Ойбек номли маҳаллада туман ҳокимининг ёшлар билан навбатдаги учрашуви бўлиб ўтди

18 январь куни Амударё туманининг Ойбек маҳалласида туман ҳокимининг ёшлар билан навбатдаги учрашуви бўлиб ўтди.

Учрашувда туман ҳокими Султонбой Йўлдашев, Халқ қабулхонаси бўлими мудири Эркин Ражабов, ҳоким ўринбосари Маҳмуд Шерметов, мутасадди ташкилот масъуллари ҳамда маҳалладаги фаол ёшлар иштирок этишди.

Учрашувда туман ҳокими Султонбой Йўлдашев мамлакатимизда униб-ўсиб келаётган ёш авлодни ҳар томонлама қўллаб-қувватлаш, истеъдодларини юзага чиқариш учун яратилган шароит ва имкониятлар хусусида айтиб ўтди. Шу билан бирга Амударё туманида якунланган 2022 йил давомида ёшларнинг бандлигини таъминлаш, касбга ўқитиш, ижтимоий муаммоларини тизимли ҳал қилиш борасида олиб борилган ишлар сарҳисоб қилинди. 2023 йилга мўлжалланган режалар хусусида ҳам ёшларга батафсил маълумотлар берилди.

Маҳалладаги ҳоким ёрдамчиси Маҳмуд Сапарбаев аҳоли орасида хатлов жараёнлари олиб борилаётганлигини, бу жараёнда ҳар бир фуқаронинг хонадонида бўлиб, улар билан бирма-бир суҳбат олиб борилаёганлигини таъкидлади. Аҳамиятлиси, хатлов жараёнларида ёшларнинг аксарияти тадбиркорлик қилиш истаги борлигини билдириб, йўл-йўриқ ва кўрсатмалар сўраётганлигини айтиб ўтди.

Маҳалладаги ёшлар етакчиси Қувват Эсамурадов эса ёшларнинг бўш вақтини мазмунли ташкил этиш, улар ўртасида спортни оммалаштириш, ёшлар орасида соғлом турмуш тарзини тарғиб қилиш бўйича амалга оширилган ишлар ҳақида батафсил маълумот берди.

Шундан сўнг, ёшлардан Сурайё Йўлдашева олий таълим муассасасида контракт асосида таълим олаётганлигини билдириб, контракт тўловининг 50 фоизи қоплаб берилишида туман ҳокимидан амалий ёрдам сўради.

Шунингдек, ёшлардан Бахадир Собиров оилавий шароити ҳақида маълум қилиб, муддатли ҳарбий хизматни ўташ учун шартнома бадалини қоплаб беришда амалий ёрдам сўраб мурожаат қилди.

Баҳорой Саъдуллаева эса олий таълим муассасасига тўлов-контракт асосида ўқишга қабул қилинганлигини, аммо оилавий шароити сабаб тўловни ўз вақтида амалга оширишга қийналаёганлигини билдириб туман ҳокимига ёрдам сўраб мурожаат қилди.

Мурожаатлар юзасидан туман ҳокими Султонбой Йўлдашев тегишли мутасаддиларга топшириқлар бериб, ижросини ўз назоратига олди.

 Айтиш керакки, туман ҳокимининг ёшлар билан бўлиб ўтган учрашувларида ёшлар томонидан келиб тушаётган мурожаатлар имкон қадар ижобий ҳал қилинмоқда.

Туман ҳокимининг ёшлар билан билан бўлиб ўтган учрашувларининг бирида ёшлардан Шокир Ҳайитбаев ва Асалой Матқурбановалар туман ҳокимига ўз муаммоларини айтиб, мурожаат қилишган эди. Ойбек маҳалласида бўлиб ўтган мазкур учрашувда Шокир Ҳайитбаев ҳайдовчилик гувоҳномасини олишда амалий ёрдам берлиганини, Асалой Матқурбанова эса ўқишининг контракт тўлови қоплаб берилганлигини ва мурожаати ижобий ҳал бўлганлигини айтиб, туман ҳокимига миннатдорлик билдиришди.

Учрашувда маҳалланинг фаол ёшларидан Турсунбой Раҳимов сўзга чиқиб, туманда спорт соҳасини ривожлантириш, спортчи ёшларни қўллаб-қувватлаш борасида салмоқли ишлар амалга оширилаётганлигини ва бунинг натижасида туман ёшлари катта ғалабаларга эришаётганлигини айтиб ўтди. Жумладан, Турсунбой Раҳимовнинг ўзи ҳам “Беш ташаббус олимпиадаси”нинг Қорақалпоғистон Республикаси босқичида фахрли 1-ўринни эгаллаганлигини, бунга сабаб эса ёшлар учун яратилган шароит ва имкониятлар эканлигини таъкидлаб, туман ҳокимига миннатдорчилик билдирди.

Туман ҳокимлигининг Ахборот хизмати