Masʼullar tomonidan Amudaryo tumanida aholiga koʻrsatilayotgan tibbiy xizmat sifati oʻrganildi

Mamlakatimizda xotin-qizlarning huquq va qonuniy manfaatlarini himoya qilish, ularning iqtisodiy, ijtimoiy va siyosiy faolligini oshirish, sogʻligini saqlash, kasbga oʻqitish va bandligini taʼminlash, tadbirkorlikka keng jalb etish, ehtiyojmand xotin-qizlarni ijtimoiy qoʻllab-quvvatlash, gender tenglikni taʼminlash borasida islohotlar tizimli ravishda amalga oshirilmoqda.

7-yanvar kuni Qoraqalpogʻiston Respublikasi Vazirlar Kengashi Raisi oʻrinbosari − Oila va xotin-qizlar qoʻmitasi raisi Maryam Ahmedova, Qoraqalpogʻiston Respublikasi Sogʻliqni saqlash vazirining onalik va bolalikni muhofaza qilish boʻyicha oʻrinbosari Akmal Asqarovlar Amudaryo tumaniga tashrif buyurishdi.

Tashrif davomida mehmonlar tuman hokimi oʻrinbosari Oila va xotin-qizlar boʻlimi boshligʻi Goʻzal Saburova hamda tuman hokimi oʻrinbosari Mahmud Shermetovlar hamrohligida tuman tibbiyot birlashmasining tugʻruq boʻlimida boʻlishdi. Tuman tibbiyot birlashmasi bosh shifokori Faxriddin Abdullayev tugʻruq boʻlimida yosh onalar va goʻdaklar uchun yaratilgan sharoitlar bilan masʼullarni yaqindan tanishtirdi.

Mehmonlar erta tugʻruq va yaqin qarindoshlar oʻrtasidagi nikohning oldini olish, istalmagan homiladorlik masalalarida olib borilgan targʻibot ishlari bilan tanishib, onalar va bolalarning sifatli tibbiy xizmatlardan foydalanish imkoniyatlarini kengaytirish, ularga ixtisoslashgan va yuqori texnologik tibbiy yordam koʻrsatish, reproduktiv salomatlikni saqlash, goʻdaklar oʻlimining oldini olishga qaratilgan qator qonunlar, Prezident farmon va qarorlari ijrosi doirasida amalga oshirilgan ishlarni muhokama qildilar.

Shundan soʻng, tuman koʻp tarmoqli markaziy poliklinikadagi sharoitlar koʻzdan kechirildi. Shifokor va hamshiralar bilan suhbat qurildi. Muloqot davomida aholining tibbiy madaniyatini oshirish, kasalliklarning oldini olish masalalari haqida soʻz yuritildi. Aholini dori bilan emas, profilaktika bilan sogʻlomlashtirish zarurligi taʼkidlandi. Shuningdek, odamlarning oʻz sogʻligʻiga eʼtiborini kuchaytirish, skrining tekshiruvlarini muntazam oʻtkazib borish kerakligi aytib oʻtildi.

Tashrif davomida mehmonlar Xitoy ovuli hududidagi 6-sonli Qishloq oilaviy poliklinikasiga ham tashrif byurdilar. Shifokor va hamshiralar hamda birlamchi tibbiy xizmatdan foydalanish uchun kelgan bemorlar bilan suhbatlashish asnosida sohadagi kamchilik va takliflar oʻrganildi.

Shundan soʻng Qoraqalpogʻiston Respublikasi Vazirlar Kengashi Raisi oʻrinbosari − Oila va xotin-qizlar qoʻmitasi raisi Maryam Ahmedova Boʻz yop ovul fuqarolar yigʻini binosida mahalla raisi, hokim yordamchisi, xotin-qizlar faoli, yoshlar yetakchisi bilan uchrashdi. Uchrashuvda oʻtgan 2022-yil davomida xotin-qizlarni qoʻllab-quvvatlash, bandligini taʼminlash maqsadida amalga oshirilgan ishlar sarhisob qilindi.

Undan tashqari, malakali tibbiy xizmatlarning har bir oilaga kirib borishini taʼminlash, bunda ehtiyojmand insonlarga alohida yondashish kerakligi taʼkidlandi hamda mahalladagi tibbiyot konteyneri koʻzdan kechirildi.

Tuman markazidan olisda joylashgan Boʻz yop mahallasida tashkil etilgan konteyner tibbiy uskunalar, internet, zamonaviy aloqa vositalari, dori-darmonlar bilan jihozlangani aholining uzogʻini yaqin qilib, chekka hududlar aholisiga ham sifatli tibbiy xizmatdan foydalanish imkonini bermoqda.

Tashrif davomida Maryam Ahmedova Boʻz yop mahallasida istiqomat qiluvchi “Ayollar daftari”da turuvchi 1-guruh nogironi Goʻzal Koʻchqarovning xonadonida boʻldi. Goʻzal Qoʻchqarova imkoniyati cheklangan boʻlishiga qaramasdan, tikuvchilik kasbining sir-asrorini toʻliq oʻrgandi. U xotin-qizlar faolining koʻmagi bilan kasbga oʻqitilib, maxsus sertifikatni qoʻlga kiritdi. Unga hokim yordamchisining koʻmagi bilan tikuv mashinasi olish uchun subsidiya ajratildi.

Oila va xotin-qizlar qoʻmitasi raisi Maryam Ahmedova intiluvchan va tirishqoq Goʻzal Qoʻchqarovaga tikuv mashinasini topshirdi hamda kelajakda mashhur tikuvchi boʻlib, oʻzining tadbirkorlik faoliyatini yanada kengaytirishiga tilakdoshlik bildirdi.

Mamlakatimizda ayol-qizlarni qoʻllab-quvvatlash, ayniqsa, ijtimoiy himoyaga muhtoj ayollarga har tomonlama koʻmak berish maqsadida tizimli ishlar amalga oshirilmoqda. Ularning sogʻligʻini saqlash, bandligini taʼminlash, ijtimoiy-iqtisodiy, psixologik yordam koʻrsatish maqsadida amalga oshirilayotgan ijobiy ishlar samarasi oʻlaroq ayol-qizlarimiz oʻzlarini jamiyatning ajralmas boʻlagi ekanligini qalban his qilib, yurt rivoji va aholi farovonligi uchun munosib hissa qoʻshmoqdalar.

Tuman hokimligining Axborot xizmati.