Амударё тумани ҳокими Султонбой Йўлдашевнинг Ўзбекистон Республикаси Қуролли Кучлари ташкил этилганлигининг 31 йиллиги муносабати билан Ватан ҳимоячиларига БАЙРАМ ТАБРИГИ

Қадрли аскар ва сержантлар, Қуролли Кучларимиз фахрийлари!

Аввало, Сиз азизларни, сизлар орқали барча ҳарбийларимизни, бутун халқимизни Ўзбекистон Республикаси Қуролли Кучлари ташкил этилганининг 31 йиллиги ҳамда Ватан ҳимоячилари куни билан чин қалбимдан табриклайман!

Албатта, юртимизда байрамлар, тарихий саналар жуда кўп. Аммо юрт тинчлиги, осмонимиз мусаффолиги, давлатимиз чегараларининг дахлсизлигини таъминловчи қудратли куч – Ватан ҳимоячилари куни байрами барчамиз учун қадрли ва аҳамиятлидир.

Озод ва обод Ватанимиздаги осуда ҳаёт, чегараларимиз дахлсизлиги, бунёдкор халқимизнинг тинчлиги ва осойишталигини қўриқлашда Ватан ҳимоячиларининг хизматлари беқиёсдир.

Таъкидлаш керакки, миллий армиямизнинг куч-қудрати ҳарбий хизматчиларимиз билан бағрикенг ва олижаноб халқимизнинг бирлигидадир. Бугун халқимиз ўз қасамёдига содиқ қолиб, хизмат бурчини шараф билан ўтаётган ҳарбийларимиз билан ҳар қачонгидан ҳам кўра жипс ва бирдамдир.

Азиз юртдошлар!

Бугунги кунда миллий армиямиз ёшларимиз учун чинакам мардлик, фидойилик, ватанпарварлик мактабига айлангани барчамиз учун айни ҳақиқатдир. Бу ҳақиқатни юртимиздаги барча ота-оналар, бутун халқимиз ғурур билан, миннатдорчилик билан эътироф этмоқда.

Ҳозирги кунда оналар ўз фарзандларини армияга кўзда ёш, юракда хавотир билан эмас, балки “Менинг ўғлим ҳақиқий Ватан ҳимоячиси бўлади” деган юксак ишонч ва фахр туйғуси билан кузатмоқда.

Юртимизда офицерлар ва сержант кадрларни тайёрлаш ҳамда малакасини оширишнинг замонавий талабларга жавоб берадиган самарали тизими яратилди. Ҳарбий хизматни ўзининг касби, Ватан ва халқ олдидаги муқаддас бурчи деб билган ўғлонларимизни шарафлаш, уларга эҳтиром кўрсатиш барчамиз учун ҳам қарз, ҳам фарздир.

Қолаверса, ёшларни узлуксиз ҳарбий таълимга жалб қилиш борасида ҳам тизимли ишлар йўлга қўйилди. Биргина 2022 йилда 9 нафар туманимиз ёшлари Олий ҳарбий таълим муассасаларига, 8 нафар ёшларимиз эса “Темурбеклар мактаби” ҳарбий-академик лицейларига ўқишга қабул қилинди. Улар ҳам келгусида энг намунали Ватан ҳимоячилари бўлиб етишишига ишонамиз!

Қадрли Ватан ҳимоячилари!

Фурсатдан фойдаланиб, яна бир бор Сиз азизларни ва оила аъзоларингизни Ўзбекистон Республикаси Қуролли Кучлари ташкил этилганининг 31 йиллиги ҳамда Ватан ҳимоячилари куни билан чин қалбимдан табриклайман!

Барчангизга мустаҳкам соғлик, оилавий бахт ва саодат, шарафли ва масъулиятли фаолиятингизда улкан зафарлар тилайман.

Юртимиз тинч, осмонимиз мусаффо бўлсин!