ЎРМОН ФОНДИ РЕСУРСЛАРИДАН САМАРАЛИ ФОЙДАЛАНИШГА БАҒИШЛАНГАН СЕМИНАР БЎЛИБ ЎТДИ

Кейинги йилларда давлат ўрмон хўжалиги органларининг фаолиятини такомиллаштиришга, хўжаликлар ҳудудларидаги табиий ресурслардан оқилона фойдаланишга, ўрмон маҳсулотларини ишлаб чиқариш ҳажмларини кўпайтиришга алоҳида эътибор берилмоқда.

Шунингдек, ҳудуддаги оғир экологик вазият оқибатларини юмшатиш мақсадида хўжаликларнинг ўрмон билан қопланмаган ҳудудларида кўчат етиштиришни самарали ташкил этиш ва чор-атрофда мевали, манзарали дарахтлар, кўп йиллик буталар, гуллар кўпайишига ҳисса қўшиш долзарб вазифа қилиб қўйилган. Бу борадаги ишларни тизимли ташкил этишда Республика Президентининг 2020 йил 6 октябрдаги “Ўзбекистон Республикасида ўрмон хўжалиги тизимини 2030 йилгача ривожлантириш концепциясини тасдиқлаш тўғрисида”ги қарори муҳим асос бўлмоқда. Мазкур қарорда Республикада ўрмон фондини муҳозафа қилиш, кўпайтириш, ундан оқилона фойдаланиш, унинг моддий-техника базасини модернизация қилиш, соҳага бозор механизмларини, ахборот-коммуникация технологияларини кенг жорий этиш, кадрлар салоҳиятини ошириш ҳисобига илм-фан ютуқларидан самарали фойдаланишнинг устувор йўналишлари белгилаб берилган.

Бу борадаги фаолияти намунали ташкил этилган Амударё туманидаги Қипчоқ давлат ўрмон хўжалигида 26 декабрь куни республика миқёсида семинар ўтказилди.

Ўрмон хўжалиги ходимлари учун ташкил қилинган семинарда Ўзбекистон Республикаси ўрмон хўжалиги давлат қўмитаси бош мутахассиси Муротбой Ғаниев, Қорақалпоғистон Республикасидаги давлат ўрмон хўжаликлари раҳбарлари, бош ўрмонбегилари, мутахассислари иштирок этдилар. Унда Муротбой Ғаниев “Яшил макон” давлат дастурининг 2022 йилги ижроси, республикада иҳота дарахтзорларининг барпо этилиши, шунингдек, ҳудудда яшил дарахтларни кўпайтириш учун кўчат етиштириш борасидаги амалга оширилаётган ишлар хусусида маъруза қилди ва бу борада “Қипчоқ” давлат ўрмон хўжалиги ходимларининг фаолиятини барчага намуна қилиб кўрсатди.

Шуни қайд этиш лозимки, мазкур хўжаликда 20,5 гектар ўрмон кўчатхоналари, мавжуд бўлиб, жорий йилда маданий ўрмонзорлар барпо этиш, тумандаги корхона, ташкилотларни кўчат билан таъминлаш, иҳотазорлар учун уруғ етиштириш режалари ортиғи билан бажарилди. Шунингдек, Орол денгизининг қуриган тубида хўжалик ишчилари томонидан яшил қопламалар яратиш мақсадида саксовул уруғлари экилди. “Яшил макон” давлат дастури ижроси таъминланишига ҳисса қўшиш мақсадида тумандаги корхона, ташкилотларга, мактабларга, мактабгача таълим ташкилотларига ҳомийлик асосида 29 744 дона ҳар хил дарахтлар кўчатлари етказиб берилди.

Яқинда хўжаликда яна бир қувончли воқеа бўлди: Президентимизнинг барча соҳаларда “Заковат” интеллектуал ўйинларини ўктазиш орқали кадрлар салоҳиятини юксалтириш юзасидан берган топшириғига асосан Ўзбекистон Республикаси Ўрмон хўжалиги давлат қўмитаси ташкил этган “Заковат” интеллектуал ўйинининг қуйи босқичларида ғолибликка эришган Қипчоқ давлат ўрмон хўжалиги бош ўрмонбегиси Рустам Досманов интеллектуал ўйиннинг мамлакат босқичида муваффақиятли иштирок этди. 108 нафар иштирокчилар ўз салоҳиятини синовдан ўтказган ушбу беллашувда у фахрли 4-ўринни эгаллади ва ташкилотчиларнинг совғалари, сертификати билан тақдирланди.

Семинарда булар ҳақда батафсил сўз юритилди. Барча ўрмон хўжаликларида ҳам ўрмон маҳсулотлари етиштиришни кўпайтириш, ўрмон фонди ресурсларидан самарали фойдаланиш юзасидан хўжаликлар раҳбарларига зарур тавсиялар берилди.

Ойгул РАЖАБОВА.