисқартириш, ҳудудларни изчил ривожлантириш борасида тизимли ишлар қилинмоқда.

Шу мақсадда жорий этилган “Темир дафтар”, “Аёллар дафтари”, “Ёшлар дафтари”, шунингдек “маҳаллабай” ва “хонадонбай” ишлаш тизимлари бугунги кунга келиб дастлабки ижобий натижаларини бермоқда.

Туманимизда ҳам ижтимоий ҳимоя дафтарларига киритилган жами 602 нафар ишсиз фуқарога жорий йил бошидан бери 2,4 млрд. сўмлик субсидиялар ажратилиб, бандлиги таъминланди. “Оилавий тадбиркорликни ривожлантириш”  дастури доирасида 3 090 нафар фуқарога салкам 51 млрд. сўмлик кредитлар ажратилди.

Биргина “Инсон қадрини улуғлаш ва фаол маҳалла йили” деб эълон қилинган жорий йилда жами 77 та объектларда 112,3 млрд. сўмлик қурилиш-таъмирлаш ишлари амалга оширилмоқда. Буларнинг барчаси Конституциямизда белгилаб қўйилган инсонпарвар тамойилларнинг ҳаётий ифодасидир.

Албатта, бугунги тезкор давр амалдаги Конституциямизга ўзгартириш ва қўшимчалар киритиш заруриятини юзага келтирмоқда. Зеро, ҳар қандай ислоҳот кучли конституциявий-ҳуқуқий асосга таянсагина, кўзланган натижаларга эришилади. Ушбу ўзгартириш ва қўшимчаларни ўз ичига олган Конституциявий қонун лойиҳаси қабул қилиниб, умумхалқ муҳокамасига қўйилди. 2 ойдан кўп вақт мобайнида аҳолининг барча қатламларини қамраб олган ҳолда, очиқлик ва ошкоралик принциплари асосида таклифлар қабул қилинди.

Натижада Конституциянинг 76 та моддасига ўзгартиш ва қўшимчалар билан бирга 15 та янги модда ва битта янги боб киритишни назарда тутувчи лойиҳа ишлаб чиқилди. “Конституциянинг ягона манбаи ва муаллифи –  халқдир”, деган тамойилга асосланган ушбу ўзгартиш ва қўшимчалар халқимиз ҳаётининг янада фарвон бўлишига, мамлакатимиз тараққиётининг янги босқичга кўтарилишига асос бўлади.

Азиз юртдошлар!

Фурсатдан фойдаланиб, яна бир бора Сиз азизларни, Сизнинг тимсолингизда бутун туманимиз аҳлини Конституциямизнинг 30 йиллик байрами билан чин қалбимдан табриклаб, барчангизга сиҳат-саломатлик, оилавий бахт, шахсий ва ижтимоий ҳаётингизда катта муваффақиятлар тилайман! Хонадонларимизни, гўзал юртимизни тинчлик-осойишталик, файз-у барака асло тарк этмасин!

Конституциямиз қабул қилинганининг 30 йиллик байрами барчангизга муборак бўлсин, азиз юртдошлар!