Muzeylar – oʻtmishning jonli hikoyasi
Xalqimizning oʻtmishiga doir tarixiy, madaniy va maʼnaviy boyliklarimizni ehtiyot qilish va saqlash shu zaminning farzandi sifatida har birimizning muqaddas burchimiz hisoblanadi. Bosh Qomusimizning 49-moddasida tarixiy, madaniy va maʼnaviy merosimizni avaylab-asrashimiz lozimligi, madaniy yogorliklar davlat muhofazasida ekanligi qonunan belgilab qoʻyilgan.
Muzeylar oʻz bagʻrida tarix sahifalarini aks ettirishi bilan qimmatlidir. Bu manzilda ajdodlarimizning kundalik turmush tarzini, maʼnaviy dunyosini, madaniy salohiyatini asl namunalar vositasida oʻrganamiz.
Olmazor mahallasi hududida joylashgan Amudaryo tumani tarixiy-oʻlkashunoslik muzeyi ham tumanimiz tarixidan hikoya qiluvchi madaniyat maskani hisoblanadi. Muzey faoliyatini boshlaganidan buyon tumanimiz ahli, ayniqsa, yoshlar doimiy tashrif buyurib, ajdodlarimizning turmush tarzi bilan yaqindan tanishmoqdalar. Yoshlar faxriy ustoz, mustaqil izlanuvchi tarixchi-oʻlkashunos Shavkat aka Chorshamovdan muzeydagi eksponatlar toʻgʻrisida qiziqarli, qimmatli maʼlumotlarga ega boʻlib, tumanimiz tarixiga doir bilimlarini boyitishmoqda.
Muzeydagi eksponatlar asosan XVIII-XIX asr tarixiga doir hisoblanadi. Uy-roʻzgʻor buyumlari, oʻtmishda foydalanilgan ish qurollari, oʻsha davrda kiyilgan kiyimlar ajdodlarimizning turmush tarzini ifoda etsa, yogʻ ishlab chiqarish juvozlari, yerlarni sugʻorishda ishlatilgan suv haydovchi chigʻir va charxpalaklar bobolarimizning mehnati va hayotini koʻz oldimizda gavdalantiradi. Noyob qoʻlyozmalar, sozandalarning qadimiy cholgʻu asboblari ajdodlarimizning maʼnaviy-madaniy dunyosidan hikoya qiladi.
Muzey eksponatlari tumanimiz ahli tomonidan taqdim etilgan tarixiy manbalar bilan ham boyib bormoqda. Jumladan, Davlatboy Eshjonov, Abdulla Ortiqov hamda choykoʻllik Rajabboy Yeshchonov kabi yurtdoshlarimiz tomonidan taqdim etilgan buyumlar muzeyning xazinasiga aylangan. Ularning timsolida ajdodlar merosiga daxldorlik tuygʻusini his qilamiz.
Moddiy va nomoddiy merosimizning davlat muhofazasiga olinishi, qonunlar bilan himoya qilinishi natijasida kelgusi avlodlarga tariximizni butun holida yetkazishga erishiladi. Zero, tarixiy xotirasiz kelajak boʻlmaydi.
Shohzod Qurbonboyev,
QDU talabasi.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
