OʻRMON FONDI RESURSLARIDAN SAMARALI FOYDALANIShGA BAGʻIShLANGAN SEMINAR BOʻLIB OʻTDI

Keyingi yillarda davlat oʻrmon xoʻjaligi organlarining faoliyatini takomillashtirishga, xoʻjaliklar hududlaridagi tabiiy resurslardan oqilona foydalanishga, oʻrmon mahsulotlarini ishlab chiqarish hajmlarini koʻpaytirishga alohida eʼtibor berilmoqda.

Shuningdek, hududdagi ogʻir ekologik vaziyat oqibatlarini yumshatish maqsadida xoʻjaliklarning oʻrmon bilan qoplanmagan hududlarida koʻchat yetishtirishni samarali tashkil etish va chor-atrofda mevali, manzarali daraxtlar, koʻp yillik butalar, gullar koʻpayishiga hissa qoʻshish dolzarb vazifa qilib qoʻyilgan. Bu boradagi ishlarni tizimli tashkil etishda Respublika Prezidentining 2020-yil 6-oktyabrdagi “Oʻzbekiston Respublikasida oʻrmon xoʻjaligi tizimini 2030-yilgacha rivojlantirish kontseptsiyasini tasdiqlash toʻgʻrisida”gi qarori muhim asos boʻlmoqda. Mazkur qarorda Respublikada oʻrmon fondini muhozafa qilish, koʻpaytirish, undan oqilona foydalanish, uning moddiy-texnika bazasini modernizatsiya qilish, sohaga bozor mexanizmlarini, axborot-kommunikatsiya texnologiyalarini keng joriy etish, kadrlar salohiyatini oshirish hisobiga ilm-fan yutuqlaridan samarali foydalanishning ustuvor yoʻnalishlari belgilab berilgan.

Bu boradagi faoliyati namunali tashkil etilgan Amudaryo tumanidagi Qipchoq davlat oʻrmon xoʻjaligida 26-dekabr kuni respublika miqyosida seminar oʻtkazildi.

Oʻrmon xoʻjaligi xodimlari uchun tashkil qilingan seminarda Oʻzbekiston Respublikasi oʻrmon xoʻjaligi davlat qoʻmitasi bosh mutaxassisi Murotboy Gʻaniyev, Qoraqalpogʻiston Respublikasidagi davlat oʻrmon xoʻjaliklari rahbarlari, bosh oʻrmonbegilari, mutaxassislari ishtirok etdilar. Unda Murotboy Gʻaniyev “Yashil makon” davlat dasturining 2022-yilgi ijrosi, respublikada ihota daraxtzorlarining barpo etilishi, shuningdek, hududda yashil daraxtlarni koʻpaytirish uchun koʻchat yetishtirish borasidagi amalga oshirilayotgan ishlar xususida maʼruza qildi va bu borada “Qipchoq” davlat oʻrmon xoʻjaligi xodimlarining faoliyatini barchaga namuna qilib koʻrsatdi.

Shuni qayd etish lozimki, mazkur xoʻjalikda 20,5 gektar oʻrmon koʻchatxonalari, mavjud boʻlib, joriy yilda madaniy oʻrmonzorlar barpo etish, tumandagi korxona, tashkilotlarni koʻchat bilan taʼminlash, ihotazorlar uchun urugʻ yetishtirish rejalari ortigʻi bilan bajarildi. Shuningdek, Orol dengizining qurigan tubida xoʻjalik ishchilari tomonidan yashil qoplamalar yaratish maqsadida saksovul urugʻlari ekildi. “Yashil makon” davlat dasturi ijrosi taʼminlanishiga hissa qoʻshish maqsadida tumandagi korxona, tashkilotlarga, maktablarga, maktabgacha taʼlim tashkilotlariga homiylik asosida 29 744 dona har xil daraxtlar koʻchatlari yetkazib berildi.

Yaqinda xoʻjalikda yana bir quvonchli voqea boʻldi: Prezidentimizning barcha sohalarda “Zakovat” intellektual oʻyinlarini oʻktazish orqali kadrlar salohiyatini yuksaltirish yuzasidan bergan topshirigʻiga asosan Oʻzbekiston Respublikasi Oʻrmon xoʻjaligi davlat qoʻmitasi tashkil etgan “Zakovat” intellektual oʻyinining quyi bosqichlarida gʻoliblikka erishgan Qipchoq davlat oʻrmon xoʻjaligi bosh oʻrmonbegisi Rustam Dosmanov intellektual oʻyinning mamlakat bosqichida muvaffaqiyatli ishtirok etdi. 108 nafar ishtirokchilar oʻz salohiyatini sinovdan oʻtkazgan ushbu bellashuvda u faxrli 4-oʻrinni egalladi va tashkilotchilarning sovgʻalari, sertifikati bilan taqdirlandi.

Seminarda bular haqda batafsil soʻz yuritildi. Barcha oʻrmon xoʻjaliklarida ham oʻrmon mahsulotlari yetishtirishni koʻpaytirish, oʻrmon fondi resurslaridan samarali foydalanish yuzasidan xoʻjaliklar rahbarlariga zarur tavsiyalar berildi.

Oygul RAJABOVA.