Қипчоқ овул фуқаролар йиғинида туман ҳокими ҳудуд ёшлари билан учрашди

Ёшлар - келажагимиз. Улар эртамиз эгаларидир. Бугун ёш авлод камолоти йўлида ташланган ҳар бир қадам фарзандларимизнинг порлоқ истиқболи ва жонажон Ўзбекистонимизнинг нурли эртаси йўлида қўйилган одимлар ҳисобланади. Шу ўринда эътироф этиш жоизки, Амударё туманида ҳам ёшлар камолоти йўлида кўпгина самарали ишлар амалга оширилмоқда. Айниқса, бунда туманнинг энг чекка ҳудудларида истиқомат қилувчи ёшларнинг муаммоларини ўрганиш ва ижобий ҳал қилишга алоҳида эътибор берилмоқда.

Қипчоқ овул фуқаролар йиғинида туман ҳокими ва Қипчоқ шаҳарча фуқаролар йиғини ёшлари билан ташкил этилган навбатдаги учрашувда ҳам ёшлар томонидан билдирилган муаммо ва таклифлар муҳокама қилиниб, келгусидаги муҳим вазифалар белгилаб олинди.

Учрашувда туман ҳокими Султонбой Йўлдашев ёшларнинг бандлигини таъминлаш, касбга ўқитиш, тадбиркорлик ғояларини қўллаб-қувватлаш борасида амалга оширилаётган ишларга тўхталиб ўтди. Ундан ташқари, ижтимоий ҳимояга муҳтож ёшларга кўрсатилаётган ёрдамлар ҳақида ҳам батафсил маълумот берди.

Шунингдек, ҳар бир маҳаллада фаолият юритаётган ёшлар етакчилари ёшларнинг истеъдодларини юзага чиқаришда, муаммоларини ҳал этишда тизимли равишда ишлар ташкил этаётгани, бу орқали эса ёшлар томонидан келиб тушаётган мурожаатлар сезиларли даражада камайганини айтиб ўтди.

Туман ҳокими ўз нутқида якунланаётган йил ёшлар учун янгидан янги имкониятлар эшигини очганлигини, мазкур йилда ҳар бир фуқаронинг мурожаатлари имкон қадар ижобий ҳал қилинганини айтиб, 2023 йилда ёшлар бандлигини таъминлашга доир режалар хусусида айтиб ўтди.

Шундан сўнг, ҳудуднинг фаол ёшлари 2022 йилда эришган муваффақиятлари ва 2023 йилда ўз олдига қўйган мақсадларини йиғилганлар билан ўртоқлашдилар.

Ҳоким ва ёшлар учрашувида ёшлардан 2 нафари пайвандлаш ускунасини субсидия асосида олишда амалий ёрдам сўради. Мурожаатлар юзасидан Ёшлар ишлари агентлиги туман бўлими масъулларига топшириқлар берилиб, ижроси назоратга олинди. Учрашувда ёшлар ҳаётида учраётган маиший муаммолар ҳам тингланиб, улар ҳам ўзининг ижобий ечимини топди.

Мамлакатизда ёш авлодга қаратилаётган алоҳида эътибор ва ғамхўрлик ўзининг ижобий натижасини бериб келмоқда. Жумладан, ёшларни спорт, таълим, ахборот технологиялари каби соҳаларга кенг жалб қилиш мақсадида ўтказилиб келинаётган “Беш ташаббус олимпиадаси” доирасида истеъдодли ва қобилиятли, билимли ёшлар кашф этилмоқда.

Амударё туманида ҳам олимпиаданинг 2-мавсумида бир гуруҳ ёшларимиз олтин, кумуш медалларни қўлга киритишди. Ёшларимизнинг эришаётган бу каби муваффақиятлари ёшлар учун яратилган имконият ва шароитларнинг ёрқин намунасидир.

Туман ҳокимлигининг Ахборот хизмати.