Масъуллар томонидан Амударё туманида аҳолига кўрсатилаётган тиббий хизмат сифати ўрганилди

Мамлакатимизда хотин-қизларнинг ҳуқуқ ва қонуний манфаатларини ҳимоя қилиш, уларнинг иқтисодий, ижтимоий ва сиёсий фаоллигини ошириш, соғлигини сақлаш, касбга ўқитиш ва бандлигини таъминлаш, тадбиркорликка кенг жалб этиш, эҳтиёжманд хотин-қизларни ижтимоий қўллаб-қувватлаш, гендер тенгликни таъминлаш борасида ислоҳотлар тизимли равишда амалга оширилмоқда.

7 январь куни Қорақалпоғистон Республикаси Вазирлар Кенгаши Раиси ўринбосари − Оила ва хотин-қизлар қўмитаси раиси Марям Аҳмедова, Қорақалпоғистон Республикаси Соғлиқни сақлаш вазирининг оналик ва болаликни муҳофаза қилиш бўйича ўринбосари Акмал Асқаровлар Амударё туманига ташриф буюришди.

Ташриф давомида меҳмонлар туман ҳокими ўринбосари Оила ва хотин-қизлар бўлими бошлиғи Гўзал Сабурова ҳамда туман ҳокими ўринбосари Маҳмуд Шерметовлар ҳамроҳлигида туман тиббиёт бирлашмасининг туғруқ бўлимида бўлишди. Туман тиббиёт бирлашмаси бош шифокори Фахриддин Абдуллаев туғруқ бўлимида ёш оналар ва гўдаклар учун яратилган шароитлар билан масъулларни яқиндан таништирди.

Меҳмонлар эрта туғруқ ва яқин қариндошлар ўртасидаги никоҳнинг олдини олиш, исталмаган ҳомиладорлик масалаларида олиб борилган тарғибот ишлари билан танишиб, оналар ва болаларнинг сифатли тиббий хизматлардан фойдаланиш имкониятларини кенгайтириш, уларга ихтисослашган ва юқори технологик тиббий ёрдам кўрсатиш, репродуктив саломатликни сақлаш, гўдаклар ўлимининг олдини олишга қаратилган қатор қонунлар, Президент фармон ва қарорлари ижроси доирасида амалга оширилган ишларни муҳокама қилдилар.

Шундан сўнг, туман кўп тармоқли марказий поликлиникадаги шароитлар кўздан кечирилди. Шифокор ва ҳамширалар билан суҳбат қурилди. Мулоқот давомида аҳолининг тиббий маданиятини ошириш, касалликларнинг олдини олиш масалалари ҳақида сўз юритилди. Аҳолини дори билан эмас, профилактика билан соғломлаштириш зарурлиги таъкидланди. Шунингдек, одамларнинг ўз соғлиғига эътиборини кучайтириш, скрининг текширувларини мунтазам ўтказиб бориш кераклиги айтиб ўтилди.

Ташриф давомида меҳмонлар Хитой овули ҳудудидаги 6-сонли Қишлоқ оилавий поликлиникасига ҳам ташриф бюрдилар. Шифокор ва ҳамширалар ҳамда бирламчи тиббий хизматдан фойдаланиш учун келган беморлар билан суҳбатлашиш асносида соҳадаги камчилик ва таклифлар ўрганилди.

Шундан сўнг Қорақалпоғистон Республикаси Вазирлар Кенгаши Раиси ўринбосари − Оила ва хотин-қизлар қўмитаси раиси Марям Аҳмедова Бўз ёп овул фуқаролар йиғини биносида маҳалла раиси, ҳоким ёрдамчиси, хотин-қизлар фаоли, ёшлар етакчиси билан учрашди. Учрашувда ўтган 2022 йил давомида хотин-қизларни қўллаб-қувватлаш, бандлигини таъминлаш мақсадида амалга оширилган ишлар сарҳисоб қилинди.

Ундан ташқари, малакали тиббий хизматларнинг ҳар бир оилага кириб боришини таъминлаш, бунда эҳтиёжманд инсонларга алоҳида ёндашиш кераклиги таъкидланди ҳамда маҳалладаги тиббиёт контейнери кўздан кечирилди.

Туман марказидан олисда жойлашган Бўз ёп маҳалласида ташкил этилган контейнер тиббий ускуналар, интернет, замонавий алоқа воситалари, дори-дармонлар билан жиҳозлангани аҳолининг узоғини яқин қилиб, чекка ҳудудлар аҳолисига ҳам сифатли тиббий хизматдан фойдаланиш имконини бермоқда.

Ташриф давомида Марям Аҳмедова Бўз ёп маҳалласида истиқомат қилувчи “Аёллар дафтари”да турувчи 1-гуруҳ ногирони Гўзал Кўчқаровнинг хонадонида бўлди. Гўзал Қўчқарова имконияти чекланган бўлишига қарамасдан, тикувчилик касбининг сир-асрорини тўлиқ ўрганди. У хотин-қизлар фаолининг кўмаги билан касбга ўқитилиб, махсус сертификатни қўлга киритди. Унга ҳоким ёрдамчисининг кўмаги билан тикув машинаси олиш учун субсидия ажратилди.

Оила ва хотин-қизлар қўмитаси раиси Марям Аҳмедова интилувчан ва тиришқоқ Гўзал Қўчқаровага тикув машинасини топширди ҳамда келажакда машҳур тикувчи бўлиб, ўзининг тадбиркорлик фаолиятини янада кенгайтиришига тилакдошлик билдирди.

Мамлакатимизда аёл-қизларни қўллаб-қувватлаш, айниқса, ижтимоий ҳимояга муҳтож аёлларга ҳар томонлама кўмак бериш мақсадида тизимли ишлар амалга оширилмоқда. Уларнинг соғлиғини сақлаш, бандлигини таъминлаш, ижтимоий-иқтисодий, психологик ёрдам кўрсатиш мақсадида амалга оширилаётган ижобий ишлар самараси ўлароқ аёл-қизларимиз ўзларини жамиятнинг ажралмас бўлаги эканлигини қалбан ҳис қилиб, юрт ривожи ва аҳоли фаровонлиги учун муносиб ҳисса қўшмоқдалар.

Туман ҳокимлигининг Ахборот хизмати.