Qipchoq ovul fuqarolar yigʻinida tuman hokimi hudud yoshlari bilan uchrashdi

Yoshlar - kelajagimiz. Ular ertamiz egalaridir. Bugun yosh avlod kamoloti yoʻlida tashlangan har bir qadam farzandlarimizning porloq istiqboli va jonajon Oʻzbekistonimizning nurli ertasi yoʻlida qoʻyilgan odimlar hisoblanadi. Shu oʻrinda eʼtirof etish joizki, Amudaryo tumanida ham yoshlar kamoloti yoʻlida koʻpgina samarali ishlar amalga oshirilmoqda. Ayniqsa, bunda tumanning eng chekka hududlarida istiqomat qiluvchi yoshlarning muammolarini oʻrganish va ijobiy hal qilishga alohida eʼtibor berilmoqda.

Qipchoq ovul fuqarolar yigʻinida tuman hokimi va Qipchoq shaharcha fuqarolar yigʻini yoshlari bilan tashkil etilgan navbatdagi uchrashuvda ham yoshlar tomonidan bildirilgan muammo va takliflar muhokama qilinib, kelgusidagi muhim vazifalar belgilab olindi.

Uchrashuvda tuman hokimi Sultonboy Yoʻldashev yoshlarning bandligini taʼminlash, kasbga oʻqitish, tadbirkorlik gʻoyalarini qoʻllab-quvvatlash borasida amalga oshirilayotgan ishlarga toʻxtalib oʻtdi. Undan tashqari, ijtimoiy himoyaga muhtoj yoshlarga koʻrsatilayotgan yordamlar haqida ham batafsil maʼlumot berdi.

Shuningdek, har bir mahallada faoliyat yuritayotgan yoshlar yetakchilari yoshlarning isteʼdodlarini yuzaga chiqarishda, muammolarini hal etishda tizimli ravishda ishlar tashkil etayotgani, bu orqali esa yoshlar tomonidan kelib tushayotgan murojaatlar sezilarli darajada kamayganini aytib oʻtdi.

Tuman hokimi oʻz nutqida yakunlanayotgan yil yoshlar uchun yangidan yangi imkoniyatlar eshigini ochganligini, mazkur yilda har bir fuqaroning murojaatlari imkon qadar ijobiy hal qilinganini aytib, 2023-yilda yoshlar bandligini taʼminlashga doir rejalar xususida aytib oʻtdi.

Shundan soʻng, hududning faol yoshlari 2022-yilda erishgan muvaffaqiyatlari va 2023-yilda oʻz oldiga qoʻygan maqsadlarini yigʻilganlar bilan oʻrtoqlashdilar.

Hokim va yoshlar uchrashuvida yoshlardan 2 nafari payvandlash uskunasini subsidiya asosida olishda amaliy yordam soʻradi. Murojaatlar yuzasidan Yoshlar ishlari agentligi tuman boʻlimi masʼullariga topshiriqlar berilib, ijrosi nazoratga olindi. Uchrashuvda yoshlar hayotida uchrayotgan maishiy muammolar ham tinglanib, ular ham oʻzining ijobiy yechimini topdi.

Mamlakatizda yosh avlodga qaratilayotgan alohida eʼtibor va gʻamxoʻrlik oʻzining ijobiy natijasini berib kelmoqda. Jumladan, yoshlarni sport, taʼlim, axborot texnologiyalari kabi sohalarga keng jalb qilish maqsadida oʻtkazilib kelinayotgan “Besh tashabbus olimpiadasi” doirasida isteʼdodli va qobiliyatli, bilimli yoshlar kashf etilmoqda.

Amudaryo tumanida ham olimpiadaning 2-mavsumida bir guruh yoshlarimiz oltin, kumush medallarni qoʻlga kiritishdi. Yoshlarimizning erishayotgan bu kabi muvaffaqiyatlari yoshlar uchun yaratilgan imkoniyat va sharoitlarning yorqin namunasidir.

Tuman hokimligining Axborot xizmati.