Музейлар – ўтмишнинг жонли ҳикояси
Халқимизнинг ўтмишига доир тарихий, маданий ва маънавий бойликларимизни эҳтиёт қилиш ва сақлаш шу заминнинг фарзанди сифатида ҳар биримизнинг муқаддас бурчимиз ҳисобланади. Бош Қомусимизнинг 49-моддасида тарихий, маданий ва маънавий меросимизни авайлаб-асрашимиз лозимлиги, маданий ёгорликлар давлат муҳофазасида эканлиги қонунан белгилаб қўйилган.
Музейлар ўз бағрида тарих саҳифаларини акс эттириши билан қимматлидир. Бу манзилда аждодларимизнинг кундалик турмуш тарзини, маънавий дунёсини, маданий салоҳиятини асл намуналар воситасида ўрганамиз.
Олмазор маҳалласи ҳудудида жойлашган Амударё тумани тарихий-ўлкашунослик музейи ҳам туманимиз тарихидан ҳикоя қилувчи маданият маскани ҳисобланади. Музей фаолиятини бошлаганидан буён туманимиз аҳли, айниқса, ёшлар доимий ташриф буюриб, аждодларимизнинг турмуш тарзи билан яқиндан танишмоқдалар. Ёшлар фахрий устоз, мустақил изланувчи тарихчи-ўлкашунос Шавкат ака Чоршамовдан музейдаги экспонатлар тўғрисида қизиқарли, қимматли маълумотларга эга бўлиб, туманимиз тарихига доир билимларини бойитишмоқда.
Музейдаги экспонатлар асосан XVIII-XIX аср тарихига доир ҳисобланади. Уй-рўзғор буюмлари, ўтмишда фойдаланилган иш қуроллари, ўша даврда кийилган кийимлар аждодларимизнинг турмуш тарзини ифода этса, ёғ ишлаб чиқариш жувозлари, ерларни суғоришда ишлатилган сув ҳайдовчи чиғир ва чархпалаклар боболаримизнинг меҳнати ва ҳаётини кўз олдимизда гавдалантиради. Ноёб қўлёзмалар, созандаларнинг қадимий чолғу асбоблари аждодларимизнинг маънавий-маданий дунёсидан ҳикоя қилади.
Музей экспонатлари туманимиз аҳли томонидан тақдим этилган тарихий манбалар билан ҳам бойиб бормоқда. Жумладан, Давлатбой Эшжонов, Абдулла Ортиқов ҳамда чойкўллик Ражаббой Ешчонов каби юртдошларимиз томонидан тақдим этилган буюмлар музейнинг хазинасига айланган. Уларнинг тимсолида аждодлар меросига дахлдорлик туйғусини ҳис қиламиз.
Моддий ва номоддий меросимизнинг давлат муҳофазасига олиниши, қонунлар билан ҳимоя қилиниши натижасида келгуси авлодларга тарихимизни бутун ҳолида етказишга эришилади. Зеро, тарихий хотирасиз келажак бўлмайди.
Шоҳзод Қурбонбоев,
ҚДУ талабаси.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
