Жайхун илҳомлари

ҚАЛБИ ЁНИҚ ҚОРАҚАЛПОҚ ФАРЗАНДИ

(Муса Ерниязов хотирасига бағишлайман)

Яхшиларнинг мен яхшисин айтайин,

Ҳаммага тенг бошчи эдинг камтарин.

Ўйладинг сен доимо элнинг ғамин,

Қалби ёниқ қорақалпоқ фарзанди.

 

Йигит эдинг арслондай туғилган,

Халқ ишига белин маҳкам бойлаган.

Сен келдинг хабар ҳам келди-ку сувдан,

Қалби ёниқ қорақалпоқ фарзанди.

 

Эл оғзига элак тутиб бўлмайди,

Ҳамманинг ҳам кўнгли бирдай тўлмайди.

Ҳалол меҳнат ҳеч вақт ерда қолмайди,

Қалби ёниқ қорақалпоқ фарзанди.

 

Элим деган эр йигитнинг бирисан,

Эл буюрса, доим тайёр эдинг сен.

Фидойилик намунаси ўзингсан,

Қалби ёниқ қорақалпоқ фарзанди.

 

Ишга қўшиб икки улкан заводни,

Ўрта Осиёда машҳур, қудратли.

Эларо қозондинг эъзоз, ҳурматни,

Қалби ёниқ қорақалпоқ фарзанди.

 

Режасин бажариб пахта, буғдойнинг,

Қорақалпоқ халқи шаънин кўтардинг.

Бандаси экансан суйган Худонинг,

Қалби ёниқ қорақалпоқ фарзанди.

 

“Қаҳрамон” унвони берилган онда,

Ишонч билдирди Президент сенга.

Имконсиз умрни қайтармоқ изга,

Қалби ёниқ қорақалпоқ фарзанди.

 

Беҳишт бўлсин Оға, ўрнингиз ётган,

Паноҳига олган бўлсин Яратган.

Сақлаймиз номингиз чиқармай ёддан,

Қалби ёниқ қорақалпоқ фарзанди.

Ангсатбай ҚАРАЖАНОВ, ҳуқуқшунос.

Қорақалпоқ  тилидан

Ойгул РАЖАБОВА таржимаси.

 

Ўша янги йил

Бир-бирин қувлашиб йиллар ҳам ўтди,

Хотира боғига мўралар кўнгил.

Эсингдами дилдор, қайси йил эди.

Бизни учраштирган ўша Янги йил.

 

Дилларга завқ бериб баҳори, ёзи,

Қалбимга нур бўлиб кирди битта гул.

Юракка ўт ёқиб ишваси, нози,

Мажнун қилиб кетган, ўша Янги йил.

 

Сирли нигоҳларинг, кўзларинг қўмсаб,

Девона ошиқнинг юраги савил.

Ҳис-туйғу уммони бағримни ўртаб,

Телба қилиб кетган, ўша Янги йил.

 

Хотира сандиғин титкилаб секин,

Авайлаб эслайман, ўтса ҳам қирқ йил.

Шўрлик юрагимга ҳеч ўчмас, метин,

Тамға босиб кетган, ўша Янги йил.

Одил ШОМУРОДОВ.

 

САЙЛАНМАСИ САЙРАГАН ДИЛДАН

(Устозим Саъдулла Хўжаниёзовнинг “Кўрганларим, эшитганларим” отлиқ каттагина китобидан илҳомланиб айтган байтларим)

Сайланмаси сайраган дилдан,

Ўтар ҳали тилларга тилдан.

Кўрганлари эшитганлари,

Сайқаллаб сўз пишитганлари.

 

Булбул каби менимча, аниқ,

Соҳир сўзи ўзидай ёниқ.

Саъдулла ака деб ул устозни,

Жондай тутган қалам-қоғозни.

 

Ихлос ошиб қиламан ҳурмат,

Васфин айлаб борида фурсат.

Қалбим тошиб қиламан эъзоз,

Қалбим қайнаб бераман ихлос.

 

Эвазига ибрат оламан,

Шогирд шоир бўлиб қоламан.

Эр йигит-у қиз китобхонлар,

Элидаги биз – китобхонлар.

 

Ўрганамиз ўргатмоқ учун,

Кўргизай деб китоблар кучин.

Яна қайтай ўз устозимга,

Жаранг қўшиб бор овозимга.

 

Кибри йўғ-у, камтарлиги бор,

Ҳар дардлига ҳамдардлиги бор.

Безорлиги бор пасткашлардан,

Андишасиз ҳазилкашлардан.

 

Ёзганлари самимий, содда,

Неки бўлган бўлса ҳаётда.

Ўқиб кўрган билар бешубҳа,

Бўлганлигин тузук бир туҳфа.

 

Китобдаги ҳикоялар ҳам,

Нафосатли, назмдан эмас кам.

Хуллас, ўқинг, кўнгил жой бўлгай,

Ўқиб кўрган маънан бой бўлгай.

Жумабой ҲИДОЯТОВ.

 

Амударёмсан

Жайҳун бўйларида гуллаб-яшнаган,

Амуни жиловлаб, кўприк ташлаган.

Тўкин дастурхонда деҳқон меҳри жам,

Менинг она юртим, Амударёмсан.

 

Боболар қувватин берган бу макон,

Юзинг ёруғ бўлсин, элим ҳар қачон.

Мустақил бу Ватан тинч тургай, омон,

Менинг она юртим, Амударёмсан.

 

Оққош, бешак, гурвак қовун сенда бор,

Олма, анжир, узум боғлар сенда бор.

Ипагу сурп ҳам бари сенда бор,

Менинг она юртим, Амударёмсан.

 

Юртбошим кўрсатган йўлдан боравер,

Юксак марраларга қадам қўявер.

Мангу омон бўлгин, мангу гуллайвер,

Менинг она юртим, Амударёмсан.

Раҳимбой Прмилов.

 

Ишқ фасли

 

Бугун кўкдан хўрсиниб,

Қайтаяпти ерга қор.

Гарчи эриб кетса-да,

Қалбида бир севинч бор.

 

Ерга қўйганда меҳр,

Майли эриб кетса ҳам.

Тўёлса висолига,

Рози эди шунда ҳам.

 

Тўрт фаслда бир бора,

Ошиқлар кўришарди.

Қор эрийди на чора,

Ер ҳам кўзин ёшларди.

 

Ер бир "Мажнун" мисоли,

Кутар эди "Лайли"син.

Кўнглин босарди ғубор,

Ўйласа сўнг эришин.

"Лайли" муҳаббат учун,

Рози эди эришга.

Бир лаҳзалик висолга,

Барчасига кўнишга.

 

Шундан буён ҳар йили,

Лайлисини кутар ер.

Қор эриб кетаётиб,

Ерга қараб, бир сўз дер:

 

– Ҳижронга ҳеч ўксима,

Севги дардга ўхшайди.

Олис бўлсак иккимиз,

У қалбларда яшайди.

 

Қаҳратон деб ўксиманг,

Қишнинг қалби пок асли.

Сиз, ўйламанг баҳор деб,

Аслида Қиш ишқ фасли.

Гўзал Каримова,

41-мактаб ўқувчиси.

 

Ватан

Она Ватан, ҳур Ватан,

Меҳри дарёйим Ватан.

Ўзбекистон бағрида,

Амударё гул-чаман.

Ўзбек, қозоқ ва туркман,

Қорақалпоқ жон-у тан.

Бир юз-у қирқ миллатга,

Ўзбекистон ҳур Ватан.

Дилрабо Муродова,

24-мактаб ўқувчиси.

 

Фасллар

Қиш ўтиб, баҳор келар,

Наврўз гуллари билан.

Изида ёз гуркирар,

Тўкин боғлари билан.

Куз келар ҳориб-толиб,

Хирмонларни елкалаб.

Сўнгра уч ой қиш ғолиб,

Музлар йўл-у йўлаклар.

Фарруҳ Аманбоев, 24-мактаб ўқувчиси.

 

Янги йил

Қишнинг биринчи ойи,

Айни қор ёғар чоғи.

Эски йилдан кечамиз,

Янги йилни кутамиз.

Янги йилнинг шукуҳи,

Ҳамма ерларни кезар,

Жажжи-жажжи болалар,

Кўчага безак берар.

Ҳамма ёқда оппоқ қор,

Қишдан дараклар берар.

Яна бироз вақтдан сўнг,

Янги йил кириб келар.

Соҳиба Шарипова,

41-мактаб ўқувчиси.