Гулзор маҳалласида туман ҳокимининг сайёр қабули ва ёшлар билан учрашуви бўлиб ўтди

Замонавий билим ва кўникмаларга эга, мамлакатнинг муносиб келажаги учун жавобгарликни ўз зиммасига ола биладиган баркамол, мақсадга интилувчан ва серғайрат ёшларни тарбиялаш мамлакатни барқарор ва илдам ривожлантиришнинг энг муҳим шартидир. Мазкур эзгу мақсадни рўёбга чиқариш, ёшларнинг муаммо ва таклифларини ўрганиш мақсадида ташкил этилаётган ҳоким ва ёшлар учрашувлари юқоридаги устувор вазифаларни амалга оширишда муҳим восита бўлиб хизмат қилмоқда.

26 январь куни Амударё туманининг Гулзор маҳалла фуқаролар йиғини биносида туман ҳокими, 1-сектор раҳбари Султонбой Йўлдашевнинг сайёр қабули ва ёшлар билан учрашуви бўлиб ўтди.

Унда туман Халқ қабулхонаси бўлими мудири Эркин Ражабов, туман ҳокими ўринбосари Маҳмуд Шерметов, Ёшлар ишлари агентлиги туман бўлими бошлиғи Сардор Исмаилов ҳамда маҳалланинг фаол ёшлари иштирок этишди.

Учрашувда туман ҳокими Султонбой Йўлдашев сўнгги йилларда ёшларнинг интеллектуал ва ижодий салоҳиятини намоён қилиш, уларнинг фуқаролик жавобгарлигини ва олиб борилаётган ислоҳотларга дахлдорлигини ошириш борасида улкан ишлар амалга оширилаётганини таъкидлади. Шу билан бирга, жойларда ёшларнинг ижтимоий-иқтисодий фаоллигини оширишга, уларни тадбиркорлик фаолиятига кенг жалб қилишга, ёш тадбиркорларнинг истиқболли ғоялари ва лойиҳаларини рўёбга чиқаришга доир кўплаб саъй-ҳаракатлар амалга оширилаётганини айтиб ўтди.

Учрашувда ёшлар ўз муаммо ва таклифлари билан туман ҳокимига мурожаат қилишди. Жумладан, маҳалланинг фаол ёшларидан Динора Янгибоева ўзининг тадбиркорлик фаолиятини йўлга қўймоқчи эканлигини аммо, бунинг учун бўш бино зарурлигини айтиб, туман ҳокимига мурожаат қилди.

Шунингдек, ёшлардан Нилуфар Турсинбаева ҳамда Озода Бердибоевалар олий таълим муассасасида ўқиётганлигини, аммо оилавий шароити туфайли контракт тўловини тўлаш муаммо бўлаётганилигини билдириб, амалий ёрдам сўрашди.

Маҳалла ёшларидан яна бири Дилшодбек Соатбоев эса туман ҳокимига оилавий шароитини, айтиб ҳайдовчилик гувоҳномасини олиш учун бадал пулларининг қоплаб берилишида амалий ёрдам сўради.

Ёшлардан келиб тушган мурожаатларнинг барчаси ижобий ҳал этиладиган бўлди. Бу бўйича Ёшлар ишлари агентлиги туман бўлими бошлиғи Сардор Исмаиловга ҳамда Гулзор маҳалласининг ҳоким ёрдамчиси Акбар Ражабовга топшириқлар берилиб, ижроси назоратга олинди.

Йиғилишда ёшларнинг бизнес ташаббуслари, Start-up ғоялари ва лойиҳаларини рўёбга чиқаришга кўмаклашиш ҳамда қўллаб-қувватлаш, банд бўлмаган ёшларни меҳнат бозорида талаб юқори бўлган мутахассисликлар ва бизнес юритиш кўникмаларига ўқитиш, умуман ёшларнинг ижтимоий-иқтисодий фаоллигини ошириш орқали уларнинг бандлигини таъминлаш муҳим вазифалардан бири эканлиги ва бу масалага туман ҳокимлиги ва сектор раҳбарияти доимий эътибор қаратиши таъкидланди.

Учрашувда туман ҳокими Султонбой Йўлдашев мамлакатимизда яратилган барча шароит ва имкониятлар фақат ёшлар учунлигини таъкидлаб, уларнинг келгуси ишларига омад ва зафарлар тилади.

Туман ҳокимлигининг Ахборот хизмати