Amudaryo tumani hokimi Sultonboy Yoʻldashevning Oʻzbekiston Respublikasi Konstitutsiyasining 30-yilligi munosabati bilan tumanimiz xalqiga bayram tabrigi

Assalomu alaykum, aziz vatandoshlar!

Avvalo, Siz azizlarni, Sizlarning timsolingizda butun xalqimizni mamlakatimiz hayotidagi muhim sana – Oʻzbekiston Respublikasi Konstitutsiyasi qabul qilinganining 30-yilligi bilan chin qalbimdan samimiy tabriklayman!

Qadrli yurtdoshlar!

Bosh Qomusimiz boʻlgan Konstitutsiyamiz mustaqillik yillarida erishgan barcha yutuq va marralarimizning mustahkam huquqiy poydevori, xalqimiz erkin va farovon turmush kechirishining qonuniy kafolati boʻlib xizmat qilib kelmoqda.

Aynan Konstitutsiyamizga tayanib, hurmatli Prezidentimiz rahbarligida Yangi Oʻzbekistonni barpo etish boʻyicha keng koʻlamli islohotlar amalga oshirilmoqda.

Oʻtgan yillar davomida davlatimiz va jamiyatimiz hayotida juda katta yangilanishlar roʻy bermoqda. Asosiy Qonunimizda belgilangan xalq manfaatining hamma narsadan ustunligi, erkinlik va ochiqlik, qonun ustuvorligi tamoyillari nafaqat Konstitutsiyamizda, balki amalda ham davlatimiz siyosatining asosiy yoʻnalishiga aylandi.

Konstitutsiyamizdagi “Xalq davlat hokimiyatining birdan-bir manbaidir” degan tamoyildan kelib chiqib aholi bilan doimiy muloqot qilish davlat idoralarining bosh vazifasi etib belgilandi. Davlat organlari rahbarlari fuqarolar oldida hisobot beradigan, ularning muammolarini tinglab, hal qiladigan samarali tizim yoʻlga qoʻyildi.

Davlat organlari faoliyatida ochiqlik va oshkoralik amalda taʼminlanib, muhim qaror va qonunlar loyihalari muhokamalarida fuqarolarimiz ham faol ishtirok etmoqda. Byudjet mablagʻlaridan foydalanish, davlat xaridlari va boshqa koʻplab masalalar boʻyicha muhim koʻrsatkichlar jamoatchilikka ochiq taqdim qilinmoqda.

Bir soʻz bilan aytganda, Bosh Qomusimiz yurtimizda ozod va obod, demokratik jamiyat barpo etishning mustahkam huquqiy asosi boʻlib xizmat qilmoqda.

Bosh Qomusimizda “Davlat oʻz faoliyatini inson va jamiyat farovonligini koʻzlab, ijtimoiy adolat va qonuniylik printsiplari asosida amalga oshiradi” deya belgilab qoʻyilgan.

Shundan kelib chiqqan holda yurtimizda aholining ehtiyojmand qatlamlarini himoya qilish, kambagʻallikni qisqartirish, hududlarni izchil rivojlantirish borasida tizimli ishlar qilinmoqda.

Shu maqsadda joriy etilgan “Temir daftar”, “Ayollar daftari”, “Yoshlar daftari”, shuningdek “mahallabay” va “xonadonbay” ishlash tizimlari bugungi kunga kelib dastlabki ijobiy natijalarini bermoqda.

Tumanimizda ham ijtimoiy himoya daftarlariga kiritilgan jami 602 nafar ishsiz fuqaroga joriy yil boshidan beri 2,4 mlrd. soʻmlik subsidiyalar ajratilib, bandligi taʼminlandi. “Oilaviy tadbirkorlikni rivojlantirish”  dasturi doirasida 3 090 nafar fuqaroga salkam 51 mlrd. soʻmlik kreditlar ajratildi.

Birgina “Inson qadrini ulugʻlash va faol mahalla yili” deb eʼlon qilingan joriy yilda jami 77 ta obʼektlarda 112,3 mlrd. soʻmlik qurilish-taʼmirlash ishlari amalga oshirilmoqda. Bularning barchasi Konstitutsiyamizda belgilab qoʻyilgan insonparvar tamoyillarning hayotiy ifodasidir.

Albatta, bugungi tezkor davr amaldagi Konstitutsiyamizga oʻzgartirish va qoʻshimchalar kiritish zaruriyatini yuzaga keltirmoqda. Zero, har qanday islohot kuchli konstitutsiyaviy-huquqiy asosga tayansagina, koʻzlangan natijalarga erishiladi. Ushbu oʻzgartirish va qoʻshimchalarni oʻz ichiga olgan Konstitutsiyaviy qonun loyihasi qabul qilinib, umumxalq muhokamasiga qoʻyildi. 2 oydan koʻp vaqt mobaynida aholining barcha qatlamlarini qamrab olgan holda, ochiqlik va oshkoralik printsiplari asosida takliflar qabul qilindi.

Natijada Konstitutsiyaning 76 ta moddasiga oʻzgartish va qoʻshimchalar bilan birga 15 ta yangi modda va bitta yangi bob kiritishni nazarda tutuvchi loyiha ishlab chiqildi. “Konstitutsiyaning yagona manbai va muallifi –  xalqdir”, degan tamoyilga asoslangan ushbu oʻzgartish va qoʻshimchalar xalqimiz hayotining yanada farvon boʻlishiga, mamlakatimiz taraqqiyotining yangi bosqichga koʻtarilishiga asos boʻladi.

Aziz yurtdoshlar!

Fursatdan foydalanib, yana bir bora Siz azizlarni, Sizning timsolingizda butun tumanimiz ahlini Konstitutsiyamizning 30-yillik bayrami bilan chin qalbimdan tabriklab, barchangizga sihat-salomatlik, oilaviy baxt, shaxsiy va ijtimoiy hayotingizda katta muvaffaqiyatlar tilayman! Xonadonlarimizni, goʻzal yurtimizni tinchlik-osoyishtalik, fayz-u baraka aslo tark etmasin!

Konstitutsiyamiz qabul qilinganining 30-yillik bayrami barchangizga muborak boʻlsin, aziz yurtdoshlar!